Shimbu jimwe lizu kana lyatalishilenga kuli lunga uze valutwile. Kushikulu malunga vamwe vavalutwilenga mangana vavazangamise chipwe mwomwo yakuvakwata undungo. Malunga vamwe vavalutwilenga mangana valame mapwevo vakuzuvo yamwangana. Chakutalilaho, Hengai naShashangaze vavahewile mangana valamenga mapwevo natulumbu twamasano vaMwangana waPeleja Ahaswelu uze apwile Seleke I.—Eseta 2:3, 14.

Oloze keshi nge vosena vaze vavulukilenga muMbimbiliya ngwavo vaheuka vavalutwilengako. Vatu vamwe vaze vatanga chikuma vamba ngwavo lizu kuheuka lyalumbunwine mwamuvulu. Lizu kana valizachishilenga kutalisa kuli mutu uze azachilenga mulimo waulemu kunganda yamwangana. Omu mukiko chapwile nakuli Evete-meleke uze azachilenga naYelemiya, nakuli kaEchopa uze vambulilile kuli muka-kwambulula mujimbu wamwaza Fwilipu. Evete-meleke apwile chilolo wamulemu mwomwo apwile nalisesa lyakuhanjika naMwangana Zetekiya. (Yelemiya 38:7, 8) Kaha nawa kaEchopa uze “ayile kuYelusalema nakulemesa Kalunga,” vamuvulukile ngwavo apwile nachihela chachilemu chakutala luheto lwamwangana.—Vilinga 8:27.

Omu Yesu avulukile vyakusopesa chize nachikapwako kulutwe, ambile ngwenyi: “Omu mwakeza Mwanamutu muupahu wenyi, . . . mwakahandununa mutu kumukwavo, nganomu kafunga eji kuhandununanga mikoko kuvapembe.” (Mateu 25:31, 32) Mwomwo ika tufunga vahandunwinenga ava vimuna?

Kushikulu, tufunga valishililenga hamwe mikoko navapembe. Kuheta naufuku vavasokelenga mumemba mangana vavakinge kuvisuma, nakuveji nakuchishika. (Kuputuka 30:32, 33; 31:38-40) Ava vimuna vavahakilenga mumemba akulihandununa, mikoko namwavo vapembe namwavo kuchina vapembe navalemeka mikoko, chikumanyi mikoko vavihwevo navana. Mukanda umwe wamba ngwawo, kafunga ahandunwinenga nawa mikoko kuvapembe “halwola lwakusema, nahalwola lwakwamwisa nahalwola lwakuvateula.” (All Things in the Bible) Echi chifwanyisa chaYesu chafumine havyuma vize vamwenenga nakulinga vatu muIsalele yakushikulu, mwomwo halwola kana vatu valaminenga mikoko.