Numba milimo yenu yipwa yakuzachisa wongo chipwe yakulikanya chipwe milimo yeka, oloze ijivenu ngwenu “kukukilikita chosena kuli kunganyala.” (Vishimo 14:23) Nganyo muka vene eyi? Kuzata nangolo cheji kutukafwanga tupwenga navyuma vyasakiwa kumujimba. Kalunga ashika vaze veji kumulemesanga nakashishi ngwenyi mwavahananga vyuma vyasakiwa kumujimba. (Mateu 6:31, 32) Oloze asaka tuzateko milimo yimwe mangana tuwane mwakuyoyela.—Wavaka-Tesolonyika 2, 3:10.

Ngocho twatela kumona milimo yetu kupwa jila yakuwanyina mwakuyoyela. Tuvosena twatela kuzata milimo mangana tulizakame etu vavene nakutesamo milimo twatwama nayo. Joshua wamyaka yakusemuka 25 ambile ngwenyi: “Kulitondela vyakulikafwa navyo mukuyoya hichuma chachilemu. Kachi nge munahase kulanda vyuma vyasakiwa mukuyoya, kaha milimo muli nakuzata yikwechi nganyo.”

Kuzata nangolo nawa cheji kulingisanga mutu alimone kupwa wamulemu. Omu mukiko chatela kupwa vene. Kachi nge natutwalaho kuzata mulimo wetu, numba mulimo kana upwa waukalu chipwe nge weji kutunehelanga uli, natusuuluka hakutachikiza nge twapwa tuvavalemu. (Vishimo 26:14) Echi nachitukafwa tusuuluke namilimo tuli nakuzata. Aaron uze twavulukanga muchihande chinafumuho ambile ngwenyi: “Ngweji kwivwanga kuwaha nge ngunakotoka kumilimo. Ngweji kwivwanga vene kuzeya kaha nawa lwola lumwe, naumwe wauchi eji kungusangejekanga, oloze ngweji kutachikizanga ngwami ngunatesamo vyuma vimwe.”

Mbimbiliya yalisa lunga uze eji ‘kwanguhwisanga milimo yenyi’ napwevo uze eji ‘kwivwanga chipepa kuzata namavoko enyi.’ (Vishimo 22:29; 31:13) Enga, mutu keshi kupwa nauhashi wakuzata milimo mulikumbi lyangongoko. Kaha nawa vatu vavandende kaha vakiko veji kulivwisanga kuwaha kuzata milimo yize kavatachikiza kanawako. Evi vikiko vatu vavavulu pamo kaveshi kusuuluka namilimo vazatako. Vatu kaveshi kuzata nangolo mangana vatachikize kanawa milimo vali nakuzatako.

Mutu nahase kulinangula kuzata kala milimo kachi nge mwahakako muchima kukulinangula mwakuzachila kanawa milimo kana. William wamyaka 24 ambile ngwenyi: “Kachi nge nauhaka muchima kumulimo uli nakuzata nakumona vyuma vyamwaza navifumamo, kaha nausuuluka. Kaweshi kusuuluka kachi nge nauyizata mulumbushi chipwe nakanengauliko.”

Lihendenu kukushinganyeka kaha hajimbongo mweji kutambulanga kumilimo mweji kuzatanga. Oloze lihulisenu ngwenu: ‘Mwomwo ika ou mulimo unapwila waulemu? Vyuma muka navisoloka kachi nge naumwe mwauzata wauchi, chipwe nge kangwauzachile kanawako? Mulimo nguli nakuzata uli nakunganyalisa ngachilihi vakwetu?’

Chihula chamakumishilo chachilemu mwomwo mulimo namuzata naumisuulwisa kachi nge namumona omu uli nakunganyalisa vakwenu. Yesu ambile ngwenyi: “Kuhana cheji kunehanga kuwahilila chikuma kuhambakana kutambula.” (Vilinga 20:35) Vaze veji kulandanga vyuma vyetu navakulwane vatwingisa milimo keshi vakiko kaha veji kunganyalanga kumilimo twazatako, kuli naveka nawa. Vatu kana shina vaka-tanga yetu navaze vakalikiza.

Vaka-tanga yetu. Kachi nge mutwe watanga mwazata nangolo mangana atondele vaka-tanga yenyi vyuma vyasakiwa, kaha mwavanganyalisa mujijila jivali. Chatete navapwa navyuma vyasakiwa mukuyoya vyakufwana nge vyakulya, vyakuvwala, nazuvo yakusavala. Ngocho mwatesamo mulimo amuhana Kalunga “[wa]kuhana vaze venyi vyuma vyasakiwa.” (WaChimoteu 1, 5:8) Chamuchivali, mutwe watanga uze mwazata nangolo mwahana chakutalilaho chamwaza kuli vaka-tanga yenyi nge kuzata nangolo chapwa chachilemu. Shane uze twavulukanga muchihande chinafumuho ambile ngwenyi: “Tata atuhana chakutalilaho chamwaza chakuzatanga nangolo. Apwa mutu wakashishi uze nazate nangolo mukuyoya chenyi chosena. Nazatenga mulimo wakusongasonga hamyaka yayivulu. Chakutalilaho chenyi chinangunangula omu chalema kuzata namavoko ami, kulumbununa kutunga vyuma vize navikafwa vakwetu.”

Vaze vakalikiza. Kaposetolo Paulu alwezele vaka-Kulishitu ‘vakilikitenga mangana vapwenga navyuma vyakuhanako vaze vanakalikiza.’ (Wavaka-Efwesu 4:28) Enga, kachi nge natuzata nangolo mangana tulizakame etu vavene navaka-tanga yetu, kaha tunahase kukafwako navaze vakalikiza. (Vishimo 3:27) Ngocho kuzata nangolo nachitukafwa tupwenga vakuwahilila nakupwa namuchima wakuhana.

MuChihande chenyi chahaPili, Yesu ambile ngwenyi: “Kachi nge mutu uze ali nangolo jakuyula mwakushinjila ngwenyi uyenga nenyi kilomita yimwe, yako nenyi jikilomita jivali.” (Mateu 5:41) Uno munahase kuzachisa ngachilihi mazu kana kupandama kumilimo yenu? Muchishishisa chakuzata kaha chindende, wanenu jijila jakuzata nakuhambakanyisa haze vanamilweze. Litomenenu vyakulinga. Fwilenu kuzata kanawa milimo yenu chipwe kuyizata washiwashi. Livwisenu kuwaha kuzata namilimo yayindende.

Kachi nge namuzata milimo yenu nakuhambakanyisaho, kaha namulivwisa kuwaha milimo yenu. Mwomwo ika? Mwomwo muli nakulitwaminyina enu vavene. Muli nakuzata nakuhambakanyisaho mwomwo munasakula kulinga ngocho, keshi nge mwomwo vali nakumikanjikizako. (WaFwilemone 14) Chishina kana chinatwanukisa mazu ahali Vishimo 12:24 aze amba ngwawo: “Livoko lyamuka-unyongochima nalikatwamanga nawangana, oloze muvwa navakamuzachisanga muundungo.” Numba tuhu naumwe wauchi mwatukwata undungo, oloze mutu uze mwazata chindende nahase kulivwa nge ndungo mwomwo vakwavo navamulwezanga lika azate nangolo. Chipwe ngocho, mutu uze mwazata nakuhambakanyisaho mwomwo nasake kulinga ngocho keshi kupwa mundungo kanako. Mwalitwaminyina ivene mukala vyuma mwalinga.

Kuzata nangolo chapwa chamwaza, oloze twatela kwanuka ngwetu kuyoya kachapendamina hakuzata kaha milimoko. Mbimbiliya yatukolezeza tupwenga naunyongochima. (Vishimo 13:4) Oloze kayatukolezeza tundupukile chikuma mumilimoko. Hali Muka-kwambulula 4:6 vatulweza ngwavo: “Mukamo umwe nauholela unawahe kuhambakana mikamo yivali nakukilikita nakufwila peho kaha.” Chishina muka natwandaho? Kundupukila mumilimo kacheshi kulingisa mutu asuuluke namilimo yenyiko mwomwo nachimwenyekela lwola lwenyi lwosena nangolo jenyi josena. Kulumbununa nge milimo yenyi nayipwa nge ‘hikufwila peho kaha.’

Mbimbiliya yinahase kutukafwa tuhone kundupukila chikuma mumilimo yetu. Numba tuhu yatulweza tuzate milimo yetu nangolo, oloze yatulweza nawa ‘tukekesenga vyuma vyavilemu.’ (Wavaka-Fwilipi 1:10) Uno vyuma muka vyavilemu? Vyuma kana shina kupwa nalwola lwakushikamanga navaka-tanga yetu namasepa. Chikumanyi kupwa nalwola lwakulinga vyuma vyakushipilitu vyakufwana nge kutanga Mazu aKalunga nakuhunananaho.

Vaze navalinga vyuma kanevi navalivwisanga kuwaha kuzata milimo yakumujimba. William uze twavulukanga hakavanga ambile ngwenyi, “Mukulwane umwe wakapani ngwazachililenga akwechi chakutalilaho chamwaza chakuzata kanawa milimo yenyi. Eji kuzatanga nangolo, kaha eji kulivwasananga navatu vaze veji kwizanga kukapani yenyi mwomwo yamilimo yenyi yamwaza. Oloze nge nakumisa kuzata milimo yahalikumbi, eji kukotokanga mangana akatale tanga yenyi nakuzakama vyakulemesa Kalunga. Enga, ou mukulwane apwa wakuwahilila chikuma mukuyoya chenyi.”