Myaka kafwe 3,000 kunyima, muka-kusoneka myaso umwe asonekele ngwenyi: “Unanguzate mwakwivwisa woma mwakukomwesa.” (Samu 139:14) Uno mweji kulikomokelanga hakushinganyeka omu mwana eji kulitunganga mujimo lyanaye tahi? Vatu vavavulu vamba ngwavo Kalunga ikiye atengele vyuma vyakuyoya vyosena.—Tangenu Samu 139:13-17; WavaHepeleu 3:4.

Uze atengele melu namavu nakulingisa mavu apwenga amwaza kutwamaho, ikiye nawa atengele vyuma vyakuyoya. (Samu 36:9) Eji kuhanjikanga navatu nakulijimbula ivene.—Tangenu Isaya 45:18.

Mijimba yetu yalifwanako nayeyi yatunyama. Mijimba yavatu yalifwana nayeyi yatunyama mwomwo vatu natunyama vavatengele kuli Kalunga mangana vatwamenga hamavu. Kalunga hakutenga mutu watete, kamufumishile kuli kanyamako, oloze kumavu.—Tangenu Kuputuka 1:24; 2:7.

Vatu valihandununa natunyama mujijila jivali jakulipwila. Jila yatete, vatu vakwechi uhashi wakutachikiza vyuma, nakuzanga, nakulemesa Tengi. Jila yamuchivali, tunyama kavavatengele mangana vatwamenga haya myaka yosenako, oloze vatu vavatengele mangana vatwamenga haya myaka yosena. Oloze vatu vosena veji kufwanga mwomwo yamutu watete uze akanyine kumutwaminyina kuli Kalunga.—Tangenu Kuputuka 1:27; 2:15-17.