CHIHANDE CHACHINENE | YESU MWAKATULWILA KUVYUMA MUKA?
Mwomwo Ika Vatela Kutulwila?
“Mutu wakusemuwa kuli pwevo napu wamakumbi amandende, wakumona kupinda chachivulu. Mwasoka nge lutemo, kaha hinavamukambako. Mwachina nawa nge mwamuvwimbimbi, keshi kwililako.”—Yopa 14:1, 2.
Putu kushikulu, vatu vanashinganyekanga hakuwaha vanahase kwivwa nge navayoya haya myaka yosena chakuzeneka ushinakaji namisongo. Oloze chaluvinda, tuvosena tweji kufwanga. Mazu ahanjikile Yopa myaka yakuhambakana makombakaji atatu kunyima hanga apwila lika amuchano namakumbi ano.
Vatu vavavulu vafwila chikuma kuyoya haya myaka yosena. Mbimbiliya yatulweza ngwayo Kalunga ahana vatu muchima wakufwila kuyoya haya myaka yosena nakuchishinganyekanga. (Muka-kwambulula 3:11) Uno chapwa chakutamo Kalunga wazangi kutuhana muchima kanou chakuzeneka etu kukapwa nakuyoya kana nyi? Nge munakumbulula ngwenu nduma, kaha munakumbulula mwakwoloka. Mazu aKalunga avuluka kufwa kupwa muku-kole, kaha atufwelelesa ngwawo kufwa “navakachifumisako.”—Wavaka-Kolinde 1, 15:26.
Chikupu vene, kufwa chapwa muka-kole. Kakweshi mutu wamangana nahase kuchisakako. Chakutalilaho, nge kuneza ponde, tweji kuchinanga nakuswama. Kaha nawa nge tunaviji tweji kutondatonda jijila jakutukilamo mangana tuyoye. Tweji kulinganga vyuma vyosenevi kuchina natufwa.
Kutala kuli vyuma vimwe vyatela kutulingisa tufwelele ngwetu ou muka-kole natuyanjisanga hamyaka yayivulu navakamufumisako tahi? Eyo, kuvili. Tengi yetu Yehova Kalunga katengele vatu ngwenyi vayoyenga myaka yayindende kaha nakufwako. Kalunga kajinyine ngwenyi vatu vapwenganga nakufwako. Ajinyine ngwenyi vatu vayoyenga haya myaka yosena hano hamavu. Kaha vyuma ajina mwakavitesamo.—Isaya 55:11.
Uno kufwa navakachifumisako ngachilihi? Hamyaka yayivulu, vatu vanahundangana vyuma vyavivulu mangana vahone kufwa, oloze vanahono. Namakumbi ano vatu vachili nakwesejeka lika. Vaka-sayasi vanatungunga vitumbo vyakuhonesa misongo. Vanahehwojola hehwojola nawa vamone omu vatunga mijimba yetu. Ngocho, mumafuchi amavulu vatu vamwe vali nakuyoya myaka yayivulu kuhambakana omu vatu vayoyelenga hamyaka likulukaji kunyima. Oloze kufwa vanahono kuchifumisako. Mbimbiliya yamba ngwayo “vosena navalumuka cheka kupwa lukungu.”—Muka-kwambulula 3:20.
Katwatela kufwelela ngwetu vatu vakwechi mangana akukumisa ou ukalu tunalipikinga nawo hamyaka yayivuluko. Yehova Kalunga nalongesa lyehi jila yakutusokwelamo kukufwa. Jila kana yapendamina hali Yesu Kulishitu.
