1. Vyuma muka alingile Manowa omu vamulwezelele ngwavo mwapwa chisemi?

MANOWA napuwenyi vatachikijile ngwavo kaveshi kukapwa navanako. Kaha likumbi limwe kangelo kaYehova alwezele pwevo lyaManowa ngwenyi mwakapwa namwana walunga. Chuma kana chamukomwesele chikuma. Omu ou pwevo alwezele lunga lyenyi Manowa mujimbu kana, naikiye nawa awahililile chikuma. Chipwe ngocho, Manowa ashinganyekelenga omu mwatesamo mulimo waulemu uze amuhanyine Yehova hakupwa chisemi. Uno vatelelele kunangula ngachilihi mwanavo azange Yehova nakumuzachila, okunyi vatu vavavulu muIsalele valingilenga vyuma vyavipi? Manowa alembelelele Yehova atume cheka uze kangelo, ambile ngwenyi: “Mutume cheka uze mutu waKalunga wamuchano ezenga nakutulweza mwakulelela ou mwana mwakasemuka.”—Vaka-kuyula 13:1-8.

2. Vyuma muka mwatela kunangula vana venu, kaha munahase kulinga ngachilihi ngocho? (Talenu nawa lipwata lyakwamba ngwavo, “ Vilongesa Vyenu vyaMbimbiliya Vize Vyapwa Vyavilemu Chikuma.”)

² Nge nayenu mwapwa muvisemi, kaha munatachikiza kanawa omu evwile Manowa. Nayenu mwatwama namulimo wakukafwa vana venu vatachikize Yehova nakumuzanga. (Vishimo 1:8) Halwola  namupwa nachilongesa chakulemesa Kalunga mwatanga, munahase kuvakafwa valinangulenga hali Yehova naMbimbiliya. Kamwatela kukumina kaha hakuvanangula Mbimbiliya chalumingo hichalumingoko. (Tangenu Lushimbi lwamuchivali 6:6-9.) Uno vyuma vyeka muka navimikafwa munangule vana venu vazange Yehova nakumuzachila? Muchihande chino natushimutwila chakutalilaho chaYesu. Numba tuhu kapwile chisemiko, oloze munahase kulinangula kujila yize azachishile hakunangula tumbaji twenyi. Yesu avazangile, kaha nawa apwile wakulinyisa. Apwile nawa wakunangakana, kulumbununa nge atachikijile omu vapwile nakwivwa nakwijiva mwakuvakafwila. Tukekesenu jino omu tunahase kulondezeza Yesu.

3. Uno tumbaji twaYesu vatachikijile ngachilihi ngwavo avazangile chikuma?

³ Yesu alwezelenga tumbaji twenyi ngwenyi, avazanga chikuma. (Tangenu Yowano 15:9.) Kaha nawa ashimutwililenga navo lwola lwosena. (Mako 6:31, 32; Yowano 2:2; 21:12, 13) Yesu kapwile kaha muka-kuvanangulako, oloze apwile nawa sepa lyavo. Ngocho, vatachikijile chikupu ngwavo avazangile chikuma. Vyuma muka munahase kulinangula kuli Yesu?

4. Munahase kusolola ngachilihi nge mwazanga vana venu? (Talenu muvwimbimbi wakulivanga.)

⁴ Enu visemi mwatela kulweza vana venu ngwenu mwavazanga chikuma, kaha nawa vatela kutachikiza ngwavo mwavamona kupwa vavalemu. (Vishimo 4:3; WaChituse 2:4) Ndumbwetu Samuel uze atwama kuAustralia, ambile ngwenyi: “Omu ngwapwile ngukanyike, tata apwilenga nakungutangila Mukanda Wami waVihande VyamuMbimbiliya chingoloshi hichingoloshi. Kaha akumbulwilenga vihula vyami, nakungupakata mukasamba, nakungusweswenya shimbu kanda ngusavale tulo. Changukomwesele chikuma hakutachikiza nge tata kakolelele mutanga yize kavalisolwelelenga zangi mujila kaneyiko. Chipwe ngocho, esekele nangolo jenyi  josena mangana asolole zangi kana kuli ami. Chuma kana changulingishile ngumuzange chikuma, ngwalivwilenga kupwa wakukingiwa, kaha nawa wakusuuluka.” Enu visemi mwatela kukafwa vana venu vevwenganga mwomumwe hakuvalweza ngwenu, “Ngwamizanga.” Mwatela nawa kuvapakatanga mukasamba nakuvasweswenya. Pwenunga nawa nalwola lwakuhanjika navo, nakulya navo, nakuhema navo hamwe.

5, 6. (a) Uno Yesu asolwele ngachilihi nge azangile tumbaji twenyi? (b) Mujila muka munahase kuzangamishilamo vana venu?

⁵ Yesu ambile ngwenyi: “Vosena vaze ngwazanga ngweji kuvahanjikilanga nakuvazangamisa.” * (Talenu kwinyikila chamwishi.) (Kusoloka 3:19) Chakutalilaho, tumbaji twenyi valipulilenga jipami mapapa kakavulu mangana vawane iya apwile wamulemu hakachi kavo. Yesu kaliwile ou ukalu vapwile nawoko, oloze avatalililenga chikoki nakuvahuhumuna mapapa kakavulu. Chipwe ngocho, avasolwelelenga lika likoji nakuvahuhumuna halwola lwakutamo nakuchihela chakutamo.—Mako 9:33-37.

⁶ Hakuwana nge mwazanga chikuma vana venu, ngocho mwatachikiza ngwenu mwatela kuvazangamisa. Lwola lumwe chapwa chakutamo kuvalumbunwina ovyo chapwila chakwoloka, chipwe chakuhenga kulinga vyuma vimwe. Nyi ngachilihi nge vanakane lika kwononoka? (Vishimo 22:15) Linangulenu kuli Yesu. Mwatela kuvatalilila chikoki hakuvazangamisa, nakuvatwaminyina, nakuvanangula, nakuvahuhumuna. Mwatela kusakula lwola nachihela chakutamo hakuvazangamisa mujila yalikoji. Ndumbwetu wapwevo walijina lyaElaine wamulifuchi lyaSouth Africa eji kwanukanga omu visemi jenyi vamuzangamishilenga. Lwola lwosena vamulwezelenga vyuma atelelele kulinga. Nge navamulweza ngwavo navamuzangamisa hakuhona kwononoka, kaha valingilenga vene ngocho. Ambile ngwenyi: “Kavanguzangamishilenga oku vanapihililako, chipwe chakuzeneka kungulumbunwina ovyo vali nakunguzangamishilako.” Ngocho atachikijile ngwenyi visemi jenyi vamuzangile chikuma.

7, 8. (a) Vyuma muka valinangwile tumbaji twaYesu kukulomba chenyi? (b) Uno kulomba chenu chinahase kukafwa ngachilihi vana venu vapendamine hali Kalunga?

⁷ Omu vaka-kole vapwile kwakamwihi nakukwata Yesu mangana vamujihe, Yesu alembelelele Ise ngwenyi: “Apa, Ove Tata, vyuma vyosena vyapwa vyavyashi kuli ove. Fumisa lupasa kanelu kuli ami. Oloze keshi omu munayi kusaka chamiko, shina omu munayi kusaka chove.” * (Talenu kwinyikila chamwishi.) (Mako 14:36) Achishinganyekenu omu vevwile tumbaji twaYesu hakwivwa kulomba chenyi. Vatachikijile ngwavo numba tuhu apwile wakukupuka mwosena oloze alombele kuli Ise amukafwe. Ngocho vatachikijile ngwavo navakiko vatelele kupwa vakulinyisa nakupendamina hali Yehova.

⁸ Vana venu vanahase kulinangula vyavivulu kukulomba chenu. Chipwe ngocho, kamweshi kulomba mangana munangule vana venu  kahako, oloze nge navevwa vyuma muli nakulomba, kaha vanahase kulinangula kupendamina hali Yehova. Kanda namulomba Yehova akafwe vana venu kahako, oloze mulombenunga amikafwe nayenu nawa. Ndumbwetu Ana wamulifuchi lyaBrazil, ambile ngwenyi: “Omu kaka avijilenga, visemi jami valombelenga Yehova avakafwe vomike muukalu kana nakuvahana mangana akusakula kanawa vyuma vyakulinga. Chamokomoko nakala ukalu vamwenenga, vafwelelelenga Yehova avakafwe. Ngocho ngwalinangwile kupendamina chikuma hali Yehova.” Pundu vene, nge vana venu navamivwa muli nakulomba Yehova amikafwe mupwenga vakuhamuka hakwambulila mutu mwalihata nenyi, chipwe hakulomba mukulwane wamilimo amitavise kuya kukukunguluka changalila, kaha navatachikiza ngwavo mweji kupendaminanga hali Yehova, ngocho navakiko navalinga mwomumwe.

9. (a) Uno Yesu anangwile ngachilihi tumbaji twenyi vapwenga vakulinyisa nakuhona kulizanga kaha vavene? (b) Vyuma muka navalinangula vana venu kachi nge namupwa vakulinyisa nakuhona kulizanga kaha enu vavene?

⁹ Yesu alwezele tumbaji twenyi vapwenga vakulinyisa nakuhona kulizanga kaha vavene, ngana muze alingilenga ikiye. (Tangenu Luka 22:27.) Vaposetolo jenyi vamwene ngwavo, Yesu alisuuwile kuzachila Yehova nakukafwa vakwavo, kaha valinangwile kulinga mwomumwe. Nayenu nawa munahase kunangula vana venu hakuvasolwela chakutalilaho chamwaza. Debbie uze apwa chisemi wavana vavali ambile ngwenyi: “Kangwevwilenga lisungu nge lunga lyami ali nakushimutwila navandumbwetu hakupwa kalamako. Ngwatachikijile ngwami kala lwola tanga yetu yasakilenga kushimutwila nenyi, awanyinenga chikupu lwola lwakulinga ngocho.” (WaChimoteu 1, 3:4, 5) Uno chakutalilaho chaDebbie nalunga lyenyi Pranas, chakafwile ngachilihi tanga yavo? Pranas ambile ngwenyi  vana venyi valisuuwilenga lwola lwosena kuzata milimo hakukunguluka chachihanda. Vawahilililenga chikuma, nakutunga masepa vamwaza, kaha vasakilenga kupwa navandumbwavo lwola lwosena. Ngocho vatu vosena mutanga yavo vali jino nakuzachila Yehova mumulimo washimbu yosena. Chikupu vene, nge namupwa vakulinyisa nakuhona kulizanga kaha enu vavene, kaha namunangula vana venu vapwenga namuchima wakufwila kukafwanga vakwavo.

10. Yesu asolwele ngachilihi nge apwile wakunangakana omu vatu vamwe vakuNgalileya vejile nakumutondatonda?

¹⁰ Yesu apwile wakunangakana chikuma. Kahakilenga kaha muchima kuvyuma valingilenga vatuko, oloze nahavyuma vyavalingishile valinge ngocho. Atachikijilenga vyuma vashinganyekelenga mumichima yavo. Chakutalilaho, vatu vamwe muNgalileya vejile nakumutondatonda. (Yowano 6:22-24) Atachikijile ngwenyi vatu kana vejile nakutonda vyakulya keshi nge nakwivwilila kuvyuma anangwilengako. (Yowano 2:25) Yesu atachikijile omu vapwile nakwivwa. Ngocho olwele vishinganyeka vyavo vyakuhenga nakuvalumbunwina kanawa vyuma vatelelele kulinga.—Tangenu Yowano 6:25-27.

11. (a) Munahase kutachikiza ngachilihi omu vana venu vamona mulimo wakwambulula? (b) Mujila muka munahase kukafwilamo vana venu vazange mulimo wakwambulula?

¹¹ Munahase kupwa vakunangakana numba tuhu kamweshi kuhasa kutachikiza vyuma vili mumichima yavana venuko. Chakutalilaho, munahase kufwila kutachikiza omu vana venu vamona mulimo wakwambulula. Lihulisenu ngwenu, ‘Uno vasaka kuya mumulimo wakwambulula lwola lwosena tahi, nyi veji kutalililanga kaha kulwola luze tweji kunokangako chindende nakulya?’ Nge namumona ngwenu vana venu kavazanga chikuma kwambululako, kaha esekenu kuvakafwa vazange mulimo kana. Valwezenu vyuma vimwe vatela kulinga mangana vahake muchima kumulimo kana.

12. (a) Vyuma muka vize Yesu ahuhumwine tumbaji twenyi? (b) Mwomwo ika tumbaji twaYesu vasakiwile kuvahuhumuna?

¹² Jila muka yikwavo yize Yesu asolwelelelemo kunangakana chenyi? Atachikijile ngwenyi kulimbenja mapapa kakavulu cheji kulingisanga mutu alinge shili, kaha ahuhumwine tumbaji twenyi hachuma kanechi. Chakutalilaho, tumbaji twenyi vatachikijile ngwavo chapwa chakuhenga kulinga ujila. Chipwe ngocho, Yesu avahuhumwine valihende kuvyuma vize vinahase kulingisa mutu alinge ujila. Ambile ngwenyi: “Weshowo mwatala lika pwevo nakumwivwila peha, nalingi lyehi nenyi ukoji mumuchima wenyi. Jino kachi nge liso lyove lyachilyo lili nakukuhukanyisa, litombongonyemo nakulimbila.” (Mateu 5:27-29) Tumbaji twaYesu vayoyelenga navaLoma vavilinga vyavipi vaze vazangilenga kumona vatu vahemenenga vyauvumbi nakuzachisa hanjikiso yakasautu. Shikaho Yesu ahuhumwine tumbaji twenyi mujila yalikoji mangana valihende kukala vyuma vize navivahonesa kulinga vyuma vyakwoloka.

13, 14. Munahase kukafwa ngachilihi vana venu valihende kuvyuma vyavipi?

¹³ Hakupwa muvisemi, munahase kuzachisa kunangakana chenu mangana mukinge vana venu valihende kukulinga vyuma vize navivwisa Yehova kupihya. Chaluvinda, navanyike vavandende makumbi ano veji kutalanga mivwimbimbi yauselesele navyuma vyeka vyavipi. Shikaho mwatela kulweza vana venu ngwenu chapwa chakuhenga kutala vyuma vyavipi. Oloze kuli vyuma vyeka vize mwatela kulinga mangana mukinge vana venu. Lihulisenu ngwenu: ‘Uno vana vami vatachikiza ovyo chapwila chakuhenga kutala mivwimbimbi yauselesele  tahi? Vyuma muka navivalingisa vasake kutala mivwimbimbi kana? Kutala ngwapwa nguwamwashi kuhanjikisa mangana vana vami vahase kushimutwila nayami kala vyuma mangana nguvakafwe, kachi nge navapwa mucheseko chakutala mivwimbimbi kana tahi?’ Numba nge vana venu vachili vavandende chikuma, oloze munahase kuvalweza ngwenu: “Kachi nge namumona vyuma vimwe haInternet chipwe hamakina, vize vinahase kumilingisa mwivwenga peha nakufwila kuvitala, kaha mwatela kungulweza. Kanda namwivwa woma chipwe sonyi kungulweza mangana ngumikafweko, mwomwo ami nguli nakusaka kumikafwa.”

¹⁴ Nge muli nakusaka kusakula kanawa vyuma vyakuhemahema, kaha mwatela kushinganyeka omu munahase kusolola chakutalilaho chamwaza kuli vana venu. Ndumbwetu Pranas uze twavulukanga hakavanga ambile ngwenyi: “Numba tuhu namushimutwila havyuma vyavivulu chikuma, oloze vana venu veji kumonanga kaha vyuma mweji kulinganga nakuvilondezeza.” Nge mweji kusakulanga kanawa myaso, namikanda, najivindiyo jamwaza, kaha munahase kukafwa vana venu valinge mwomumwe.—Wavaka-Loma 2:21-24.

15, 16. (a) Mwomwo ika mwatela kufwelela ngwenu Yehova mwamikafwa munangule vana venu? (b) Vyuma muka natushimutwila muchihande chinakavangizaho?

¹⁵ Vyuma muka vyasolokele omu Manowa alombele Yehova amukafwe apwenga chisemi wamwaza? “Kalunga wamuchano evwililile Manowa.” (Vaka-kuyula 13:9) Nayenu visemi nawa, Yehova mwamivwilila omu namulomba kuli Ikiye. Mwamikafwa munangule vana venu. Kaha nawa mwamikafwa mupwenga nazangi, nakupwa vakulinyisa nakunangakana.

¹⁶ Nganomu Yehova mwamikafwa kunangula vana venu omu vachili vavandende, mwamikafwa nawa muvanangula omu navakola. Muchihande chinakavangizaho natushimutwila omu chakutalilaho chaYesu chakupwa nazangi, nakulinyisa, nakunangakana chinahase kumikafwa munangule vana venu vavakweze vazachile Yehova.