Chinyama: Aminyi elunga evi vyakwitava kangwavitachikizako. Shikaho ngunamono nge nevi natushimutwila vene vyauchi.

Chiyaze: Ngunasakwililako chikuma hakungulweza ngocho. Ami lijina lyami yami Chiyaze. Numba yove lijina lyove yove iya?

Chinyama: Yami Chinyama.

Chiyaze: Chinawahe chikuma kuliwana nayove, elunga Chinyama.

Chinyama: Nayami ngunawahilila.

Chiyaze: Mana ngukuhuliseko, uno wakolela mutanga yavaka-kwitava nyi?

Chinyama: Eyo. Oloze omu ngwafumine hembo nakuya kushikola, ngwalitwaminyine kuya kuchachi.

Chiyaze: Kumana. Vyuma muka walinangwile kushikola kana?

Chinyama: Ngwalinangwile vyachiyoyelo chavatu namijimbu yakushikulu. Ngwazanga mijimbu yakushikulu, chikumanyi yakuvuluka omu vatu vejile nakupwako hano hamavu.

Chiyaze: Mijimbu yakushikulu yapwa yamwaza chiyovo. Nganomu unatachikiza, naMbimbiliya yikwechi mijimbu yakushikulu. Kutala kushikola mwalinangwileko mijimbu yimwe yamuMbimbiliya nyi?

Chinyama: Keshi chikumako. Ngwatachikiza vene ngwami Mbimbiliya yapwa mukanda wamwaza, oloze kangwashinganyeka ngwami yikwechi mijimbu yakushikuluko.

Chiyaze: Unahanjika kanawa. Nge uliko nalwola, nguli nakusaka kukulweza mijimbu yimwe yakushikulu yamwenemwene yatwama muMbimbiliya.

Chinyama: Ukalu wauchi. Oloze aminyi kangweshi naMbimbiliyako.

Chiyaze: Ukalu wauchi. Natuzachisa eyi yami. Mujimbu watete natushimutwila shina uze watwama hamukanda wakulivanga waMijimbu kapetulu 29, vesi 26 na 27. Jivesi kana ngwajo: “Jino Ndavichi mwanaYese apwilenga mwangana wavaIsalele vosena. Makumbi aze apwilenga mwangana wavaIsalele apwile myaka makumi awana. Apwilenga myaka yitanu nayivali muwangana muHevelone, kaha apwilenga myaka makumi atatu nayitatu muwangana muYelusalema.”

Chinyama: Uno ou mujimbu tunatange unasolola ngachilihi nge mijimbu yakushikulu yamuMbimbiliya yapwa yamwenemwene?

Chiyaze: Vatu vamwe kunyima vambilenga ngwavo Mwangana Ndavichi kapwilekoko.

Chinyama: Kumana? Mwomwo ika vapwile nakwambila ngwavo kapwilekoko?

Chiyaze: Kufumisako unjiho wamuMbimbiliya, kakwapwile unjiho weka wakusolola nge Ndavichi apwile mutu nahenyiko. Oloze mu 1993, lizavu lyavaka-kuvumbwojola vawanyine lilolwa lyakushikulu chikuma lize lyapwile nalizu lize valumuna ngwavo “Zuvo yaNdavichi.”

Chinyama: Chishina kana chinawahe.

Chiyaze: Mutu weka vavuluka muMbimbiliya uze vanahuhwasananga vatu shina Pondeu Pilatu uze apwile nguvulu ayulilenga mumakumbi aYesu. Vamuvuluka  hali Luka kapetulu 3, vesi 1. Vamuvuluka hamwe navilolo veka vayulilenga mufulumende halwola luze.

Chinyama: Eyo, mukiko ngunamono. Echi chisoneka ngwacho, “omu Pondeu Pilatu apwile nguvulu waYuleya, Helote nawa apwile muka-kuyula mbongi yaNgalileya.”

Chiyaze: Mukiko. Vatu valinangula chikuma vanahuhwasananga hamyaka yayivulu numba nge Pondeu Pilatu kwapwile chikupu. Jino kafwe myaka 50 kunyima, vawanyine lilolwa kuMiddle East lyakusoneka lijina lyaPondeu Pilatu.

Chinyama: Ma-a-ma. Mujimbu kana kanda nguchiwivwengaho lyehi.

Chiyaze: Chinawahe chikuma omu unatachikiza mujimbu kana.

Chinyama: Kukulweza muchano, Mbimbiliya ngwayimona vene kupwa himukanda waulemu, oloze ngwashinganyeka ngwami vyuma vasonekamo kavyeshi kuhasa kutukafwa makumbi anoko. Yatwama vene namijimbu yakushikulu yamwenemwene, oloze kwijinganyi nge yinahase kutukafwa namakumbi ano.

Chiyaze: Vatu vavavulu vashinganyeka ngwavo Mbimbiliya yapwa mukanda wakushikulu uze kaweshi kuhasa kutukafwa makumbi anoko. Oloze ami kangwafwelela ngochoko. Tala vyangulingisa nguzeneke kufwelela ngocho: Putu kushikulu, vyuma twasaka etu vatu vyapwa vyovimwe. Chakutalilaho, twasaka vyakulya, navyakuvwala, nazuvo. Twasaka nawa kushimutwila navakwetu nakupwa najitanga jakuwahilila. Kutala vyuma kanevi keshi vikiko twasakako nyi?

Chinyama: Eyo, vikiko twasaka.

Chiyaze: Mbimbiliya yinahase kutukafwa muvyuma vyosenevi. Shikaho ngwafwelela nge numba tuhu vayisonekele kushikulu oloze himukanda unahase kutukafwa noholyapwa.

Chinyama: Unatwale mulihi?

Chiyaze: Mana nguhanjike ngana: Mbimbiliya yikwechi jindongi jajilemu jize jinahase kutukafwa oholyapwa ngana muze jakafwilenga nawa vatu halwola luze vajisonekele.

Chinyama: Kumana? Mujila muka?

Chiyaze: Jindongi jamuMbimbiliya jinahase kutukafwa muvyuma vyakufwana nge omu twatela kumona jimbongo, namwakupwila natanga yakuwahilila, namwakutwamina kanawa namasepa jetu. Mbimbiliya yinahase kutukafwa tufukile mukuyoya. Chakutalilaho, unahase kwitavila nge makumbi ano chinapu chachikalu malunga kutwama kanawa namapwevo javo nakulela kanawa vana vavo.

Chinyama: Eyo, vyuma unahanjika vyamuchano. Ami napuwami tunatwame mwaka wamuundu muulo, oloze lyacha lyakameneka twalikokojwesa lika.

Chiyaze: Mukiko. Oloze muMbimbiliya mwatwama jindongi jimwe jize jinahase kumikafwa. Chakutalilaho, tala vyuma vasoneka hali Wavaka-Efwesu kapetulu 5. Mana tutange vesi 22, 23, na 28. Nguli nakukulomba utange eji jivesi.

Chinyama: Hano ngwavo: “Mapwevo valiluulenga kuli malunga javo nge kuli Mwata, mwomwo lunga apwa mutwe wapwevo nganomu nawa Kulishitu apwa mutwe wachikungulwilo, hakupwa ikiye muka-kulwila mujimba kanou.” Kaha vesi 28 ngwayo: “Ngocho namalunga nawa vatela kuzanganga mapwevo javo nganomu vazanga mijimba yavo. Ou azanga pwevo lyenyi alizanga ivene.”

Chiyaze: Unatange kanawa. Kusakwililako. Nge valunga napwevo valimbata navakavangiza jindongi kaneji, kutala kaveshi kutwama kanawa muulo wavoko nyi?

Chinyama: Eyo, navatwama kanawa. Olozenyi vyuma kana vyavyashi kuvimbombola kaha hakanwa.

Chiyaze: Chamuchano vene, naumwe akupuka mwosena wauchi. Mukapetulu youmwe, Mbimbiliya yatukolezeza tuhonenga kukaluhwisa michima yetu. * Ngocho hakusaka ulo ufukile, valunga napwevo vatela kupwa vavavwovu nakulyononona. Ami napuwami twamona nge Mbimbiliya yinahase kutukafwa tupwenga vavavwovu nakuhona kukaluhwisa michima.

Chinyama: Vyuma unahanjika vyamwenemwene.

Chiyaze: Vinjiho jaYehova vatwama nakeyala yahaInternet yize yatwama namijimbu yamwaza yahanjika haulo natanga. Kachi nge uliko nalwola, ngunahase kukulwekesa mijimbu yimwe yatwamaho.

Chinyama: Ukalu wauchi. Lwola kululi, linga vene ngocho.

Chiyaze: Chamwaza. Keyala kana yapwa www.pr418.com. Tala, omu mukiko lyasoloka lifwo lyamaputukilo.

 Chinyama: Eyi mivwimbimbi yamwaza chiyovo.

Chiyaze: Eyi mivwimbimbi yili nakusolola mulimo wetu wakwambulula uze tweji kuzatanga mukaye kosena. Tala jino echi chihanda vavuluka ngwavo “Vyuma Navikafwa Vaze Valimbata naVisemi.” Muchihanda kana muli mitwe yavihande yili nakushimutwila havyuma vyakulihandununa handununa. Kutala hali chihande chimwe unasake chikuma tahi?

Chinyama: Eyo. “Mwakukumishila Ukalu Muulo Wenu.” Nguli nakusaka kulinga ngocho.

Chiyaze: Echi chihande chinasolola jijila jiwana jakukumishilamo ukalu. Tala eyi palangalafu. Unahase kuyitanga.

Chinyama: Ukalu wauchi. Ngwayo: “Nganomu muchima namahuyungu vyeji kukafwanga manyinga atambuke kanawa mumujimba, mukiko nawa nazangi nakavumbi vyeji kulingisanga vatu muulo vashimutwile nakulivwasana kanawa.” Ma-a-ma, vyuma vanalumbununa ngunavizange.

Chiyaze: Ngunasakwilila hakutanga chove. Vanahakeho chisoneka chamuMbimbiliya. Nyachikaho mangana chisokoloke.

Chinyama: Ngunachimono. Wavaka-Efwesu 5:33. Chinambe ngwacho: “Mutu himutu azangenga pwevo lyenyi nganomu alizanga ivene; kaha nawa pwevo atela kupwa nakalemesa chikuma kuli lunga lyenyi.”

Chiyaze: Chisoneka chinahanjika vyuma atela kulinga mutu himutu muulo, nyi mweka?

Chinyama: Mukiko vene.

Chiyaze: Lunga asaka puwenyi amuvumbikenga. Kaha pwevo nawa asaka lunga lyenyi amuzangenga.

Chinyama: Eyo, unahanjika mwakwoloka.

Chiyaze: Kachi nge lunga mwatondatonda jijila jakuzangilamo pwevo lyenyi, echi nachipwa chachashi kuli pwevo kuvumbika lunga lyenyi.

Chinyama: Ou ukiko muchano.

Chiyaze: Ngocho eyi vesi yamuMbimbiliya numba tuhu vayisonekele myaka kafwe 2,000 kunyima, oloze yahanjika havyuma vatela kulinga valunga napwevo vize navivakafwa vafukile muulo wavo. Kaha ngana muze chahanjikanga chakutalilaho twatanganga, zangi nakavumbi vyeji kukafwanga muulo.

Chinyama: Ngunamono jino ngwami muMbimbiliya mwatwama mijimbu yayilemu chikuma.

Chiyaze: Elunga Chinyama, chinawahe omu unetavila chuma kana. Omu nangukeza cheka, nguli nakusaka ngukakuwane hano hembo mangana tukashimutwile hali aka kamutwe kakwamba ngwavo “Jijila Jiwana Jakukumishilamo Ukalu” aka kali muchihande chochimwe. *

Chinyama: Chamwaza. Ami napuwami natutangila hamwe echi chihande.