Mukanda waYoshuwa 6:10-15, 20 wasolola nge maswalale javaIsalele vajingulukilenga nganda yaYeliko kamwe halikumbi hamakumbi 6. Oloze halikumbi lyakusokesa 7, vajingulukile nganda kana mapapa 7. Kaha Kalunga apuzwile kembwe yakukola yaYeliko, kaha vaIsalele vatambwile nganda kana. Kutala vaka-kuvumbwojola vanawane vyuma vimwe vize vyasolola nge Yeliko vayinongesele hakatando kakandende, ngana muze yahanjika Mbimbiliya tahi?

Kushikulu, nganda vayihakilenga muchingombela hakuyijingilika kumaswalale mangana vayinongese. Nge maswalale vanajingilika nganda halwola lwalusuku, kaha vatu munganda kana valilenga vyakulya vize vatulikilenga. Omu maswalale vatambwilenga nganda, vambachilenga vyuma vyosena vasakilenga, kuhakilako vene navyakulya vyasalileho. Echi chikiko chalingisa vaka-kuvumbwojola vawane kaha vyakulya vyavindende mujinganda jaPaleshitane jize vatambwilenga mujila kaneyi. Oloze omu keshi mukiko chapwile hakunongesa nganda yaYelikoko. Mukanda umwe wamba ngwawo: “Vyuma vyavivulu vawanyine hakunongesa nganda kana shina jimbuto jamanona navyuma vyakutenga naunonga.” (Biblical Archaeology Review) Ou mukanda wambile cheka ngwawo: “Kakavulu kavawanyinenga vyakulya vyavivulu nganako.”

Mbimbiliya yamba ngwayo, vaIsalele kavambachile vyakulya muYelikoko mwomwo Yehova avakanyishile kulinga ngocho. (Yoshuwa 6:17, 18) Yamba nawa ngwayo, vaIsalele valukukile nganda yaYeliko mungonde yachishika, omu yakumine ngonde yakwaha. Kaha halwola kana, kwapwile jimbuto jajivulu chikuma. (Yoshuwa 3:15-17; 5:10) Hakuwana nge muYeliko mwapwile vyakulya vyavivulu chikuma hanyima yakuyilukuka, echi chasolola hatoma nge vayilukukile hakatando kakandende kaha, kweseka nomu yahanjika Mbimbiliya.