1, 2. (a) Vyuma muka veji kulizakaminanga visemi vamwe vaze vatwama navana vavakweze? (b) Uno vakweze vanahase kunganyala ngachilihi mumyaka yavo yaukweze?

VISEMI veji kuwahililanga chikuma nge vana vavo vanavambapachisa. Ndumbwetu Berenice atwama navana vawana, kaha vosena vavambapachishile shimbu kanda vapwenga namyaka yakusemuka 14. Ambile ngwenyi: “Chuma kana chatwivwishile kuwaha chikuma. Twawahililile hakutachikiza ngwetu vana vetu vasakile kuzachila Yehova. Chipwe ngocho, twatachikijile nawa ngwetu vana vetu navalitalasana naukalu wauvulu hakupwa vakweze.” Nayenu nawa munahase kulizakamina hachuma kana kachi nge vana venu kalinwomu vapwenga vakweze.

² Mutu umwe uze alinangula omu veji kushinganyekanga vanyike ambile ngwenyi, myaka yaukweze yapwa yayikalu kuli visemi nakuli vana. Chipwe ngocho visemi kavatela kushinganyeka nge vana vavo vakuzunguma chipwe vakuhona manganako. Ou mutu ambile nawa ngwenyi, vakweze vatwama nauhashi wakulinga vyuma, nakushinganyeka chikuma, kaha kakavulu vasaka kushimutwila namasepa javo. Ngocho, vana venu vanahase kutunga usepa wamwaza  naYehova shimbu vachili vakweze, ngana muze alingile Yesu. (Tangenu Luka 2:52.) Vanahase nawa kuhotola uhashi wavo wakwambulula nakufwila kuzachila chikuma Kalunga. Kaha nawa vanahase kulisakwila vavene vyuma vatela kulinga, vyakufwana nge kulihana kuli Yehova nakumwononoka. Uno vyuma muka mwatela kulinga enu visemi mangana munangule vana venu vavakweze vazachile Yehova? Munahase kulinangula kuchakutalilaho chaYesu chize asolwele hakunangula tumbaji twenyi mujila yazangi, nakulinyisa, nakunangakana.

3. Uno vaposetolo vatachikijile ngachilihi ngwavo Yesu apwile sepa lyavo?

³ Yesu kapwile kaha Mwata wavaposetolo jenyiko, oloze apwile nawa sepa lyavo. (Tangenu Yowano 15:15.) Kumyaka yakunyima, mwata kashimutwililenga kakavulu navandungo jenyi nakuvalweza vyuma apwile nakushinganyeka navize apwile nakujinako. Oloze Yesu kamwenenga vaposetolo jenyi kupwa nge vandungoko. Avazangile chikuma nakushimutwila navo. Awahilililenga kuvalweza vyuma apwile nakushinganyeka navize ajinyinenga, kaha nawa avevwilililenga omu vamulwezelenga vyuma vashinganyekelenga. (Mako 6:30-32) Kushimutwila kanechi chalingishile Yesu navaposetolo jenyi vapwenga nausepa wakukola, kaha chakafwile vaposetolo valizange kumulimo wavo uze navakazata kulutwe.

4. Enu visemi, mujila muka munahase kulikata usepa navana venu? (Talenu muvwimbimbi wakulivanga.)

⁴ Numba tuhu enu visemi mwatwama nangolo hali vana venu, oloze munahase kupwa nawa mumasepa javo. Masepa veji kushimutwilanga halwola lwaluvulu. Ngocho nayenu nawa munahase kukehesako lwola lwakulinga vyuma vimwe mangana muhase kupwa nalwola lwaluvulu lwakushimutwila navana venu. Mwatela kushinganyekanga hachuma kana nakulomba kuli Kalunga mangana amikafwe. Masepa nawa veji kulivwisanga kuwaha kulinga vyuma vyovimwe. Ngocho mwatela kutachikiza kanawa vyuma vasaka vana venu vyakufwana nge myaso, najivindiyo, nakuhema chakulitapa. Kaha esekenu kulivwisa kuwaha vyuma vize veji kulivwisanga kuwaha. Ndumbwetu Ilaria wamulifuchi lyaItaly ambile ngwenyi: “Visemi jami vazangile kwivwililanga kumyaso yize ngwazangilenga. Tata apwilenga sepa lyami chikuma, kaha ngwachiwanyinenga kupwa chachashi kumulweza kala ukalu ngwapwilenga nawo.” Kamweshi kulumbilisa ngolo jenu jakupwa muvisemi hakulikata usepa navana venu, nakuvakafwa vapwenga masepa jaYehovako. (Samu 25:14) Echi nachilingisa vana venu vatachikize ngwavo mwavazanga nakuvavumbika chikuma, kaha navachiwana kupwa chachashi kumilweza kala ukalu navapwa nawo.

5. Uno tumbaji twaYesu vatelele kupwa ngachilihi vakuwahilila hakuzata mulimo waYehova?

⁵ Yesu atachikijile ngwenyi, nge tumbaji twenyi navazachila Yehova natwima nakwambulula mujimbu wamwaza, kaha navapwa vakuwahilila. Ngocho avakolezezele vakilikite mumulimo wavo wakwambulula nakuvafwelelesa ngwenyi mwavakafwanga.—Mateu 28:19, 20.

6, 7. Mujila muka mweji kusolwelangamo nge mwazanga vana venu vazachile Yehova?

⁶ Enu visemi mwasaka vana venu vapandame lika kuli Yehova. Ngocho Yehova ali nakusaka munangule vana venu nakuvazangamisa, mwomwo amitavisa kulinga ngocho. (Wavaka-Efwesu 6:4) Shikaho mwatela kunangula vana venu lwola lwosena. Achishinganyekenu hachuma kanechi: Mwasaka vana venu vatange shikola mwomwo mwatachikiza ngwenu chapwa chachilemu kulinga ngocho, kaha mwasaka valivwise kuwaha kulinangula vyuma vyavihya. Chochimwe nawa, mwatela kuvakafwa vapwenganga kukukunguluka chosena, nachechi chachihanda,  nakupwanga nawa kuchilongesa chakulemesa Kalunga mwatanga. Mwomwo vyuma navalinangula kuli Yehova vinahase kuvayovola. Shikaho mwatela kukafwa vana venu valivwise kuwaha kulinangula vyaYehova, nakutachikiza ngwavo, nahase kuvanangula vapwenga namangana amwenemwene. (Vishimo 24:14) Mwatela nawa kuvanangula kuyanga mumulimo wamuwande shimbu yosena. Ngocho londezezenunga chakutalilaho chaYesu hakuvakafwa valivwise kuwaha kunangula vatu Mazu aKalunga.

⁷ Uno kuzachilanga Yehova kuhichila mukulinangula Mbimbiliya, nakukungulukanga, nakuyanga mumulimo wamuwande chinahase kukafwa ngachilihi vakweze? Erin wamulifuchi lyaSouth Africa ambile ngwenyi: “Etu vana tweji kuyayavalanga chikuma hakulinangula Mbimbiliya, nakuyanga kukukunguluka namumulimo wamuwande. Shimbu jimwe tweji kunehanga liwayanga mangana tutangule chilongesa chatanga. Chipwe ngocho, visemi jetu kavazeyeleko.” Erin asakwililile chikuma visemi jenyi mwomwo vamukafwile atachikize kulema chavyuma kana. Ngocho makumbi ano eji kulihakilangako mangana apwenganga kukukunguluka lwola lwosena nakuyanga mumulimo wamuwande.

8. (a) Uno Yesu asolwele ngachilihi nge apwile wakulinyisa? (b) Kulinyisa chaYesu chakafwile ngachilihi tumbaji twenyi?

⁸ Numba tuhu Yesu apwile wakukupuka mwosena, oloze alinyishile nakulweza tumbaji twenyi ngwenyi asakile Yehova amukafwe. (Tangenu Yowano 5:19.) Uno echi chalingishile tumbaji twenyi vahone kumuhana kavumbi tahi? Nduma. Vamufwelelele chikuma mwomwo vatachikijile ngwavo apendaminyine hali Yehova. Kutwala muze navakiko valinangwile kupwa vakulinyisa.—Vilinga 3:12, 13, 16.

9. Uno kwitavila tutenga twenu cheji kukafwanga ngachilihi vana venu?

⁹ Etu katwakupuka ngana mwaYesuko, shimbu jimwe tweji kulimbenjanga. Shikaho pwenunga vakulinyisa, nakwijiva ngwenu kuli vyuma vimwe vize kamweshi kuhasa kulingako, kaha nawa mwatela kwitavila tutenga twenu. (WaYowano 1, 1:8) Echi nachilingisa vana venu navakiko valinangule kwitavila tutenga twavo nakumivumbika chikuma. Nyi ngachilihi enu, uno iya mweji kuhananga chikuma kavumbi? Uno mweji kuhana kavumbi mukulwane wamilimo uze eji kwitavilanga tutenga twenyi nge nalimbenje tahi, nyi uze keshi kwitavila tutenga twenyiko? Ndumbwetu Rosemary, uze atwama navana vatatu ambile ngwenyi, ikiye nalunga lyenyi vetavililenga tutenga twavo. Ambile cheka ngwenyi: “Echi chalingishile vana vetu vapwenga vakukasunuka kutulweza kala ukalu vapwilenga nawo.” Kaha nawa ngwenyi: “Twanangwile vana vetu vatachikize vyuma navivakafwa vahase kukumisa ukalu wavo. Kala lwola vasakilenga kuvakafwa, twavalwezelenga vatange mikanda yetu yize yahanjika haMbimbiliya, kaha twalombelenga navo hamwe.”

10. Yesu asolwele ngachilihi nge apwile wakulinyisa hakulweza tumbaji twenyi vyuma vatelele kulinga?

¹⁰ Yesu apwile nangolo jakulweza tumbaji twenyi vyuma vatelele kulinga. Hakuwana nge apwile wakulinyisa ngocho avalwezelenga ovyo vatelelele kulinga vyuma kana. Chakutalilaho kavalwezele kaha kutondatonda Wangana waKalunga nakwoloka chenyiko,  oloze ambile nawa ngwenyi: “Kaha evi vyuma vikwavo vyosena navakamihanavyo.” Kaha nawa omu avalwezele valitwamine kusopesanga vakwavo, ambile ngwenyi: “Kuchina nayenu navakamisopesa, mwomwo kusopesa chize muli nakusopesanga vakwenu, chikiko navakamisopesa nayenu nawa.”—Mateu 6:31–7:2.

11. Uno munahase kukafwa ngachilihi vana venu vavakweze hakuvalumbunwina ovyo chawahila kulinga vyuma munavalweze?

¹¹ Wanenu lwola lwamwaza lwakulumbunwina vana venu ovyo munavalwezela kulinga vyuma kana. Nge munavalumbunwina kanawa vyuma kana, kaha nachipwa chachashi kuli vakiko kwononoka. Ndumbwetu Barry uze nalele vana venyi vawana ambile ngwenyi: “Nge namulumbunwina vana venu vavakweze ovyo vatela kulingila vyuma kana, kaha navamifwelela chikuma.” Vana venu vavakweze navamona ngwavo kamwavalwezele kulinga chuma kana mwomwo mwatwama nangolo jakulinga ngochoko, oloze mwomwo mwavazanga chikuma. Mwatela kwanuka ngwenu vana venu vavakweze kaveshi hivana vavandendeko. Vanahete hasetoko yakusaka kulisakwila vavene vyakulinga. (Wavaka-Loma 12:1) Ndumbwetu Barry ambile cheka ngwenyi: “Vana vavakweze vatela kulinangula kusakula kanawa vyuma vyakulinga, vize nawa vyapwa vyamangana.” (Samu 119:34) Ngocho linyisenu nakulumbunwina vana venu ovyo vinamilingisa muvalweze kulinga chuma kana. Echi nachilingisa vana venu valisakwile vavene vyuma vatela kulinga, nakutachikiza ngwavo mwavavumbika nakuvamona ngwenu vanakolo jino.

12. Hakuwana nge Yesu apwile wakunangakana, akafwile ngachilihi Petulu?

¹² Yesu apwile wakunangakana, kaha nawa evwishishilenga kanawa vyuma vasakilenga tumbaji twenyi nakuvakafwa. Chakutalilaho, omu Yesu alwezele tumbaji twenyi ngwenyi navamujiha, Petulu amulwezele alitetele ivene. Yesu atachikijile ngwenyi Petulu amuzangile chikuma, kaha atachikijile nawa ngwenyi Petulu apwile navishinganyeka vyakuhenga. Uno Yesu akafwile ngachilihi Petulu natumbaji vakwavo? Chatete, olwele Petulu. Kufumaho, Yesu alumbunwine vyuma navisoloka kuli vaze navakana kulinga mwaya muchima waYehova. Ambile nawa ngwenyi, Yehova mwakafweta vosena vaze kavalizanga kaha vaveneko. (Mateu 16:21-27) Petulu apwile jino navishinganyeka vyakwoloka.—WaPetulu 1, 2:20, 21.

13, 14. (a) Vyuma muka vinahase kusolola nge vana venu vavakweze vali nakusakiwa kuzamisa lufwelelo lwavo? (b) Munahase kutachikiza ngachilihi nge vana venu vali nakusakiwa kuvakafwa?

¹³ Lombenu kuli Yehova amikafwe mupwenga vakunangakana mangana muhase kutachikiza vyuma vali nakusaka vana venu. (Samu 32:8) Pamo vanahase kuhona kupwa vakuwahilila ngana muze vapwilenga, chipwe kuhanjika vyuma vyakuhenga hali vandumbwetu. Pamo munahase nawa kushinganyeka ngwenu kuli vyuma vimwe vize vanahono kumilweza. Kanda namushinganyeka hahaze vene ngwenu vana venu vanakulinga vyuma vyavipi kupengeko. * (Talenu kwinyikila chamwishi.) Oloze kamwatela kuliula ukalu vali nawo chipwe kushinganyeka ngwenu naulikumina uveneko. Enu mwatela kuvakafwa vazamise lufwelelo lwavo.

¹⁴ Hakusaka mangana mutachikize mwakukafwila vana venu vavakweze, vahulisenu vihula mujila yamwaza, kaha nawa yakavumbi. Echi chinafwane nge kuswita meya mulishima. Nge namuwaswita washiwashi, kaha meya amwe anahase kumwangala. Chochimwe nawa, nge namulusuka kuhulisa vana venu vihula chipwe kuvashinjila vahanjike, kaha kaveshi kumilweza  vyuma vali nakushinganyekako. (Tangenu Vishimo 20:5.) Ilaria eji kwanukanga ngwenyi omu apwile mukweze asakilenga kushikamanga chikuma navakwavo vaka-shikola numba tuhu atachikijile ngwenyi chuma kana chapwile chakuhenga. Chipwe ngocho, visemi jenyi vatachikijile ngwavo nalizakamina havyuma vimwe. Ilaria ambile ngwenyi: “Ufuku umwe, visemi vamwene ngwavo ngwahombele, ngocho vanguhulishile nguvalweze ukalu ngwapwile nawo. Ngwalilile chikuma nakuputuka kuvalumbunwina vyuma vyanguhombesele mangana vangukafwe. Kufumaho, vangupakachile mukasamba nakungulweza ngwavo vatachikijile omu ngwapwile nakwivwa, kaha vangufwelelesele ngwavo navangukafwa.” Hahaze vene visemi jenyi vamukafwile atunge masepa vamwaza muchikungulwilo.

15. Jila muka yikwavo yize Yesu asolwelemo nge apwile wakunangakana?

¹⁵ Yesu apwile nawa wakunangakana hakutachikiza vilinga vyamwaza vapwile navyo tumbaji twenyi. Chakutalilaho, omu Natanyele evwile ngwavo Yesu nafumu kuNazaleta, ambile ngwenyi: “Kutala kuNazaleta kunahase kufuma chuma chimwe chamwaza numba?” (Yowano 1:46) Nge kumwapwile halwola kana, kutala nayenu kachi mwashinganyekele nge Natanyele apwile namuchima waupi, wakutala vatu kumeso, chipwe wakuhona lufwelelo nyi? Omu keshi mukiko ashinganyekele Yesuko. Apwile wakunangakana, kaha atachikijile ngwenyi Natanyele apwile nakuhanjika muchano, ngocho Yesu ambile ngwenyi: “Muli ou kaIsalele chikupu vene kamweshi makuliko.” (Yowano 1:47) Yesu apwile nauhashi wakutachikiza vyuma vyapwile mumichima yavatu, kaha azachishile uhashi kana mangana ejive vilinga vyamwaza vyavatu.

16. Munahase kukafwa ngachilihi vana venu vazovoloke?

¹⁶ Numba tuhu kamweshi kuhasa kutachikiza vyuma vanakushinganyeka vatu ngana mwaYesuko, oloze nayenu nawa munahase kupwa vakunangakana. Yehova nahase kumikafwa mutachikize vilinga vyamwaza vatwama navyo vana venu. Numba tuhu vana venu navamivwisa kupihya, oloze kanda namwamba ngwenu vavapi chipwe ngwenu vakuhukako. Kanda  kuvashinganyekela vyuma kanako. Mwatela kuvalweza ngwenu mwatachikiza vilinga vyavo vyamwaza, kaha nawa mwejiva ngwenu vafwila kulinga vyuma vyakwoloka. Kekesenu vyuma veji kulinganga hakusaka vazovoloke, kaha vasangejekenu. Vakafwenu vapwenga navilinga vyamwaza hakuvahana milimo yayivulu nge chinahase. Omu mukiko alingile Yesu kuli tumbaji twenyi. Omu mwahichile mwaka umwe nachimbwa kufuma haze alimwene naNatanyele (uze vavulukilenga nawa ngwavo MbalaTolomeu), Yesu amuhanyine mulimo waulemu. Ahanyine Natanyele mulimo wakupwa kaposetolo, kaha Natanyele auzachile nakashishi. (Luka 6:13, 14; Vilinga 1:13, 14) Muchishishisa chakulingisa vana venu vevwenga nge navyuma vyamwaza veji kulinganga vene vyauchi, oloze enu vasangejekenu nakuvakolezeza. Valingisenu vevwenga nge, vanahase kumivwisa enu naYehova kuwaha nakuhasa kuzachisa uhashi wavo vazachile Yehova.

17, 18. Nganyo muka yatwama hakunangula vana venu vavakweze vazachila lika Yehova?

¹⁷ Nayenu munahase kwivwa ngana muze evwile kaposetolo Paulu. Alizakaminyine chikuma havatu vaze amwene nge hivana venyi. Ava hivatu vaze akafwile valinangule vyaYehova, kaha avazangile chikuma. Shikaho evwile kupihya chikuma hakwijiva nge vamwe hali ava valitwaminyine kuzachila Yehova. (Wavaka-Kolinde 1, 4:15; Wavaka-Kolinde 2, 2:4) Ndumbwetu Victor uze atwama navana vatatu ambile ngwenyi: “Myaka yaukweze yapwile yayikalu chikuma. Chipwe ngocho, lwola lwamwaza twawahilililenga lwalingishile tuvulyame ukalu uze twamwenenga. Yehova atukafwile tulivwise kuwaha usepa twatungile navana vetu.”

¹⁸ Enu visemi, mweji kuzatanga nangolo mangana munangule vana venu mwomwo mwavazanga chikuma. Shikaho twalenuho lika kulinga ngocho. Achishinganyekenu ocho kuwaha namukevwa hakumona vana venu vanasakula kuzachila Kalunga nakutwalaho lika kumuzachila nakashishi!—WaYowano 3, 4.