Vatu vavavulu makumbi ano kavasaka kuzata nangoloko, nge omu tunamono muchakutalilaho chaAlex. Aaron uze apwa muka-kuwahisa jiminyau ambile ngwenyi: “Vatu vavavulu vashinganyeka nge kavatela kuzata nangoloko. Veji kushinganyekanga ngwavo, ‘Nguli nakuzata milimo kana shimbu nguli nakuvandamina yeka yamwaza.’”

Mwomwo ika vatu vavavulu vashinganyekela nge chapwa chamokomoko kuzata nangolo? Pamo vanavahungumwisa kuli vaka-kwazana mijimbu vaze veji kusololanga nge kuyoya “chamwenemwene” shina kutwama muuhando chakuzeneka kuzata. Matthew uze azata milimo yakuwahisa vyuma ambile ngwenyi: “Vatu vashinganyeka ngwavo, kachi nge mutu mwazata nangolo awane mwakuyoyela, kaha keshi kufukilako.” Shane uze azata milimo yakukombakomba nayikiye amona ngwenyi omu mukiko vashinganyeka vatu. Ambile ngwenyi: “Vatu makumbi ano vali nakusaka kuzata kaha chindende, oloze vasaka kutambula jimbongo jajivulu.”

Tuyokutuyoku, vatu vavavulu vaze vafukila vasaka kuzata nangolo. Daniel wamyaka yakusemuka 25 uze azata milimo yakutunga jizuvo ambile ngwenyi, “Ngwamona nge kuzata nangolo cheji kusuulwisanga, chikumanyi nge chinapandama kuvyuma vyavilemu. Andre wamyaka yakusemuka 23 naikiye etavilile mazu kana. Ambile ngwenyi: “Ngwashinganyeka ngwami hakusaka mutu awahilile nakusuuluka mukuyoya, atela kuzata milimo. Kuhona kuzata nangolo kacheshi kulingisa mutu awahilileko oloze cheji kunehanga kaha uli.”

Uno vyuma muka vinakafwe vatu vakufwana nge Daniel naAndre valivwisenga kuwaha kuzata nangolo? Vanakavangizanga jindongi jamuMbimbiliya mukuyoya chavo. Mbimbiliya kayakanyisa vatu kuzata nangoloko, oloze yavakolezeza vazatenga nangolo nakupwa nalukakachila. Chipwe ngocho, Mbimbiliya kayatulweza kaha tuzate milimoko, oloze yatulweza nawa omu tunahase kulivwisa kuwaha kuzata milimo yetu.

Jindongi muka jamuMbimbiliya najimikafwa musuuluke namilimo muli nakuzata? Tuli nakumilomba mukekese jindongi jimwe jize vanashimutwila muchihande chinakavangizaho.