Vilinga vyamaswekeza mufulumende vyapwa kuzachisa ngolo mujila yakuhenga mangana vanganyalileho. Vilinga vyamaswekeza vyafuma kushikulu. Chakutalilaho, muMbimbiliya mwatwama lushimbi lwakukanyisa vilinga vyamaswekeza hakusopa milonga. Echi chalumbununa nge kuhana maswekeza chaputukile vene kushikulu myaka yakuhambakana 3,500 kunyima. (Kulovoka 23:8) Maswekeza kawapwa kutambula majika kanwa kahako. Vilolo vamufulumende vaze vakwechi tato kana vanahase kwiva vyuma, nakuzachisa vyuma vize kavyeshi mungolo javoko, chipwe kwiva jimbongo. Vanahase kuzachisa ngolo javo mangana vahakwile vausoko chipwe masepa.

Numba tuhu maswekeza anahase kupwa mukala liuka lyavatu, oloze chasoloka nge mufulumende alisala chikuma. Chihande chakwamba ngwavo Global Corruption Barometer chamu 2013 chize vasonekele kuli vaka-liuka lyaTransparency International chambile ngwacho, vatu mukaye kosena vamona nge mauka amapolitiki, natupokola, navaze vatwama navihela vyavilemu mufulumende, navaka-kutunga jishimbi navachambamilonga vakiko vanakwazananga chikuma mumaswekeza. Achikekesenu hamijimbu yimwe yasolola ukalu kana.

• AFRICA: Mumwaka wa 2013, vilolo vamufulumende vamuSouth Africa vakuheta ku 22,000 vavahanyine mulonga mwomwo yavilinga vyamaswekeza.

• AMERICAS: Mumwaka wa 2012, muBrazil, vatu vakuheta ku 25 vavawanyine namulonga wakuzachisa jimbongo jafulumende jize vahanyinenga vatu mangana vavavwotele. Hali vaze vawanyine namulonga hapwile namukulwane wavilolo jatwamina walifuchi, mutu uze apwile wamuchivali havatu vaze vayile fuma mulifuchi.

• ASIA: Mungalila yaSeoul, muSouth Korea, mumwaka wa 1995, vatu vakuheta ku 502 vafwile hakuvashiukila kuchitanda chachinene. Vaka-kulohwelela vawanyine nge vaka-fulumende vatambwile majika kanwa nakwitavisa vaka-kutunga vazachise vyuma vyakuzeneka kukola hakutunga mangana jimbongo jasalileho valyenga.

• EUROPE: Mukulwane waEuropean Commission Home Affairs walijina lyaCecilia Malmström ambile ngwenyi: “Maswekeza analisale chikuma muEurope.” Ahanjikile nawa ngwenyi, “vatwamina vamapoliti kaveshi namuchima wakusaka kukumisa maswekezako.”

Vatu kaveshi kuhasa kukumisa maswekeza amufulumendeko. Susan Rose-Ackerman, uze alinangula chikuma hajishimbi jakukanyisa maswekeza, asonekele ngwenyi, “fulumende yatela kwalumunako jila yakulingilamo vyuma.” Numba tuhu chili nakusoloka nge vatu vanahono kukumisa maswekeza, oloze Mbimbiliya yasolola nge vyuma navikalumuka, kaha maswekeza nawakakuma.