Tunatachikiza vene ngwetu vatu navatwalaho lika kuzovoloka muvyuma vyasayasi. Oloze kaveshi kuhasa kuneha fulumende yize nayilingisa vatu vatwame mukuunda navakwavoko. Mwomwo makumbi ano vatu vavavulu valizanga vavene kaha nawa vali namuchima wachipululu. Oloze Kalunga ajina kulingila vatu vyuma vyamwaza.—Tangenu WaPetulu 2, 3:13.

Mazu aKalunga avuluka lifuchi lize nalikapwa navatu vaze navakalizanganga umwe namukwavo. Vatu navakatwama mukuunda, kakweshi kukapwa vyuma vimwe vyakuvevwisa womako.—Tangenu Mika 4:3, 4.

Kalunga atengele mutu chakuzeneka kupwa namuchima walifwi. Oloze hakuwana nge mutu watete akanyine kwononoka kuli Kalunga, ngachize kapwile cheka wakukupuka mwosenako. Shikaho vatu vosena jino vatwama namuchima walifwi mwomwo yamutu watete uze ahonene kwononoka kuli Kalunga. Oloze Kalunga mwakazachisa Yesu akalingise vatu kupwa cheka vakukupuka mwosena ngana muze ajinyine hakavanga.—Tangenu Wavaka-Loma 7:21, 24, 25.

Yesu afwile mwachimuna wakuvatula kweseka nakujina chaKalunga mangana akumise kulikanga chamutu watete uze alingile shili. (Wavaka-Loma 5:19) Shikaho Yesu asokolwela vatu jila yize navakalihehwelamo kulutwe kumuchima walifwi wakufwila kulinga vyuma vyavipi.—Tangenu Samu 37:9-11.