Ngwasemukilile munganda yaSzékesfehérvár muHungary, nganda yize yinayinga puho hamyaka kafwe 1,000 yinahichimo. Chaluvinda, nguchili lika nakwanuka vyuma vyavipi vyasolokele munganda kana halwola kwapwile jita yakaye yamuchivali.

Omu ngwapwile ngukanyike, ngwatwaminenga navakaka. Ngweji kuvanukanga chikuma, chikumanyi kaka wapwevo Elisabeth. Angunangwile kupwa nalufwelelo lwakukola muli Kalunga. Putu vene omu ngwapwile namyaka yakusemuka yitatu, chingoloshi hichingoloshi twahitulukilenga mukulomba chize vavuluka ngwavo Kulomba chaMwata. Numba tuhu ngwahitulukilenga mukulomba kana, oloze kangwatachikijile muchalumbunukilileko, palanga nomu ngwapwile namyaka yakuzomboka 20.

Ngwapwile nakutwama navakaka omu ngwapwile ngukanyike mwomwo visemi jami vapwile nakuzata ufuku namusana mangana ngwavo vawane jimbongo jakulanda zuvo yamwaza. Sateli hiSateli yamuchivali mukakweji, tanga yosena yalikungulwilenga nakulila hamwe vyakulya. Kulikungulula kana changuhizumwinenga chikuma.

Mu 1958, visemi jami vawanyine vyuma vapwile nakufwila. Valanjile zuvo yize twatwaminenga etu tuvatatu. Ngwawahililile chikuma hakutwama jino navisemi jami. Oloze omu mwahichile tukweji 6, kuwahilila kana chakumine. Tata afwile namusongo wakasa.

Ngwevwile kupihya naushona chikuma. Likumbi limwe ngwalombele ngwami: “Ove Kalunga, ngwapwile nakukulembelela ulwile tata. Ikiye apwile nakunguzakama. Uno ika wahonenene kukumbulula kulomba chami?” Ngwasakile chikuma kutachikiza okwo apwile tata. Ngwapwile nakuhuhwasana ngwami: ‘Uno nayi mwilu tahi? Uno keshi nakuyoyako, kaha keshi kukapwako chekako tahi?’ Ngwevwililenga lushiushiu vakwetu vanyike vaze vapwilenga namasevo.

Hamyaka yayivulu, ngwayilenga kumafuka hakumbi hakumbi. Ngwafukaminenga hafuka yatata nakulomba ngwami: “Ove Kalunga, ngunakulembelela, nguli nakusaka kutachikiza okwo ali  tata.” Ngwalombele nawa angukafwe ngutachikize vyuma vyavilemu mukuyoya.

Omu ngwapwile namyaka yakusemuka 13, ngwalinangwile lilimi lyaGerman. Ngwashinganyekele ngwami hakuwana nge kwapwile mikanda yayilemu yayivulu mulilimi kaneli, pamo nanguwana muvakumbulwila vihula vyami. Mu 1967, ngwaputukile kulinangula munganda yaJena yize yapwililile kumututuko waGermany. Ngwatangilenga mikanda vasonekele vatu valinangula chikuma vamuGermany, chikumanyi yize yahanjikilenga hakuyoya chavatu. Numba tuhu ngwawanyine mijimbu yamwaza, oloze nayimwe yangusuulwishile yauchi. Ngwatwalileho lika kulomba.

Mu 1970, ngwakindulukile kuHungary, kaha oku kukiko ngwawanyine Rose uze ngwambachile. Halwola luze, muHungary mwapwile chiyulo chaCommunism. Nakushimbula chiku kufuma haze twalimbachile, ami napuwami Rose twachinyinyine kuAustria. Twajinyine kuya nakutwama kunganda yaSydney muAustralia, kuze atwaminenga natu.

Kutwala muze ngwawanyine milimo muAustria. Likumbi limwe, mutu umwe ngwazachilenga nenyi kumilimo angulwezele ngwenyi Mbimbiliya yinahase kukumbulula vihula vyami vyosena. Anguhanyine mikanda yize yahanjikile haMbimbiliya. Eyi mikanda ngwayitangile yosena, kaha ngwasakile kulinangula vyavivulu. Ngocho ngwasonekelele Vinjiho jaYehova vaze vasonekele yize mikanda, mangana vangutumine mikanda yeka.

Halikumbi lyatete kwanuka likumbi twalimbachile, ami napuwami vatutambukilile kuli chinjiho wakanyike wamuAustria. Anehele mikanda yize ngwalombele, kaha anguhulishile numba nge nguli nakusaka kulinangula Mbimbiliya, kaha ngwetavilile. Hakuwana nge ngwasakile chikuma kulinangula, ngocho twalinangwilenga kavali muchalumingo, kaha chilongesa chambachilenga kafwe jiola jiwana.

Ngwevwile kuwaha chikuma hakwivwa vyuma vyamuMbimbiliya vangunangwilenga Vinjiho. Ngwalikomokelele chikuma omu vangulwekesele lijina lyaKalunga, Yehova, muMbimbiliya yami yamulilimi lyaHungarian. Hamyaka kafwe 27 yize ngwayilenga kuchachi, kanda ngwivwengangaho lyehi mutu mwavuluka lijina lyaKalunga. Ngwevwile kuwaha hakumona omu Mbimbiliya yakumbulwile vihula vyami mujila yayashi. Chakutalilaho, ngwalinangwile nge vafu kavatachikiza chuma numba chimweko, chinafwane nge vasavala tulo twatuvulu. (Muka-kwambulula 9:5, 10; Yowano 11:11-15) Ngwalinangwile nawa nge Mbimbiliya yatushika lifuchi lyalihya muze “kufwa kacheshi kukapwako chekako.” (Kusoloka 21:3, 4) Nguli nakutalilila kukamona cheka tata, mwomwo mulifuchi lyalihya namukapwa “kusanguka chavaka-kwoloka nachavaka-kuhona kwoloka.”—Vilinga 24:15.

Puwami Rose nayikiye etavilile kulinangula Mbimbiliya hohamwe nayami. Twazovolokele washiwashi, kaha twakumishile kulinangula mukanda mutukweji vavali kaha. Twayilenga kukukungulula chosena chaVinjiho chize vapwilenga nacho haZuvo yaWangana. Twevwile kuwaha chikuma hakumona omu Vinjiho jaYehova valizanga, nomu veji kulikafwanga, nomu valinunga hamwe.—Yowano 13:34, 35.

Mu 1976, ami napuwami vatwitavishile kwingila mulifuchi lyaAustralia. Omu twahetele kuze, twatondeletondele Vinjiho jaYehova, kaha twavawanyine. Vinjiho vamulifuchi kaneli vatutambwile namavoko avali. Mu 1978, nayetu twapwile jino tuVinjiho.

Ngunawane jino muvakumbulwila vihula vize vinanguyanjisanga hamyaka yayivulu. Hakupandama kuli Yehova Kalunga, ngunawane Tata wamwaza chiyovo. (WaYakova 4:8) Kaha nawa cheji kungukolezezanga chikuma hakushinganyeka ngwami kulutwe nangukamona tata wakungusema.—Yowano 5:28, 29.

Mu 1989, ami napuwami twakindulukile kuHungary mangana tukalwezeko masepa jetu, navatanga jetu, navatu veka vyuma twafwelela. Tunatokwa chikuma kunangula vatu vavavulu vyuma yanangula Mbimbiliya. Tunakafwe vatu vakuzomboka 70 vaputuke kuzachila Yehova, kuhakilako namama.

Ngwalombele hamyaka 17 mangana ngutachikize muvakumbulwila vihula vyami. Munahichi jino myaka kafwe 39, kaha nguchili lika nakulomba ngwami, “Ngunakusakwilila chikuma ove Tata wamwilu ngwazanga, hakukumbulula vihula vyami ngwalihulishilenga kuunyike.”