Ngwasemukilile munganda yaBaku, mulifuchi lyaAzerbaijan. Mutanga yetu twasemuka tuvavali, kaha ami yami wamuchivali. Tata apwile kaMuzilemu, kaha mama apwile kaYuleya. Visemi jami valizangile chikuma, vatwaminenga mukuunda numba tuhu vapwile mukwitava chakulihandununa. Mama akundwijilenga tata omu alijilikilenga kulya halwola lwachilika chaRamadan, tata naikiye akundwijilenga mama omu alingilenga chilika chaPaseka. Muzuvo yetu twapwile namukanda waKoran, naTorah naMbimbiliya.

Ami ngwalimwene kupwa ngukaMuzilemu. Numba tuhu kangwakakasanyine numba nge Kalunga kwatwama, oloze ngwalihulishilenga vihula vyavivulu mumuchima wami. Ngwalihulishilenga ngwami, ‘Mwomwo ika Kalunga atengelele vatu, kaha mwomwo ika vatu veji kuyanjilanga mukuyoya chavo, kufumaho hinavakavayanjisa nawa myaka yosena mukakahya kahelo?’ Hakuwana nge vatu vahanjikilenga ngwavo vyuma vyosena vyalingiwilenga mwomwo yakusaka chaKalunga, ngachize ngwalihulishile ngwami, ‘Nge Kalunga eji kwivwanga kuwaha hakumona vatu vali nakuyanda, kaha Kalunga kana afwana ngachilihi?’

Omu ngwapwile namyaka yakusemuka 12, ngwaputukile kulomba kulomba chanamaz chavaMuzilemu chakulomba katanu halikumbi. Halwola kana, ngwapwile kushikola yavaYuleya kuze tata atutwalile nayayami wapwevo. Havilongeselo vatunangwilenga, hapwile nakulinangula chisemwa chaTorah nalilimi lyachiHepeleu. Hakumbi hakumbi shimbu kanda tuputuke kulinangula, twalombelenga kweseka nachisemwa chavaYuleya. Nachimene omu ngwapwilenga hembo, ngwalombelenga kulomba chavaMuzilemu chanamaz, oloze namusana ngwalinungilenga hamwe navakwetu vakushikola mukulomba chavaYuleya.

Ngwasakilenga chikuma kuwana muvakumbulwila vihula vize ngwalihulishilenga. Ngwahulishilenga valapi hashikola ngwami: “Mwomwo ika Kalunga atengelele vatu? Kalunga amona ngachilihi tata uze apwa kaMuzilemu? Tata apwa mutu wamwaza, uno mwomwo ika vamumwena ngwavo apihya? Mwomwo ika Kalunga amutengelele?” Vyuma vangukumbulwilenga kavyapwile namashina namasongoko, kaha nawa kavyangukunywileko.

Kuheta mu 2002 ngwalitwaminyine kufwelela muli Kalunga. Halwola kana hakiko twalukilile kuGermany. Mwahichile kaha chalumingo chimwe, tata himwaviza musongo wakalepa. Ngwalombelenga  hamyaka yayivulu ngwami tanga yetu yipwenga yakulikangula. Hakuwana nge ngwafwelelele ngwami Kalunga Wangolo Josena ikiye kaha akwechi ngolo jakuhindula vatu, ngwamulembelelele lwola lwosena mangana akafwe tata. Ngwashinganyekele ngwami, ‘Kacheshi kukaluhwila Kalunga kukumbulula kulomba chayami kanyike wamundendeko.’ Ngwafwelelele ngwami mwevwilila kukulomba chami. Oloze tata afwile.

Ngwapihililile naKalunga hakuhona kungukafwa, kaha ngwalikomokelele. Ngwashinganyekele ngwami, ‘Ngwapwile nakulomba mujila yakuhenga, chipwe Kalunga katwamako.’ Kufuma vene haze kangwalombelenga cheka kulomba chavaMuzilemu chanamaz koko. Kunangula chamumauka eka akwitava kachangusuulwishileko, ngachize ngwakukulwile ngwami Kalunga katwamako.

Omu mwahichile tukweji 6, Vinjiho jaYehova vejile hembo lyetu. Hakuwana nge katwafwelelele mukwitava chavaka-Kulishituko, ami nayayami twasakile kuvalumbunwina mukavumbi ngwetu nevi navatunangula vene vyauchi. Twavahulishile ngwetu: “Kutala vaka-Kulishitu vatela kulemesa Yesu, nakulusu, naMaliya natuponya veka numba tuhu Jishimbi Likumi jakanyisa vyuma kana tahi?” Vaze Vinjiho jaYehova vazachishile Visoneka nakutulweza nge vaka-Kulishitu vamuchano kavatela kulemesa tuponyako, kaha nawa vatela kulomba kaha kuli Kalunga. Vyuma valumbunwine vyangukomwesele.

Kaha twahulishile ngwetu: “Nyi ngachilihi kunangula chaTulunga Vatatu? Nge Yesu apwa Kalunga, kaha nahase kutwama ngachilihi hamavu nakumujiha kuli vatu?” Vazachishile cheka Mbimbiliya nakutulweza ngwavo, Yesu kapwa Kalungako kaha nawa kateseka hamwe naKalungako. Valumbunwine ngwavo echi chikiko chavalingisa vazeneke kufwelela mukunangula chaTulunga Vatatu. Ngwalikomokelele chikuma, kaha ngwashinganyekele ngwami, ‘Vatu kana vapwa vaka-Kulishitu vakulihandununa.’

Chipwe ngocho, ngwasakile kutachikiza ovyo vatu veji kufwilanga novyo Kalunga etavishila kuyanda. Vaze Vinjiho vangutalishile mukanda wakwamba ngwavo Chinyingi Chize Cheji Kutwaminyinanga kuKuyoya chaHaya Myaka Yosena, * mukanda uze ukwechi tupetulu vaze vakumbulwile vihula vyami. Hahaze vene, vaputukile kungunangula Mbimbiliya.

Halwola twapwilenga nakulinangula, ngwawanyinenga visoneka vize vyakumbulwilenga vihula vyami. Ngwalinangwile nge Kalunga lijina lyenyi ikiye Yehova. (Samu 83:18) Akwechi vilinga vyavivulu, oloze zangi yikiko yayinene havilinga vyosena atwama navyo. (WaYowano 1, 4:8) Atengele vatu mwomwo asakile valivwise kuwaha kuyoya. Ngwalinangwile nge, numba tuhu Kalunga etavisa upi, oloze auhunga kaha nawa kalinwaha aufumiseko. Ngwalinangwile nawa nge kulikanga chaAlama naEve chaneha ukalu kuvatu vosena. (Wavaka-Loma 5:12) Vyuma vyavipi vize vyeza mwomwo yakulikanga kana shina kufwisa vausoko, ngana muze ngwafwishile tata. Chipwe ngocho, Kalunga mwakafumisako upi wosena mukaye, kaha vafu navakasanguka.—Vilinga 24:15.

Muchano wamuMbimbiliya wakumbulwile vihula vyami vyosena. Ngocho ngwaputukile cheka kufwelela muli Kalunga. Omu ngwatachikijile kanawa Vinjiho jaYehova, ngwamwene ngwami vatu kana vapwa vakulinunga mukaye kosena. Chuma changwivwishile kuwaha shina kulinunga chavo nazangi yavo. (Yowano 13:34, 35) Vyuma ngwalinangwile hali Yehova vyangulingishile ngufwile kumuzachila, ngachize ngwasakile jino kupwa nguChinjiho chaYehova. Kaha vangumbapachishile haJanuary 8, 2005.

Vyuma ngwalinangwile muMbimbiliya vyalumwine kuyoya chami chosena. Vyuma ngunalinangula muMazu aKalunga vinangulingisa ngupwenga wakuunda mumuchima. Cheji kungwivwisanga kuwaha nakunguvendejeka hakutachikiza nge tata mwakasanguka, mwomwo muMazu aKalunga mwatwama lushiko lwakusanguka chavafu.—Yowano 5:28, 29.

Ngunatwame muulo hamyaka 6 nalunga lyami Jonathan uze naikiye evwa Kalunga woma, kaha twapwa vakuwahilila muulo wetu. Tuvosena tunalinangula nge vyuma vavuluka hali Kalunga vyapwa vyamuchano, vyavyashi kwivwishisa, kaha vyapwa hiluheto lwamwenemwene. Echi chikiko cheji kutulingisanga twambulileko vakwetu vyuma twafwelela nalutalililo lwetu. Makumbi ano ngunatachikiza nge Vinjiho jaYehova kavapwa “vakulihandununako,” oloze vapwa vaka-Kulishitu vamuchano.