KUFUMA mu 1992, Lizavu lyaKutwaminyina linatongolanga vakulwane vakuhya kushipilitu mangana vakafwe jikomiti jamulizavu kana kutesamo mulimo wavo. * (Talenu kwinyikila chamwishi.) Ava vaka-kukafwa vaze vapwa vamulizavu ‘lyamikoko veka’ veji kukundwizanga chikuma Lizavu lyaKutwaminyina. (Yowano 10:16) Ava vandumbwetu veji kuliwananga chalumingo hichalumingo mujikomiti javo. Vatwama namulimo wakushimutwila havyuma vili nakusakiwa mujikomiti javo nakuwana mwakulingila. Chipwe ngocho, vandumbwetu vamuLizavu lyaKutwaminyina vakiko veji kukukululanga vihande vyosena nakulikasa mwakulingila. Oloze ava vandumbwetu vaka-kuvakafwa veji kukavangizanga vyuma kana nakumona chikupu ngwavo vinatesamo. Ava vandumbwetu vapwa vakulisuula kuzata kala milimo navavahana. Veji kuyanga hamwe navandumbwetu vamuLizavu lyaKutwaminyina kukukunguluka changalila chakulipwila nachechi chamafuchi amavulu. Vanahase nawa kuvatuma kutambukila jiofesi jamitango kupwa vaka-kwimanyinako chikota chetu.

Ndumbwetu umwe uze napunga muka-kukafwa Lizavu lyaKutwaminyina kufuma vene mu 1992 ambile ngwenyi, “Nge nanguzata mulimo wami, kaha vandumbwetu vamuLizavu lyaKutwaminyina veji kuzakamanga chikuma vyuma vyakushipilitu.” Kaha ndumbwetu weka uze nakafwenga Lizavu lyaKutwaminyina hamyaka 20 ambile ngwenyi, “Kuzata mulimo kanou hikutokwa chachinene chikuma kuhambakana kala milimo yeka ngunazatenga.”

Vandumbwetu vamuLizavu lyaKutwaminyina vanahane ava vandumbwetu vakushishika milimo yayivulu, kaha veji kuvasakwililanga chikuma hamilimo veji kukilikitanga. Shikaho, tuvosena “[tu]vumbikenunga vatu vangachize.”—Wavaka-Fwilipi 2:29.