Vihula VyamuMbimbiliya Vakumbulula
Kutala nakukeza kapwa fulumende yimwe mukaye kosena tahi?
Uno fulumende yakuyula kaye kosena yinahase kununga ngachilihi vatu vakumafuchi osena? Isaya 32:1, 17; 54:13
Achishinganyekenu omu fulumende yakuyula kaye kosena yinahase kunganyalisa vatu. Vatu vavavulu makumbi ano vali nakuyanda mwomwo yauhutu, oloze veka vali naluheto chikuma. Oloze fulumende yamwaza yakeke yinahase kuhana vatu vyuma vyosena vasaka. Munashinganyeka ngwenu vatu navakahasa kutunga fulumende yangana nyi?—Tangenu Yelemiya 10:23.
Putu vene kushikulu, jifulumende jinahononga kuzakama kanawa vatu javo chikumanyi vaka-kuhutwa. Jifulumende jimwe japwa jaukenya. (Muka-kwambulula 4:1; 8:9) Oloze Kalunga Wangolo Josena ashika ngwenyi mwakaneha fulumende yize nayikashisa jifulumende josena eji jiliko. Muka-kuyula fulumende kaneyi mwakazakama vatu chikuma.—Tangenu Isaya 11:4; Ndanyele 2:44.
Vyuma muka naukalinga Wangana waKalunga?
Yehova Kalunga nasakula Muka-kuyula wamwenemwene, Mwanenyi Yesu. (Luka 1:31-33) Omu apwile hano hamavu, Yesu asakilenga kukafwa vatu. Hakupwa Mwangana, mwakanunga vatu vakumafuchi osena nakufumisako kuyanda chosena.—Tangenu Samu 72:8, 12-14.
Uno vatu vosena vetavila Yesu kupwa Muka-kuyula tahi? Nduma. Oloze Yehova ali nakuvatalilila chikoki. (WaPetulu 2, 3:9) Nahane vatu lwola lwakwitavila Yesu kupwa Muka-kuyula. Kalinwomu ngana, Yesu mwafumisako vatu vavapi vosena hano hamavu nakuneha kuunda namukingo mukaye kosena.—Tangenu Mika 4:3, 4.