Mutu uze apwile kaLoma apwile nalisesa lyakulinga vyuma vimwe kweshokwo ayilenga muwangana wavaLoma. Mutu kana vatelele kumusopesa kweseka najishimbi jalifuchi lyaLoma, keshi najishimbi jamujingandako. Kachi nge navulumuna mulonga, nahase kwitavila vamusopese kweseka najishimbi jamunganda. Oloze apwile nawa nalisesa lyakutwala mulonga wenyi kuzango yayinene yavaLoma. Kachi nge vanamuwane namulonga, kaha vanamutongwela kufwa, apwile nalisesa lyakulomba mangana chihande chenyi vakachisope kuli mwangana wavaLoma.

Hakuvuluka lisesa kaneli, Cicero, chilolo wamuLoma wamulikulukaji lyamyaka lyakulivanga B.C.E., ambile ngwenyi: “Wapwa mulonga kukasa mutu uze apwa kaLoma. Kumuveta chapwa hiukenya. Kumujiha nawa chapwa nge hikujiha chisemi chove chipwe kausoko kove.

Kaposetolo Paulu ambulwilile chikuma mujimbu mungalila yaWangana wavaLoma. Azachishile lisesa lyenyi hakupwa kaLoma mapapa katatu. (1) Alwezele vachambamilonga vakuFwilipi ngwenyi vahokwele lisesa lyenyi hakumuveta. (2) Azachishile lisesa kaneli muYelusalema kuchina navamuveta. (3) Alombele chihande chenyi vakachisope kuli Kesale mwangana waLoma.—Vilinga 16:37-39; 22:25-28; 25:10-12.

Yakova afungile mikoko janatwenyi Lavane hamyaka 20. Azachile mulimo kana hamyaka 14 mangana ambate vana vaLavane vamapwevo vavali. Kaha myaka 6 afungililile vimuna. (Kuputuka 30:25-33) Mangazini yimwe yamba ngwayo: “Chivwasano chakufungila mutu vimuna ngana chize valikashile vaLavane naYakova chapwile chawenyembo kuli vaka-kusoneka vakushikulu, navaka-kutanga Mbimbiliya.”—Biblical Archaeology Review

Mijimbu yakushikulu yize vavumbwojola kuNuzi, nakuLarsa, nakuvihela vyeka muIraq makumbi ano vyasolola vivwasano kana. Vatu valikashilenga chivwasano kana kamwe mumwaka, kufuma halwola lwakuteula mikoko nakuheta kulwola lukwavo. Tufunga vetavililenga kulama vimuna vavihwevo navakomba, vana chipwe vaze vanakolo. Hakukuma chamwaka, mwenyavimuna vamunehelelenga mangona amikoko, namavele, navana vamikoko, navyuma vyeka kweseka namuze valitongwelele. Kaha vize vyalitulilengaho vyapwilenga vyakafunga.

Kuvula chamikoko chapendaminyine hakuvula chamikoko vavihwevo alaminenga kafunga. Mikoko vavihwevo 100 vatelele kusema vana 80. Nge mikoko vamwe vanajimbala, kaha kafunga ashishishilengamo veka. Shikaho atelele kuhaka muchima kumulimo wenyi wakuzakama vimuna vaze vamuhanyine kulama.