UNO lunga atela kuzakama ngachilihi puwenyi? Vatu vavavulu vafwelela ngwavo chuma chachilemu atela kulinga lunga shina kuzakama tanga yenyi hakuvatondela vyuma vyakumujimba. Oloze mapwevo vamwe vaze vatwama navyuma vyakumujimba vyavivulu kavasuuluka navyuma kanako, veji kwivwanga nge kavavazakamako. Chakutalilaho, pwevo umwe wakuSpain walijina lyaRosa ahanjikile hali lunga lyenyi ngwenyi, “Vatu vamumwenenga kupwa mutu wamuchima wamwaza, oloze kuzuvo apwilenga wakutenuka.” Pwevo weka walijina lyaJoy wakulifuchi lyaNigeria ambile ngwenyi, “Nge tunalimbalaka havyuma vimwe nalunga lyami, ikiye ahanjikilenga ngwenyi, ‘Watela kulinga kala vyuma nangukulweza mwomwo yami ngulunga lyove.’”

Uno lunga nahase kutesamo ngachilihi mulimo wenyi wakupwa mutwe watanga mujila yazangi? Vyuma muka atela kulinga lunga mangana puwenyi evwenga nge vamuzakama nakuwana “kunoka”?—Lute 1:9.

Numba tuhu Kalunga amona valunga napwevo mwomumwe, oloze Mbimbiliya yahanjika ngwayo lunga napwevo mutanga vakwechi milimo yakulihandununa. Chisoneka chaWavaka-Loma 7:2 chahanjika ngwacho, pwevo wakusomboka atwama ‘mulushimbi lwalunga lyenyi.’ Ngana muze mauka eji kutongolanga mutu umwe apwenga mukulwane wakutala milimo yamuliuka kana, Kalunga naikiye atongola lunga kupwa mutwe wapwevo. (Wavaka-Kolinde 1, 11:3) Malunga vatela kutwaminyina vaze vakuzuvo yavo.

Enu malunga, uno munahase kuzachisa ngachilihi ngolo vamihana kuli Kalunga? Mbimbiliya yahanjika ngwayo: “Twalenuho lika kuzanganga mapwevo jenu, nganomu Kulishitu nawa azangile chikungulwilo.” (Wavaka-Efwesu 5:25) Numba tuhu Yesu Kulishitu kambachileko, oloze chakutalilaho chenyi chinahase kumikafwa mupwenga mumalunga vamichima yamwaza. Tutalenu omu munahase kulinga ngocho.

Yesu afwililile kuhizumuna vatu nakuvavendejeka. Yesu afwelelesele vosena vaze valemuwile naukalu ngwenyi: “Twayenu kuli ami, . . . kaha ami nangumihizumuna.” (Mateu 11:28, 29) Akafwilenga vaze vapwile nakuyanda vapandame kuli Yehova. Evi vikiko vyalingishile vatu vavavulu vapandame kuli Yesu mwomwo venjikijile ngwavo mwavahizumuna.

Omu malunga vanahase kulondezeza Yesu. Kekesenu milimo ali nayo puwenu mangana mumukafweko. Mapwevo vamwe veji  kwivwanga ngana muze evwilenga Rosa uze ahanjikile ngwenyi: “Ngwapwilenga nge ngungamba kuli lunga lyami.” Oloze lunga walijina lyaKweku uze awahilila muulo napuwenyi ambile ngwenyi: “Ngweji kuhulisanga puwami angulweze vyuma ngunahase kumukafwako. Hakuwana nge ngwamuzanga chikuma, ngocho shimbu jimwe ngweji kulishinganyekelanga ami ivene nakuputuka kumukafwa chakuzeneka kumuhulisa.”

Yesu atetelelenga vatu nakuvazakama. Kwapwile pwevo umwe wakuhutwa uze avijile musongo waupi hamyaka 12. Omu evwile vyuma vyakukomwesa vize apwile nakulinga Yesu, ‘alyambilenga ngwenyi: “Kachi nge nangukwata kaha kuuvwalo wenyi wahelu, nanguhinduka.”’ Vyuma ahanjikile vyalingiwile. Apandamine kuli Yesu nakukwata kuuvwalo wenyi, kaha hahaze vene ayoyele kumusongo wenyi. Numba tuhu vatu vamwe vamwene nge apwile nakazamuzamu, oloze Yesu amwene ngwenyi pwevo kana apwile muukalu waunene. * Amulwezele mulikoji ngwenyi: ‘Ove mwanami, pwako uwakulikangula omu unahinduka lyehi kumusongo wove waupi.’ Yesu kasawile uze  pwevoko, oloze amutetelelele hakumona musongo apwile nawo. Echi chasolwele hatoma nge Yesu apwile namuchima wakutetela.—Mako 5:25-34.

Omu malunga vanahase kulondezeza Yesu. Nge puwenu keshi nakwivwa kanawako, kaha mwatela kumutetela nakumutalilila chikoki. Mwatela kumwivwishisa nakushinganyeka ovyo vili nakumulingisa alinge vyuma vimwe. Chakutalilaho, Ricardo alumbunwine ngwenyi, “Nge ngunamono puwami nasulakana, ngweji kulihendanga kukuhanjika vyuma vize navimulingisa asulakane chikuma.”

Yesu ashimutwililenga natumbaji twenyi. Yesu ashimutwililenga namasepa jenyi vyuma vyavivulu. Ambile ngwenyi: “Vyosena ovyo ngwevwa kuli Tata ngunamilwezevyo.” (Yowano 15:15) Shimbu jimwe Yesu asakilenga kupwa kwauka wenyi mangana ashinganyeke nakulomba. Chipwe ngocho, alwezelenga tumbaji twenyi vyuma vyapwilenga kumuchima wenyi. Ufuku wakukokela kukufwa chenyi chize afwile kwijiva nge chihwanga, alwezele tumbaji twenyi hatoma ngwenyi, ‘anyengetelele chikuma.’ (Mateu 26:38) Nahalwola vene luze valimbenjelenga, Yesu atwalileho kushimutwila namasepa jenyi.—Mateu 26:40, 41.

Omu malunga vanahase kulondezeza Yesu. Shimutwilenunga namapwevo jenu vyuma muli nakushinganyeka nomu muli nakwivwa. Pwevo nahase kuyayavala hali lunga lyenyi ngwenyi, nge lunga lyenyi ali navatu veka eji kuhanjikanga, oloze kahanjikako nge ali hembo. Oloze talenu omu Ana eji kwivwanga nge lunga lyenyi mwahanjika vili kumuchima wenyi. Ambile ngwenyi, “Ngweji kumonanga ngwami lunga lyami anguzanga, kahechi cheji kungulingisanga ngupandame chikuma kuli ikiye.”

Lihendenu kutato yakuzeneka kulihanjikisa napuwenu hakusaka mumuzangamise. Pwevo umwe ahanjikile ngwenyi, “Nge lunga lyami nasulakana, kanguhanjikishilengako hamakumbi amavulu. Ngwalihanyinenga mulonga nakumona nge kanguzangileko.” Oloze lunga walijina lyaEdwin eji kufwilanga kulondezeza chakutalilaho chaYesu. Ambile ngwenyi, “Nge ngunasulakana, kangweshi kukumbulula puwami hahaze veneko, oloze ngweji kuvandaminanga matoto atule numba tushimutwile hachihande kana.”

Joy uze twavulukanga hakavanga ahanjikile ngwenyi, muchima walunga lyenyi waputukile kwalumuka omu aputukile kulinangula Mbimbiliya naVinjiho jaYehova. Ahanjikile ngwenyi, “Lunga lyami nalumuka, ali nakulondezeza Yesu hakusolola muchima wamwaza, wazangi.” Vaka-kulimbata vavavulu vali nakunganyala kujindongi kaneji jamuMbimbiliya. Kutala nayenu muli nakusaka kunganyala kujindongi kana tahi? Munahase kuhulisa kala Chinjiho chaYehova mangana aminangule Mbimbiliya hawana wakanyombo.