1. Uno lufwelelo lwalema ngachilihi? (Talenu muvwimbimbi wakulivanga.)

KUTALA mwalihulisaho lyehi ngwenu, ‘Uno Yehova mwakanguyovola halwola lwaluyando lwalunene tahi?’ Kaposetolo Paulu ambile ngwenyi chuma chachilemu twatela kupwa nacho mangana tukayovoke shina lufwelelo. Ambile ngwenyi: “Chakuzeneka lufwelelo, chachikalu kumwivwisa Kalunga kuwaha.” (WavaHepeleu 11:6) Tunahase kumona chuma kana kupwa chachashi, oloze twatela kutachikiza ngwetu “lufwelelo kalweshi kuli vatu vosenako.” (Wavaka-Tesolonyika 2, 3:2) Visoneka kanevi vivali vinatukafwe tumone ovyo chapwila chachilemu kuzamisa lufwelelo lwetu.

2, 3. (a) Mwomwo ika lufwelelo lwetu lwapwila lwalulemu? (b) Vishina muka natushimutwila?

² Kaposetolo Petulu ahanjikile vyalufwelelo “luze vaneseka lyehi.” (Tangenu WaPetulu 1, 1:7.) Hakuwana nge lwola lwaluyando lwalunene lunapandama kwakamwihi, ngocho tufwilenu kupwa “tuvatu vaze vatwama nalufwelelo luze lweji kulwilanga myono yetu.” (WavaHepeleu 10:39) Shikaho, twatela kukilikita mangana tuzamise lufwelelo lwetu. Tuli nakufwila kupwa havatu vaze navakakisula omu Yesu Kulishitu, Mwangana wetu navakamusolola. Ngana mwalunga uze alombele Yesu amuhane lufwelelo lwalunene, nayetu  nawa tunahase kwamba ngwetu: “Ngukafwe oho ngunazeneka lufwelelo!” (Mako 9:24) Tunahase nawa kuhanjika ngana muze vahanjikile vaposetolo ngwavo: “Tukafwe tupwenga nalufwelelo lwalunene.”—Luka 17:5.

³ Muchihande chino, natushimutwila vishina evi: mwakuzamishila lufwelelo lwetu, omu tunahase kusolola nge tuli nalufwelelo lwakukola, novyo twatela kufwelela ngwetu Kalunga mwatukumbulula nge natumulomba atuhane lufwelelo lwalunene.

4. Vyakutalilaho muka vize vinahase kutukafwa tuzamise lufwelelo lwetu?

⁴ Hakuwana nge lufwelelo lwapwa lwalulemu, ngocho Yehova atuhana vyakutalilaho vyavivulu muMbimbiliya vyavatu vaze vapwile nalufwelelo. Vyakutalilaho kana “vavisonekelele kutunangula etu.” (Wavaka-Loma 15:4) Vyakutalilaho vyavatu vakushikulu, vaApalahama, naSala, naIsaka, naYakova, naMose, naLahave, naNgiteyone, naMbalake, navatu veka vavavulu vinahase kutukafwa tuzamise lufwelelo lwetu. (WavaHepeleu 11:32-35) Namakumbi ano nawa tuli navyakutalilaho vyamwaza vyavandumbwetu vaze vanasololanga lufwelelo. *—Talenu kwinyikila chamwishi.

5. Uno Elija asolwele ngachilihi nge afwelelele chikuma Yehova, kaha chihula muka twatela kulihulisa?

⁵ MuMbimbiliya natuwanamo chakutalilaho chakapolofweto Elija. Omu namushinganyeka hachakutalilaho chenyi, namuwana jijila jitanu jize asolwelelemo nge afwelelele chikuma Yehova. (1) Omu Elija alwezele Mwangana Ahave ngwenyi Yehova mwaneha changa, ahanjikile mazu aze asolwele nge apwile chikupu nalufwelelo, ambile ngwenyi: “Omu ayoya Yehova tu, ou Kalunga kaIsalele, ou ngweji kuzachilanga, kakweshi kupwa lyume chipwe vula mumyaka eyi nayizahoko.” (Vamyangana 1, 17:1) (2) Elija afwelelele ngwenyi Yehova mwahana ikiye navatu veka vyuma vyapwile nakusakiwa kuli vakiko halwola luze lwachanga. (Vamyangana 1, 17:4, 5, 13, 14) (3) Elija nawa afwelelele ngwenyi Yehova mwasangula mwana walunga wayauze tuluwe. (Vamyangana 1, 17:21) (4) Afwelelele chikupu ngwenyi Yehova mwaneha kakahya nakwocha wana wenyi haPili Kalamele. (Vamyangana 1, 18:24, 37) (5) Shimbu kanda navula yinoke, Elija alwezele Ahave ngwenyi: “Kanduka, ukalye nakunwa, mwomwo kuli nakwivwakana chivumo chavula yayinene.” (Vamyangana 1, 18:41) Omu tunakumisa kushimutwila havyakutalilaho kana, tulihulisenu ngwetu, ‘Uno lufwelelo lwami lwapwa lwakukola ngana luze apwile nalwo Elija tahi?’

6. Vyuma muka twatela kulomba kuli Yehova vize navitukafwa tuzamise lufwelelo lwetu?

⁶ Hakuwana nge katweshi kuhasa kuzamisa lufwelelo lwetu etu vaveneko, ngocho twatela kulomba Kalunga atuhane shipilitu yenyi yajila. Mwomwo ika? Mwomwo lufwelelo lwapwa hamihako yashipilitu yajila. (Wavaka-Ngalesha 5:22) Nge natukavangiza mazu aYesu akulomba  shipilitu yajila, kaha natupwa namangana. Yesu ashika ngwenyi Yehova mwahana “shipilitu yajila kuli vaze navamulombayo.”—Luka 11:13.

7. Lumbununenu omu tunahase kuzamisa lufwelelo lwetu.

⁷ Nge natupwa nalufwelelo lwakukola muli Kalunga, kaha twatela kulama kanawa lufwelelo kana. Lufwelelo tunahase kulwesekesa kukakahya. Nge tunawiki kakahya, kaha mulangi weji kupwanga nangolo chikuma. Kachi nge katweshi kusambiza kaze kakahyako, kaha kanahase kujima nakupwa uto kaha. Oloze nge natusambiza lika kaze kakahya, kaha kakeshi kujimako, nakatwalaho lika kumunyika. Chochimwe nawa nalufwelelo lwetu. Nge natutwalaho lika kutanga nakulinangula Mazu aKalunga hakumbi hakumbi, kaha natuzanga chikuma Mbimbiliya nakuzanga nawa chikuma Yehova. Nge natulinga ngocho, kaha natuzamisa lika lufwelelo lwetu nakululama.

8. Vyuma muka navimikafwa muzamise lufwelelo lwenu nakululama?

⁸ Kamwatela kusuuluka kaha navyuma vize mwalinangwile shimbu kanda vamimbapachiseko. (WavaHepeleu 6:1, 2) Chakutalilaho, kulinangula upolofweto wamuMbimbiliya uze unatesamo lyehi nachimikafwa muzamise lufwelelo lwenu nakululama. Munahase nawa kuzachisa Mazu aKalunga mangana mumone nge lufwelelo lwenu lwakukola.—Tangenu WaYakova 1:25; 2:24, 26.

9, 10. Uno lufwelelo lwetu veji kuluzamisanga ngachilihi (a) kumasepa vamwaza? (b) kukukunguluka? (c) nahakwambulula?

⁹ Kaposetolo Paulu ambile ngwenyi vaka-Kulishitu vanahase “kulikolezeza, mutu himutu nalufwelelo lwamukwavo.” (Wavaka-Loma 1:12) Uno echi chalumbununa ika? Nge natuwana lwola lwakupwa navandumbwetu, kaha tunahase kulikolezeza nakuzamisa lufwelelo lwetu. Chuma kana cheji kutesangamo chikumanyi nge natupwanga navatu vaze “vaneseka lyehi” lufwelelo lwavo. (WaYakova 1:3) Masepa vavapi veji kwenyekanga lufwelelo lwetu, oloze masepa vamwaza veji kuzamisanga lufwelelo lwetu. (Wavaka-Kolinde 1, 15:33) Shikaho vatukolezeza kupwanga kukukunguluka lwola lwosena. Kukukunguluka kukiko tunahase kutwalaho lika ‘kulikolezeza navakwetu.’ (Tangenu WavaHepeleu 10:24, 25.) Kaha nawa jindongi veji kutunangulanga kukukunguluka jikiko jeji kutukafwanga tuzamise lufwelelo lwetu. Mbimbiliya yamba ngwayo “lufwelelo lweji kwizanga havyuma nevu mutu.” (Wavaka-Loma 10:17) Ngocho lihulisenu ngwenu, ‘Uno ngwamona kukunguluka kupwa chachilemu mukuyoya chami tahi?’

¹⁰ Kwambulila vatu mujimbu wamwaza wamuMbimbiliya nakuvanangula nachikiko cheji kutulingisanga tuzamise lufwelelo lwetu. Ngana muze valingile vaka-Kulishitu vakulivanga, nayetu nawa tunahase kulinangula kufwelela Yehova nakuhanjika mujila yakumika hakala lwola.—Vilinga 4:17-20; 13:46.

11. Mwomwo ika Kaleve naYoshuwa vapwile nalufwelelo lwakukola, kaha tunahase kuvalondezeza ngachilihi?

¹¹ Tweji kufwelelanga chikuma Yehova nge tunamono omu eji kutukafwanga nomu eji kukumbululanga kulomba chetu. Omu mukiko chapwile nakuli Kaleve naYoshuwa.  Vafwelelele chikuma Yehova omu vayile nakusondwesa Lifuchi lyaLushiko. Mukuhita chalwola, vazamishile lufwelelo lwavo hakumona omu Yehova avakafwilenga. Echi chikiko chalingishile Yoshuwa alwezele vaIsalele ngwenyi: “Hamazu osena aze ashikile Yehova Kalunga kenu, kahalihonene lizu numba limweko.” Ambile cheka ngwenyi: “Ngocho mwivwenunga Yehova woma, muzachilenunga mukulonga namukashishi.” Kaha nawa ngwenyi: “Ami navava vakuzuvo yami natuzachilanga Yehova.” (Yoshuwa 23:14; 24:14, 15) Nge natufwelela Yehova nakumona omu natukafwenga, kaha lufwelelo lwetu naluzama chikuma.—Samu 34:8.

12. Uno tunahase kusolola ngachilihi nge twatwama nalufwelelo lwakukola?

¹² Tweji kusololanga ngachilihi nge twatwama nalufwelelo lwakukola? Kambaji Yakova ambile ngwenyi: “Nangukulweza lufwelelo lwami havilinga vyami.” (WaYakova 2:18) Vilinga vyetu vikiko vyeji kusololanga nge twatwama nalufwelelo lwakukola. Tuchitalenu jino.

13. Uno tweji kusololanga ngachilihi nge twatwama nalufwelelo hakwambulula mujimbu wamwaza?

¹³ Kwazana mumulimo wakwambulula hijila yamwaza yakusolwelamo nge tuli nalufwelelo. Mwomwo ika? Mwomwo kwambulila vatu cheji kusololanga nge twafwelela ngwetu kukuma chinapandama kwakamwihi, kaha nawa ngwetu “kacheshi kukakotokelako.” (Hambakuke 2:3) Hakusaka mangana tutachikize nge lufwelelo lwetu lwakukola, twatela kulihulisa ngwetu: ‘Uno mulimo wakwambulula ngwaumona kupwa waulemu tahi? Kutala nguli nakukilikita mangana ngulwezeko vatu vyaKalunga nyi? Uno ngweji kuwananga jijila jakutohweselamo mulimo wami wakuzachila Yehova tahi?’ (Wavaka-Kolinde 2, 13:5) Tusololenu nge twatwama nalufwelelo lwakukola ‘hakuhanjikanga hatoma nakanwa mangana tuwane ulwilo,’ kulumbununa kwambululanga mujimbu wamwaza.—Tangenu Wavaka-Loma 10:10.

14, 15. (a) Tunahase kusolola ngachilihi nge tuli nalufwelelo mukuyoya chetu? (b) Hanjikenu chakutalilaho chize chasolola lufwelelo lwakukola.

 ¹⁴ Tweji kusololanga nawa nge twafwelela Yehova hakumika muvyeseko vyamukaye kano vize tweji kumonanga mukuyoya chetu. Nge tuli nakumona ukalu wauvulu wakufwana nge kuviza, kuhomba, kuhutwa, naukalu weka, twatela kufwelela ngwetu Yehova naYesu navatukafwa “halwola lwakutamo.” (WavaHepeleu 4:16) Nge natulomba Yehova atukafwe, kaha natusolola nge twamufwelela chikuma. Yesu ambile ngwenyi tunahase kulomba Yehova atuhane “kulya chetu chize chasakiwa hakumbi hakumbi.” (Luka 11:3) Mijimbu yavatu vamuMbimbiliya yasolola nge Yehova nahase kutuhana vyeshovyo natusaka. Chakutalilaho, omu muIsalele mwapwile changa chachinene, Yehova ahanyine Elija vyakulya nameya akunwa. Mbimbiliya yahanjika ngwayo, “makololo vamunehelelenga mbolo nanyama nachimene nachingoloshi, kaha anwinenga meya amuze mumwanakalwiji.” (Vamyangana 1, 17:3-6) Nayetu nawa twatela kufwelela ngwetu Yehova nahase kutuhana vyuma tuli nakusaka.

¹⁵ Twafwelela ngwetu nge natukavangiza jindongi jamuMbimbiliya, kaha tunahase kuzakama vaze vakuzuvo yetu. Ndumbwetu Rebecca muAsia uze asomboka ahanjikile omu ikiye natanga yenyi vakavangijile mazu ahali Mateu 6:33 naVishimo 10:4. Ambile ngwenyi lunga lyenyi amwene nge milimo apwile nakuzata yahakile usoko wavo naYehova muponde. Ngocho alitwaminyine kuzata yize milimo. Oloze  vapwile navana vawana vaze vatelele kuzakama, ngocho vaputukile kulanjisa vyakulya. Hakukilikita chavo, vapwilenga najimbongo jakutamo jize javakafwile vahase kuzakama vyuma vyapwile nakusakiwa mutanga. Kaha Rebecca ambile ngwenyi: “Twamwene ngwetu Yehova katumbilileko. Twapwilenga navyakulya lwola lwosena.” Kutala nayenu mwamweneko vyuma vyakulifwana navyevi ahichilemo ou ndumbwetu, vize vyazamishile lufwelelo lwenu nyi?

16. Vyuma muka navisoloka nge natufwelela Kalunga?

¹⁶ Twatela kufwelela chikupu ngwetu Yehova mwatukafwa nge natukavangiza vyuma ali nakutulweza. Paulu ahanjikile mazu akapolofweto Hambakuke ngwenyi: “Muka-kwoloka mwayoyanga hakupwa nalufwelelo.” (Wavaka-Ngalesha 3:11; Hambakuke 2:4) Shikaho, twatela kufwelela chikuma mutu Uze nahase kutukafwa. Paulu atwanuna ngwenyi Kalunga ikiye “nahase kulinga vyuma vyakuhambakana chikuma havyuma tunamulombo chipwe tunashinganyeka kweseka nangolo jenyi jize jili nakuzata muli etu.” (Wavaka-Efwesu 3:20) Vangamba jaYehova veji kulinganga kala vyeshovyo vanasake mangana valinge mwaya muchima waKalunga numba tuhu vatachikiza ngwavo kavakupuka mwosenako. Twasakwilila chikuma Kalunga hakupwa nayetu, nahakutukisula.

17. (a) Mujila muka Yesu akumbulwile kulomba chavaposetolo? (b) Mwomwo ika tunahase kufwelela ngwetu Yehova mwatukumbulula nge tunamulombo atuhane lufwelelo lwalunene?

¹⁷ Kweseka navyuma tunashimutwila, tunahase kwivwa ngana muze vevwile vaposetolo omu valombele Yesu ngwavo: “Tukafwe tupwenga nalufwelelo lwalunene.” (Luka 17:5) Yesu akumbulwile vaposetolo jenyi mujila yakulipwila haPendekoseta mumwaka wa 33, omu vavahanyine shipilitu yajila yize yavalingishile vevwishise chikuma vyuma ajina Kalunga. Chuma kana chazamishile lufwelelo lwavo. Vyuma muka vyafuminemo? Vaputukile kwambulula chikuma. (Wavaka-Kolose 1:23) Kutala nayetu vanahase kutukumbulula nge tunalombo vatuhane lufwelelo lwalunene tahi? Yehova atufwelelesa ngwenyi nahase kutukumbulula nge natulomba “kweseka namwaya muchima wenyi.”—WaYowano 1, 5:14.

18. Yehova eji kukisulanga ngachilihi vaze veji kuzamisanga lufwelelo lwavo?

¹⁸ Nge natufwelela chikuma Yehova, kaha mwatwivwila kuwaha. Mwatukumbulula nge natumulomba atuhane lufwelelo lwalunene, kaha lufwelelo lwetu naluzama nakupwa jino tuvatu vatela “Wangana waKalunga.”—Wavaka-Tesolonyika 2, 1:3, 5.