“Yehova kalunga amutwalile mutu, amutwamishile mumilemba yaetene mangana ayilimenga ayilamenga. yehova kalunga amulwezele mutu ngwenyi, kumitondo yoseneyi yili mumilemba nauhasa kulyangako tuhu. oloze kumutondo wakutachikijila kuwaha nakupihya kanda ukalyakoko, mwomwo halikumbi lize naukalyako naukafwa chakufwa.”—kuputuka 2:15-17.

Kalunga ahakile mutu watete Alama mumilemba yaEtene yize yapwile natunyama namitondo yamwaza. Mwapwile nawa mitondo yamihako yize vetavishile Alama kulyako tuhu. Oloze Yehova Kalunga amukanyishile kulya kumutondo umwe, nakumuhuhumuna ngwenyi nge mwalyako mwafwa.

Uno Alama evwishishile kanawa lushimbi kana tahi? Alama atachikijile kanawa omwo chapwa kufwa, mwomwo amwenenga tunyama vali nakufwa. Nge Alama vamutengele ngwavo akafwe kulutwe, kachi lushimbi vamuhanyine lwapwile lwamokomoko. Oloze Alama atachikijile ngwenyi nge mwononoka Kalunga nakuhona kulya kumutonda kana, kaha keshi kufwako, oloze mwayoyanga haya myaka yosena.

Vatu vamwe vafwelela ngwavo uze mutondo vakanyishile Alama wemanyinyineko kulisavala chalunga napwevo. Oloze omu keshi mukikoko. Mwomwo Yehova asakile Alama napuwenyi Eve ‘vaseme vavule chikuma, vasulise hamavu.’ (Kuputuka 1:28) Shikaho mutondo vamukanyishile wapwile mutondo uvene. Yehova auvulukile ngwenyi ‘mutondo wakutachikijila kuwaha nakupihya’ mwomwo wemanyinyineko lisesa atwama nalyo lyakulweza vatu vyuma vyamwaza navyevi vyavipi. Ngocho, kachi nge Alama kalile kumutondo kanako, kachi asolwele nge asakwilila nakwononoka Kalunga uze amutengele nakumukisula mwamunene.

‘Kalunga ambile kuli Alama ngwenyi, Mwomwove unali kumutondo kana ngwakulwezele, naulyanga kulya chove namavule akumeso ove, palanga nomu naukalumuka cheka kupwa mavu, mwomwo kukiko vene ngwakulowele, mwomwo unapu ulukungu, kaha naukalumuka cheka kupwa lukungu.’—Kuputuka 3:17, 19.

Alama alile kumutondo uze vamukanyishile. Kulikanga kana chapwile hichihande chachinene chikuma. Chasolwele nge nakane vyuma vyamwaza vyosena vize amulingililile Yehova. Hakulya muhako kana, Alama akanyine Yehova nakusaka kulimanyina ivene, kahechi chamunehelele ukalu.

Kutwala muze, Alama afwile ngana muze ambile Yehova. Kalunga atengele Alama “nalukungu lwahamavu,” kaha amulwezele ngwenyi mwakalumuka “cheka kupwa mavu.” Ngocho omu Alama afwile, kalumukile nakupwa chuma cheka chakuyoya chipwe kuya nakuyoyela kuchihela chekako. Oloze afwile nakwalumuka cheka kupwa lukungu, kue afumine.—Kuputuka 2:7; Muka-kwambulula 9:5, 10.

“Shili yengilile mukaye kuhichila muli mutu umwe nakufwa nawa kuhichila mushili, ngocho kufwa chatanda kuli vatu vosena mwomwo vosena valingile shili.”—Wavaka-Loma 5:12.

Kulikanga chipwe ngwetu shili alingile Alama yanehel ukalu waunene chikuma. Ajimbalishile kuyoya chahaya myaka yosena, keshi kuyoya chamyaka 70 chipwe 80 yize vali nakuyoyanga jino vatuko. Kaha nawa kapwile jino wakukupuka mwosenako, ngocho atambwishileko vana venyi kuhona kukupuka mwosena.

Tuvosena twafuma kuli Alama, ngocho twaswana mijimba yakuhona kukupuka mwosena yize yafwila kulinga shili, kaha kutwala muze hikufwa. Omu mukiko amwene Paulu. Ambile ngwenyi: “Ami ngumutu wakumusonyi, valanjisa lyehi muundungo washili. Omu ngwavindama ami! Iyaze mwanguyovola kumujimba uno uli nakungutwala kukufwa kanechi?” Oloze alikumbulwile ivene ngwenyi: “Ngunamusakwilila Kalunga kuhichila muli Yesu Kulishitu Mwata wetu!”—Wavaka-Loma 7:14, 24, 25.

“Setu Atuma lyehi Mwanenyi kupwa Mulwilo wakaye.”—WaYowano 1, 4:14.

Yehova Kalunga alongesele jila yakukumishilamo shili nakutusokola kukufwa mangana tuyoyenga haya myaka yosena. Mujila muka? Atumine Mwanenyi azanga kufuma mwilu ezenga nakusemuka mwamutu wakukupuka mwosena ngana muze apwile Alama. Yesu “kalingile shili,” ngana mwaAlamako. (WaPetulu 1, 2:22) Hakuwana nge apwile wakukupuka mwosena, kapwile mulushingo lwakufwako, ngocho atelele kuyoya haya myaka yosena mwamutu wakukupuka mwosena.

Oloze Yehova etavishile Yesu vamujihe kuli vaka-kole jenyi. Omu mwahichile makumbi atatu, amusangwile nakumuhana mujimba wakushipilitu mangana ahiluke mwilu. Hakuheta mwilu, Yesu ahanyine Kalunga kuyoya chenyi chakukupuka mwosena kupwa ndando yize nayikindulwisa kuyoya chize ajimbalishile Alama. Yehova etavilile uze wana, nakulingisa jino vosena vaze navafwelela Yesu vakayoye haya myaka yosena.—Wavaka-Loma 3:23, 24; WaYowano 1, 2:2.

Yesu akindulwishile kuyoya chize ajimbalishile Alama. Ayanjile nakutufwila mangana tukayoye haya myaka yosena. Mbimbiliya yamba ngwayo: ‘Yesu ahichile muluyando lwakutwala kukufwa, mangana halikoji lyalinene lyaKalunga, akahase kufwila vatu vosena.’—WavaHepeleu 2:9.

Ou wana wasolola vyuma vyavivulu hali Yehova. Chiyulo chenyi chachinene chikiko chalingisa etu vatu vakuhona kukupuka mwosena vatusokole. Oloze zangi nakeke yenyi vikiko vyamulingishile alisuule mwamunene nakutuhana Mwanenyi azanga kupwa ndando yakusokola.—Wavaka-Loma 5:6-8.

“Kulishitu vamusangula kuvafu, ikiye mihako yatete yavaze vanasavala lyehi tulo twakufwa. Hakuwana nge kufwa chejile kuhichila muli mutu umwe, ngocho nakusanguka chavafu nawa cheza kuhichila muli mutu umwe. Mwomwo nganomu vali nakufwa vosena muli Alama, ngocho nawa muli Kulishitu mukiko vene navakayoyesela vosena.”—Wavaka-Kolinde 1, 15:20-22.

Katweshi kuhasa kuhuhwasana ngwetu Yesu ayoyele mwamutu hano hamavu nakufwako. Jino unjiho muka wasolola nge asangukile kuvafu? Unjiho umwe waunene shina wakwamba nge omu Yesu asangukile alisolwele kuvatu vavavulu kuvihela vyakulisezaseza nahalwola lwakulihandununa. Lwola lumwe alisolwele kuvatu vakuhambakana 500. Kaposetolo Paulu asonekele vyamujimbu kana mumukanda wenyi asonekelele vaka-Kolinde, nakwamba ngwenyi vinjiho vamwe vaze vamwene vyuma kana vachipwile lika nakuyoya. Echi chalumbunwine nge vatu kana vahashile kuhana unjiho havyuma vamwene nakwivwa.—Wavaka-Kolinde 1, 15:3-8.

Omu Paulu asonekele ngwenyi Kulishitu “Ikiye mihako yatete” yavaze navakasanguka, apwile nakusolola nge navatu veka navakasanguka. Yesu ivene ambile ngwenyi lwola nalukeza, kaha ‘vosena vaze vali muvimbumbe navakalovokamo.’—Yowano 5:28, 29.

“Kalunga azangile chikuma kaye ngocho ahanyine mwanenyi umwe kaha wakulipwila, mangana ngwenyi wose mwasolola lufwelelo muli ikiye vakahone kumunongesa, oloze akapwe nakuyoya chahaya myaka yosena.”—Yowano 3:16.

Chihanda chaMbimbiliya chakulivanga chatulweza vyalwola chejile kufwa nomu Palachise yajimbalile. Chihanda chamakumishilo chatulweza vyalwola navakafumisako kufwa nomu Kalunga mwakaneha cheka Palachise hamavu. Halwola kana vatu navakayoya kanawa nakuwahilila haya myaka yosena. Mukanda waKusoloka 21:4 watulweza ngwawo: “Kufwa kacheshi kukapwako chekako.” Hakusaka kusolola omu lwazama lushiko kana, vesi 5 yamba ngwayo: “Mazu awa atela kuwafwelela kaha amuchano.” Eyo, nge Yehova nashiki vyuma eji kuvitesangamo chikupu.

Kutala mwafwelela ngwenu “mazu awa atela kuwafwelela kaha amuchano” nyi? Linangulenu vyuma vyavivulu hali Yesu Kulishitu nakumufwelela. Nge namulinga ngocho, kaha Yehova mwamivwila kuwaha. Mwamikisula mwamunene nakukamihana nawa kuyoya chahaya myaka yosena muPalachise hamavu muze kamweshi kukapwa kufwako, “kaha nawa kakweshi kukapwa cheka kulishona, chipwe miteto, chipwe kukolako.”