1, 2. Uno vatu valihandununa ngachilihi natunyama?

WONGO wamutu wapwa wakulipwila. Chakutalilaho, vatu vatwama nauhashi wakulinangula lilimi. Kaha kulinangula lilimi cheji kutukafwanga tutange, nakusoneka, nakuhanjika, nakwivwishisa kanawa vyuma tuli nakwivwa. Kaha nawa tweji kupwanga nauhashi wakulomba nakwalisa Yehova hakwimba myaso. Vyuma kanevi vyatuhandula kutunyama. Vaka-sayasi kavevwishisa kanawa omu wongo weji kuzatanga mujila kaneyi yakulipwilako.

² Uhashi wetu wakuhanjika lilimi wapwa hiwana wakufuma kuli Yehova. (Samu 139:14; Kusoloka 4:11) Atuhana nawa wana weka uze naukiko watuhandula kutunyama. Etu vatu vatutengele ‘muchifwanyisa chaKalunga.’ Twatwama nalisesa lyakulisakwila vyuma tunasake kulinga etu vavene. Kaha tunahase kuzachisa lilimi mangana tuzachile Yehova nakumwalisa.—Kuputuka 1:27.

3. Vyuma muka natuhane Yehova vize navitulingisa tupwenga namangana?

 ³ Yehova natusolwela jila tunahase kumuzachila nakumwalisa hakutuhana Mbimbiliya. Kaha Mbimbiliya yosena yamuundu chipwe yachihanda yili jino mumalimi akuzomboka 2,800. Nge natushinganyekanga havyuma yahanjika Mbimbiliya, kaha natuputuka kushinganyeka ngana muze eji kushinganyekanga Kalunga. (Samu 40:5; 92:5; 139:17) Vishinganyeka vyaYehova vyeji kutuhananga mangana nakutulingisa tukayoye haya myaka yosena.—Tangenu WaChimoteu 2, 3:14-17.

4. Kushinganyeka chalumbununa ika, kaha vihula muka natushimutwila?

⁴ Kushinganyeka chalumbununa kuhunanana chikuma havyuma. (Samu 77:12; Vishimo 24:1, 2) Tweji kunganyalanga chikuma nge natushinganyeka havyuma tweji kulinangulanga hali Yehova naYesu. (Yowano 17:3) Muchihande chino, natukumbulula vihula vino: Tunahase kutanga ngachilihi mujila yize nayitulingisa tuchiwane kupwa chachashi kushinganyeka? Vyuma muka tunahase kushinganyeka? Kaha vyuma muka vinahase kutukafwa tushinganyekenga lwola lwosena nakulivwisa kuwaha?

5, 6. Vyuma muka vinahase kumikafwa mwanuke nakwivwishisa vyuma munatange?

⁵ Uno mwatachikiza ngwenu kuli vyuma vimwe vize mweji kulinganga chakuzeneka kushinganyeka, vyakufwana nge kuhwima, kutambuka, chipwe kuchovwa kinga tahi? Lwola lumwe nawa munahase kutanga chakuzeneka kushinganyeka. Pamo munahase kuputuka nakushinganyeka vyuma vyeka omu muli nakutanga. Vyuma muka munahase kulinga hakusaka mukumise ukalu kana? Chapwa chachilemu kuhunanana havyuma muli nakutanga nomwo vyalumbunukila. Kaha nge munahete kusongo yapalangalafu chipwe nge munakumisa kamutwe kakandende, hwimenuko chindende mushinganyeke havyuma munatange. Shinganyekenu havyuma munalinangula nakuvivwishisa kanawa.

⁶ Vaka-sayasi vanachiwane nge chapwa chachashi kwanuka vyuma tuli nakutanga nge natuvitangila helu. Tengi yetu atachikiza chuma kana, shikaho alwezele naYoshuwa atangenga mukanda waJishimbi “nakuwashinganyekanga,” kulumbununa kutanga nalizu lyamwishi. (Tangenu Yoshuwa 1:8.) Kutangila Mbimbiliya helu nachimikafwa muhunanane nakwanuka vyuma namutanga.

7. Lwola muka lwapwa lwamwaza kushinganyeka haMbimbiliya? (Talenu muvwimbimbi wakulivanga.)

⁷ Kushinganyeka nakuhunanana havyuma tuli nakutanga chasakiwa kuzata nangolo. Shikaho chapwila chachilemu kushinganyeka halwola luze kamwazeyeleko, nakupwa kuchihela chakuzeneka vyema, kuze kakweshi vyuma vyavivulu vyakumitangulako. Muka-kwimba jisamu Ndavichi ashinganyekelenga hakahela kenyi naufuku shimbu kanda asavale tulo. (Samu 63:6) Yesu uze apwile wakukupuka mwosena ayilenga kuvihela vyakuzeneka vyema kuze akashinganyekelenga nakulomba.—Luka 6:12.

8. (a) Vyuma muka tunahase kushinganyeka? (b) Uno Yehova eji kwivwanga ngachilihi nge natushimutwila navatu hali ikiye?

⁸ Kuli navyuma vyeka vize tunahase kushinganyeka, keshi vize kaha natutanga muMbimbiliyako. Chakutalilaho, nge munamono chuma chimwe chamwaza atenga Yehova, achilihulikenu nakulihulisa ngwenu, ‘Uno echi chili nakungunangula ika hali Yehova?’ Vishinganyeka kana navimilingisa mumusakwilile Yehova hakulomba. Kaha nge muli navatu veka, munahase kuvalweza omu muli nakwivwa. (Samu 104:24; Vilinga 14:17) Yehova eji kutwivwililanga nakuwahilila nge natushinganyeka, nakulomba, nakushimutwila navatu hali ikiye. Mbimbiliya yatufwelelesa ngwayo: “Mukanda wakwanukilaho vausonekelele kumeso enyi. Vasonekelemo vaze vevwilenga Yehova woma navaze vashinganyekelenga halijina lyenyi.”—Malaki 3:16.

9. (a) Paulu alwezele Chimoteu ashinganyeke havyuma muka? (b) Vyuma muka tunahase kushinganyeka omu tuli nakuliwahisa vyakuya nakwambulula mujimbu?

⁹ Kaposetolo Paulu alwezele Chimoteu ngwenyi ashinganyekenga omu vatu veji kwivwanga hahanjikiso yenyi, nahatwamiso yenyi, nahakunangula chenyi. (Tangenu WaChimoteu 1, 4:12-16.) Nayenu nawa munahase kushinganyeka havyuma kana. Chakutalilaho, mwatela kupwa nalwola lwakushinganyeka omu muli nakuliwahisa vyakuya nakunangula mutu Mbimbiliya. Mwatela kushinganyeka hamutu namuya nakunangula  nakuwana chihula chipwe chifwanyisa chize nachimukafwa azovoloke. Nge namuliwahisanga mujila kaneyi, kaha lufwelelo lwenu naluzama nakupwa nawa valongeshi vaMbimbiliya vakwipangweji. Namunganyala nawa nge namushinganyekanga shimbu kanda muyenga mumulimo wakwambulula. (Tangenu Ezela 7:10.) Munahase kutanga kapetulu umwe mumukanda waVilinga uze mwamikafwa mupwenga natwima yakwambulula mujimbu. Munahase nawa kushinganyeka hajivesi jamuMbimbiliya jize muli nakusaka kuzachisa likumbi kana muwande nahamikanda namuhana vatu. (WaChimoteu 2, 1:6) Shinganyekenu havatu vamungalila yenu navyuma vize munahase kushimutwila navo vize navivevwisa kuwaha. Nge namuliwahisa mujila kaneyi, kaha namuzachisa kanawa Mbimbiliya hakwambulila vatu.—Wavaka-Kolinde 1, 2:4.

10. Vyuma vyeka muka vyamwaza vize tunahase kushinganyekangaho?

¹⁰ Vyuma vyeka muka tunahase kushinganyeka? Nge mweji kusonekanga vishina havihande vyalikungumbuwa, nahakukunguluka chachihanda nachechi changalila, kaha wanenu lwola lwakuhitulukangamo. Hakulinga ngocho, mwatela kulihulisa ngwenu, ‘Vyuma muka ngunalinangula kuMazu aKalunga nakuliuka lyenyi?’ Munahase nawa kushinganyeka havihande vyamuKaposhi Kakutalila naTonenu! kakweji hikakweji navyuma vyavihya vanalovola hakukunguluka changalila. Nge munakutanga mukanda waYearbook, kaha lihulikenu nakushinganyeka havyuma munatange, nakulingisa vyuma kana vimihete kumuchima. Nge munatange mikanda yetu, munahase kufunjejeka vishina vyavilemu nakuvisoneka. Echi nachimikafwa chikuma halwola namuliwahisa vyakuya kumaungeji akuhilukila, chipwe nakufunga utanga, chipwe hakuhanjika chihande. Chuma chachilemunyi, nge namulihulika nakushinganyeka havyuma munatange, kaha namulingisa vyuma kana vimihete kumuchima nakuwana lwola lwakulomba nakusakwilila Yehova havyuma vyamwaza munalinangula.

11. Mukanda muka waulemu uze twatela kushinganyekangaho, kaha kulinga ngocho nachitukafwa ngachilihi? (Talenu nawa kwinyikila chamwishi.)

¹¹ Chikupu vene, Mbimbiliya yapwa himukanda waulemu uze twatela kushinganyekangaho. Nyi ngachilihi nge halwola lumwe kamweshi kukapwa naMbimbiliyako? * (Talenu kwinyikila chamwishi.) Naumwe wauchi nahase kumilingisa muhone kwanuka visoneke vize mwasaka chikuma chipwe myaso yaWanganako. (Vilinga 16:25) Kaha shipilitu yaKalunga nayimikafwa mwanuke vyuma mwalinangwile mangana mutwaleho lika kupwa vakushishika.—Yowano 14:26.

12. Munahase kunoneka ngachilihi lwola lwakutanga Mbimbiliya hakumbi hakumbi?

¹² Munahase kunoneka ngachilihi lwola lwakutanga Mbimbiliya hakumbi hakumbi? Munahase kunoneka makumbi amwe muchalumingo  aze namutanganga nakushinganyeka haMbimbiliya chalumingo hichalumingo kweseka nomu vanoneka muShikola yaMulimo waTeokalasi. Kaha hamakumbi eka munahase kunoneka lwola lwakutanga Mikanda yaMujimbu Wamwaza waMateu, naMako, naLuka, naYowano nakushinganyeka havyuma ahanjikile Yesu navize alingilenga. (Wavaka-Loma 10:17; WavaHepeleu 12:2; WaPetulu 1, 2:21) Tuli nawa namukanda uze walumbununa vyuma vyasolokele mukuyoya chaYesu kweseka nomu vyalikavasanyinenga. Ou mukanda naumikafwa munganyale chikuma omu namutanga Mikanda yaMujimbu Wamwaza.—Yowano 14:6.

13, 14. Mwomwo ika chapwila chachilemu kuli etu kutwalaho lika kushinganyeka hali Yehova naYesu, kahechi nachitukafwa tulinge ika?

¹³ Kushinganyekanga hali Yehova naYesu chinahase kukafwa mutu apwenga muka-Kulishitu wakuhya kushipilitu nakuhasa kuzamisa lufwelelo lwenyi. (WavaHepeleu 5:14; 6:1) Mutu uze eji kupwanga nalwola lwalundende lwakushinganyeka hali Kalunga, mukuhita chalwola, nahase kwenyeka usoko wenyi naYehova chipwe vene kumukana. (WavaHepeleu 2:1; 3:12) Yesu atuhuhumwine ngwenyi, nge katweshi kwivwa, chipwe kwitavila Mazu aKalunga “namuchima wamwaza, wamwenemwene,” kaha katweshi kuhasa ‘kuwalamako.’ Oloze natutanguka washi ‘mwomwo yakulizakamina, naluheto, naviseke vyamukuyoya.’—Luka 8:14, 15.

¹⁴ Ngocho tutwalenuho lika kushinganyeka haMbimbiliya nakutulingisa jino tutachikize kanawa Yehova. Echi nachitulingisa tulondezeze chikuma vilinga vyenyi nomu apwa. (Wavaka-Kolinde 2, 3:18) Tunahase kutwalaho lika kulinangula vyavivulu hali Setu wamwilu nakumulondezeza haya myaka yosena. Echi hichuma chachilemu chikupu.—Muka-kwambulula 3:11.

15, 16. (a) Munanganyala ngachilihi hakushinganyeka hali Yehova naYesu? (b) Mwomwo ika lwola lumwe chinahase kupwa chachikalu kushinganyeka, kaha mwomwo ika twatela kutwalaho lika kulinga ngocho?

¹⁵ Kushinganyekanga hali Yehova naYesu nachimikafwa mutwaleho lika kupwa natwima mumuchano. Twima yenu nayikafwa vandumbwenu navatu namuwana mumulimo wamuwande. Nge namushinganyekanga havyuma amilingila Yehova hakutuhana Yesu kupwa ndando yakutusokola, kaha namutwalaho lika kumona usoko wenu naKalunga kupwa waulemu. (Wavaka-Loma 3:24; WaYakova 4:8) Mark, ndumbwetu wakuSouth Africa uze vakashile mukamenga hamyaka yitatu mwomwo yalufwelelo lwenyi, ambile ngwenyi: “Kushinganyeka tunahase kuchifwanyisa kukutambukila vihela vyamwaza. Kushinganyeka havyuma vyakushipilitu cheji kutukafwa tulinangule vyuma vyavihya hali Kalunga ketu Yehova. Lwola lumwe nge ngunahombo chipwe kulizakamina havyuma vyakulutwe, ngweji kutanganga Mbimbiliya nakushinganyeka havisoneka ngunatange. Echi cheji kungulingisanga nguhone kulizakamina.”

¹⁶ Mukaye kano muli vyuma vyavivulu vinahase kututangula, ngocho tunahase kuchiwana kupwa chachikalu kuwana lwola lwakushinganyeka havyuma natutanga muMbimbiliya.  Ndumbwetu Patrick wamuAfrica ambile ngwenyi: “Muvishinganyeka vyami mweji kuzalanga namijimbu yakulisezaseza, yamwaza nayeyi yayipi, yize ngwatela kukekesa hakumbi hakumbi. Omu ngweji kulikekesanga muvishinganyeka, ngweji ‘kulizakaminanga chikuma,’ ngocho ngweji kulombanga kuli Yehova haukalu kana shimbu kanda nguputuke kushinganyeka havyuma nguli nakutanga. Numba tuhu kulinga ngocho cheji kumbatanga chikuma lwola shimbu kanda nguputuke kushinganyeka havyuma vyakushipilitu, oloze ngweji kupandamanga chikuma kuli Yehova. Echi cheji kungulingisanga ngwivwishise kanawa muchano.” (Samu 94:19) Chikupu vene, nge natutanga Mbimbiliya hakumbi hakumbi, kaha natunganyala mujijila jakulisezaseza.—Vilinga 17:11.

17. Uno munahase kuwana ngachilihi lwola lwakushinganyeka?

¹⁷ Vatu vamwe veji kuhindukanga chimenemene mangana vatange, nakushinganyeka, nakulomba. Vamwe veji kulinganga vyuma kana namusana halwola lwakunoka. Pamo enu mweji kuchiwananga kupwa chachashi kutanga Mbimbiliya nachingoloshi chipwe naufuku shimbu kanda musavale. Vamwe vasaka kutanga Mbimbiliya nachimene, kaha nawa shimbu kanda vasavale. (Yoshuwa 1:8) Chuma chachilemu chikuma shina kuzachisa “kanawa lwola lwenu,” kulumbununa nge mwatela kuwana lwola lwakushinganyekanga haMazu aKalunga hakumbi hakumbi.—Wavaka-Efwesu 5:15, 16.

18. Vyuma muka Mbimbiliya yafwelelesa vaze veji kushinganyekanga haMazu aKalunga hakumbi hakumbi nakukavangiza vyuma vanalinangula?

¹⁸ Mbimbiliya yatufwelelesa nge Yehova mwakisula vosena vaze veji kushinganyekanga haMazu enyi nakweseka kukavangiza vyuma vanalinangula. (Tangenu Samu 1:1-3.) Yesu ambile ngwenyi: “Vawahilila shina vaze veji kwivwililanga mazu aKalunga nakuwalamanga.” (Luka 11:28) Chikumanyi, kushinganyekanga haMazu aYehova hakumbi hakumbi nachitukafwa tulinge vyuma vize navineha kavumbi kuli ikiye. Nge natulinga ngocho, kaha Yehova mwatulingisa tupwenga vakuwahilila oholyapwa nakukatuhana kuyoya chahaya myaka yosena mukaye kakahya.—WaYakova 1:25; Kusoloka 1:3.