Mukanda waEncyclopædia Britannica walumbununa chilika chaIshita ngwawo “chapwa chiwanyino chachilemu chavaka-Kulishitu chakwanuka Kusanguka chaYesu Kulishitu.” Uno chikupu vene chilika kana chapwa chavaka-Kulishitu nyi?

Hakusaka tuwane muchano wachuma chakushikulu, twatela kuchikekesa kanawa mijimbu yahanjika hachuma kana. Chochimwe nawa, hakusaka twijive nge chilika chaIshita chapwa chavaka-Kulishitu nyi chiku, twatela kukekesa mijimbu yahanjika haIshita.

Chatete, Yesu alwezele vaka-kumukavangiza vanukenga kufwa chenyi, keshi kusanguka chenyiko. Kaposetolo Paulu avulukile chilika kana ngwenyi “kulya chaMwata chachingoloshi.”—Wavaka-Kolinde 1, 11:20; Luka 22:19, 20.

Kaha nawa mukanda woumwe waEncyclopædia Britannica wahanjika ngwawo vyuma veji kulinganga hachilika chaIshita “kavyapandama” kukusanguka chaYesuko, oloze vyafuma kuvisemwa vyavatu.” Chakutalilaho, hakuhanjika havifwanyisa vyaliulu nambwanda vize veji kuzachisanga chikuma hachilika chaIshita, mukanda waThe Encyclopedia of Religion wamba ngwawo: “Liulu lyemanyinako kuyoya chize chili nakufuma muchiyau chaliulu nge linatetuka.” Wahanjika nawa ngwawo: “Mbwanda vamutachikiza kupwa kanyama walusemo chikuma, ngocho eji kwimanyinako kwiza changonde yanonga.”

Philippe Walter, mutu alinangula chikuma vyamikanda yakushikulu alumbunwine omu vaputukile kuzachisa visemwa kana haIshita. Asonekele ngwenyi “omu vilika vyamukwitava chamakuli vyaputukile kwingila mukwitava chavaka-Kulishitu,” chapwile chachashi kwalumuna chiwanyino valingilenga vatu vakuzeneka kwitava “kusongo yangonde yachishika mangana vasambilile ngonde yanonga,” chipwenga jino chakwanuka kusanguka chaYesu. Walter ambile cheka ngwenyi echi chasokolwele jila yakuhaka “vilika valingilenga vaka-Kulishitu” mukalenda yavatu vakuzeneka kwitava, nakukoka vaka-Kulishitu vavavulu vapwenga mukwitava chamakuli.

Mulwola lwavaposetolo, kwitava chamakuli kachalifutwile nakwitava chavaka-Kulishituko, mwomwo vaposetolo vakiko vapwile ‘nakutangika’ kwitava chamakuli. (Wavaka-Tesolonyika 2, 2:7) Kaposetolo Paulu ambile ngwenyi ‘omu mwakalinga hanayi lyehi,’ nakukakatuka “malunga vamwe navakahanjika vyuma vyakuhingama mangana vakakoke tumbaji vakavakavangizenga vakivo.” (Vilinga 20:29, 30) Kusongo yalikulukaji lyamyaka lyakulivanga, kaposetolo Yowano asonekele ngwenyi malunga vamwe vapwilenga nakuhungumwisa vaka-Kulishitu. (WaYowano 1, 2:18, 26) Ngocho vaputukile jino kulinga vilika vyavatu vakuzeneka kwitava.

Oloze vatu vamwe vanahase kwamba ngwavo kwitavisa vilika vimwe vyaIshita kachapwile chakuhengako, mwomwo chakafwile “vatu vakuzeneka kwitava” vevwishise kusanguka chaYesu. Oloze Paulu kachi ketavilileko. Numba tuhu atambwojokelenga mujingalila jamuWangana wavaLoma muze vatu valingilenga vilika vyamukwitava chamakuli, oloze kavizachishilenga hakunangula vatu vyaYesuko. Ahuhumwine vaka-Kulishitu ngwenyi: “Kanda namulikasa toka yakuzeneka kutela navaka-kuhona kwitavako. Mwomwo kulikata muka chili mukachi kakwoloka naupapwoki? Nyi kulikata muka chili mukachi kamumunyi namilima? ‘Shikaho fumenu muli vakivo, lihandununenuko,’ mukiko mwanambe Yehova, ‘kaha echenu kukwata chuma chamajilo.’”—Wavaka-Kolinde 2, 6:14, 17.

Vyuma muka tuwane hakukekesa mujimbu kanou? Mujimbu kana unasolola hatoma nge chilika chaIshita kachapwa chavaka-Kulishituko.