OMU ngwapwile namyaka yakusemuka 9, ngwalitwaminyine kukola. Oholyapwa jino nguli namyaka yakusemuka 43, oloze ngwapwa nguwamwihi chikuma, mita yimwe kaha. Omu visemi jami vatachikijile ngwavo kangweshi kukasuhwako, vaputukile kungukolezeza ngupwenga ngunyamalikita mangana nguzeneke kulizakamina chikuma hachivuvu chami. Ngocho ngwahakile mesa haweluka wazuvo yetu nakuputuka kulanjisa mihako, kaha ngwalaminenga mesa kana kupwa yaunyoji. Echi chalingishile vatu vavavulu vezenga nakulanda.

Chipwe ngocho, kuzata nangolo kachalumwine vyuma vimwe mukuyoya chamiko. Ngwapwile lika nguwamwihi, kaha ngwachiwanyinenga kupwa chachikalu kulinga navyuma vimwe vyavyashi mukuyoya, vyakufwana nge kuheta hamesa yakulanjishila. Chasolokele nge vyuma vyosena vavihakilileko vatu vavasuku kunguhambakana ami. Ngwevwilenga kupihya hachuma kana, oloze omu ngwahetele myaka 14, vyuma vyalumukile.

Likumbi limwe, mapwevo vavali vaze vapwile Vinjiho jaYehova valanjile mihako kuli ami, kaha vasakile ngulinangulenga navo Mbimbiliya. Kutwala muze ngwejivile ngwami kutachikiza Yehova navyuma ajina chikiko chapwile chachilemu kuhambakana kulizakamina hachivuvu chami. Chuma kana changukafwile chikuma. Mukanda waSamu 73:28 ngwauzangile chikuma. Mazu akulivanga hamukanda kana amba ngwawo: “Chinapu chamwaza kuli ami kupandama kuli Kalunga.”

Tanga yetu yalukile kufuma kuCôte d’Ivoire nakuya kuBurkina Faso, kaha chiyoyelo chami chalumukile chikuma. Kungalila kuze twafumine, vatu vejililile kungumona kumesa yami yakulanjishila mihako. Oloze mungalila muze twalukilile, vatu kavangutachikijileko, kaha valikomokelelenga hakungumona. Vatu vangutalilenga chikuma, ngocho ngwatwaminenga kaha muzuvo havyalumingo vyavivulu. Oloze ngwanukile omu chinapunga chamwaza kuli ami kupandama kuli Yehova. Ngwasonekelele mukanda kuofesi yamutango yaVinjiho jaYehova, kaha vangutuminyinyine mutu uze atelemo chikupu. Nani uze apwile kamishonali ejile namutukutuku wenyi.

Mikwakwa yamungalila yetu yapwilenga yakusenena, kaha mungonde yavula yapwilenga naulova chikuma. Ndumbwetu Nani aholokelenga mapapa kakavulu hamutukutuku wenyi omu apwilenga nakwiza nakungunangula, chipwe ngocho kalitwaminyinyineko. Likumbi limwe alisuwile kuya nayami kukukunguluka. Ngwatachikijile ngwami kulinga ngocho nachisakiwa kufuma hembo nakuya kuvatu vaze vangutalilenga nakungukomoka. Chasakiwile nawa kunguveleka kumutukutuku wenyi nakuulingisa jino uleme chikuma nakuhona kuutambukisa  kanawa. Chipwe ngocho, ngwetavilile kuya kukukunguluka, mwomwo ngwanukile mazu amuchihanda chamuchivali hamukanda uze ngwazangile chikuma, akwamba ngwavo: “Ngunalingisa Mwata Wakulitulaho Yehova kupwa uchinyino wami.”

Numba tuhu lwola lumwe ami naNani twaholokelenga mumalova, oloze katwalizakaminyineko mwomwo twazangile kuyanga kukukunguluka. Vatu ngwawanyinenga kuZuvo yaWangana valihandunwine chikuma navaze ngwawanyinenga mujila mwomwo vakiko kavangukomokelenga hakungumonako, oloze vawahililenga chikuma. Kahomu mwahichile tukweji 9, vangumbapachishile.

Mazu amuchihanda chamuchitatu ahamukanda uze ngwazangile chikuma, amba ngwawo: “Nguvilikenga milimo yenyi yosena.” Ngwatachikijile ngwami mulimo wakwambulula naungukaluhwila chikuma. Nguchili nakwanuka likumbi lyatete ngwayile nakwambulwila kuzuvo hizuvo. Vanyike navakulwane vangukomokelenga chikuma, nakungukava munyima, nakunguseha, nakulondezeza omu ngwatambukilenga. Chuma kana changwivwishilenga chikuma kupihya, oloze omu ngwanukile ngwami vatu kana vali nakusakiwa Palachise nganomu ngwayisakile ami, changukafwile mangana ngumike.

Hakusaka ngwashiwiseko chiyoyelo chami, ngwalanjile kinga yamafumbo atatu. Omu twakandukilenga kujipili, ndumbwami uze ngwazachilenga nenyi mumulimo wamuwande angushinjikilenga, kaha anyinyinenga hakinga omu twashikumukilenga. Numba tuhu hakavanga mulimo wakwambulula wapwilenga waukalu, oloze mukuhita chalwola ngwalivwishilenga kuwaha, kahechi changulingishile nguputuke upayiniya washimbu yosena mu 1998.

Ngwalinangwilenga Mbimbiliya navatu vavavulu, kaha havatu kana vawana vavambapachisa. Kaha nawa ndumbwami umwe wapwevo naikiye alinangwile muchano. Changukolezezele chikuma hakumona omu vatu vapwile nakuzovoloka. Likumbi limwe omu ngwapwile nakuviza musongo wachishikashika, ngwatambwile mukanda kufuma kuCôte d’Ivoire. Ngwaputukile kulinangula Mbimbiliya nalunga umwe hayunivesiti muBurkina Faso, kaha ngwalwezele ndumbwetu walunga atwaleho kumunangula. Ou lunga alukilile kuCôte d’Ivoire. Ngwevwile kuwaha hakungulweza ngwenyi napu jino muka-kwambulula wakuzeneka kumbapachisa.

Uno ngwazachilenga mulimo muka mangana ngulizakame? Liuka limwe lize lyeji kukafwanga vitonji lyangunangwile kutonga. Mulongeshi umwe amwene omu ngwapwile nakuzata, kaha ambile ngwenyi, “Twatela kukunangula mwakutungila sopo.” Kaha valingile vene ngocho. Ngweji kutunganga sopo yakukosesa nayize yakusanyisa. Vatu vazangilenga chikuma sopo yami, kaha valwezelenga navakwavo vezenga nakulanda. Ngwalanjishilenga vatu sopo kana kujizuvo javo kuzachisa kinga yami yamafumbo atatu.

Chaluvinda mu 2004, ngwalitwaminyine kuzata mulimo waupaniya mwomwo nyima yami yakolelenga chikuma. Chipwe ngocho nguchili nakwazana lika mumulimo wakwambulula.

Vatu veji kwambanga ngwavo vangutachikiza mwomwo yakumwesamwesa chami. Ngweji kuwahililanga chikuma mwomwo chinapu chamwaza kuli ami kupandama kuli Kalunga.—Vanawambulula kuli Sarah Maiga.