Mahongo: Ngambo uli ngachili? Ngwevwile kuwaha kukumona kuKwanuka kufwa chaYesu chalumingo chapwangaho. * Kukunguluka kana chapwile ngachilihi?

Ngambo: Nguli kanawa. Ngwevwile kuwaha kupwako oloze kuhanjika muchano, kangwevwishishile vyuma vyosena vahanjikileko. Ngunamononga vatu navalinga chilika chakusemuka chaYesu haKulisimasi, nakusanguka chenyi haIshita, oloze kanda ngumonengaho lyehi vatu navalikungulula nakwanuka kufwa chenyiko.

Mahongo: Muchano vene, viwanyino vyaKulisimasi naIshita vyalisala chikuma muno mukaye. Oloze Vinjiho jaYehova vamona kwanuka kufwa chaYesu kupwa chachilemu chikuma. Nge uli nalwola, kaha nangukulweza ovyo vamwena chuma kana kupwa chachilemu.

Ngambo: Ukalu wauchi, lwola nguli nalwo tunahase kushimutwila.

Mahongo: Vinjiho jaYehova veji kwanukanga kufwa chaYesu mwomwo alwezele vaka-kumukavangiza valingenga ngocho. Achishinganyeke havyuma vyasolokele haufuku wakukokela kukufwa chaYesu. Kutala nawanuka mujimbu umwe wakulya chakulipwila chize alingile hamwe navaka-kumukavangiza vakushishika nyi?

Ngambo: Unakuvuluka Kulya chaMwata Chamakumishilo tahi?

Mahongo: Eyo, mukiko vene. Vachivuluka nawa ngwavo Kulya chaMwata chaChingoloshi. Omu vapwile nakulya, Yesu ahanyine jindongi kuli vaka-kumukavangiza. Kutala musaka kutanga mazu ahanjikile aze vasoneka hali Luka 22:19?

Ngambo: Nangutanga. “Kaha nawa, anonele mbolo, asakwililile, ayipuzwile, kaha ayihanyine kuli vakivo nakwamba ngwenyi: ‘Eyi yinemanyinako mujimba wami ou navahana hali enu. Twalenuho lika kulinganga ngocho mungwanukilengaho ami.’”

Mahongo: Unatange kanawa. Tala mazu aYesu mumukuku wamakumishilo muvesi kaneyi: “Twalenuho lika kulinganga ngocho mungwanukilengaho ami.” Kaha nawa shimbu kanda alweze vaka-kumukavangiza kumwanukanga, Yesu avulukile hatoma vyuma vatela kwanukanga hali ikiye. Ahanjikile ngwenyi kuyoya chenyi navachihana hashili yatumbaji twenyi. Yesu asolwele vishinganyeka kana mujila yoyimwe kweseka namazu vasoneka hali Mateu 20:28. Vesi kana yamba ngwayo: “Chochimwe nawa, Mwanamutu kejile mangana vamuzachilenga milimoko, oloze mangana avazachile milimo nakuhana mwono wenyi kupwa ndando yakusokola vavavulu.” Kuli vyuma vyavivulu vinakusakiwa kulumbununa hachihande kanechi oloze kuhanjika kaha mukavatu, evi vikiko vyalingisa Vinjiho jaYehova valikungululenga mwaka himwaka vanukenga kufwa chaYesu chize ahanyine kuyoya chenyi kupwa wana wandando yakusokola. Kufwa chenyi nachineha kuyoya chahaya myaka yosena kuvatu vakwononoka.

Ngambo: Ngunevunga vatu navamba ngwavo Yesu afwile mangana tukayoyenga haya myaka yosena.  Kuhanjika muchano, ami kangwevwishisa mujila chinahase kupwila ngochoko.

Mahongo: Ngambo, keshi nge yove kaha ukawoveko. Chihande chandando yakusokola yaYesu chapwa chakujiminyina. Oloze chapwa hichihande chimwe chamwaza muMazu aKalunga. Chili wate, uno lwola hanga kuluchili tahi?

Ngambo: Lwola kuluchili, tushimutwile tuhu.

Mahongo: Kusakwililako. Ngunapunga nakutanga chihande kanechi chandando yakusokola, nangweseka kuchilumbununa mujila yayashi.

Ngambo: Chamwaza.

Mahongo: Hakusaka twivwishise chihande chandando yakusokola, chatete twatela kutachikiza ukalu wafumine hashili valingile vaAlama naEve mumilemba yaEtene. Kutanga mukanda Wavaka-Loma 6:23 nachitukafwa twivwishise chihande kana. Tanga eyi vesi.

Ngambo: Vesi yinambe ngwayo: “Mwomwo fweto yashili kufwa, oloze wana uze Kalunga eji kuhananga ukiko vene kuyoya chahaya myaka yosena kuhichila muli Kulishitu Yesu Mwata wetu.”

Mahongo: Kusakwililako. Tukekese jino mazu kana. Chatete, tala vesi omu yinaputuka: “Mwomwo fweto yashili kufwa.” Awa mazu anapu lushimbi luze ahanjikile Kalunga kumaputukilo amijimbu yakuyoya chavatu, fweto chipwe mulonga washili kufwa. Kukuputuka nawa kakwapwile mutu apwile nashiliko. Alama naEve vavatengele vakukupuka mwosena, kaha navana vavo nawa vatelele kupwa vakukupuka mwosena. Ngachize kakwatelelele kupwa vyuma vize navilingisa, mutu numba umwe afwengako. Alama naEve hamwe kaha navana vavo vosena vapwile nalisesa lyakuyoya haya myaka yosena. Oloze jino nganomu tunatachikiza lyehi, vyuma kavyapwile ngochoko. Nyi mweka?

Ngambo: Mukiko vene. Alama naEve valile kumuhako uze vavakanyishile kulya.

Mahongo: Chamwaza. Omu Alama naEve vasakwile kulikanga kuli Kalunga, valingile shili. Kulumbununa nge valisakwililile vavene kupwa vaka-shili, vatu vakuhona kukupuka mwosena. Vyuma vasakwile kulinga vaAlama naEve kavyanehele ukalu waunene kuli vavene kahako, oloze nakuli vana vavo vosena.

Ngambo: Unatalikisa mulihi?

Mahongo: Chamwaza, pamo ngukuhane chakutalilaho. Mana ngukuhulise, Watachikiza kwocha jimbolo?

Ngambo: Eyo. Mulimo kana ngwauzanga chikuma.

Mahongo: Pamo twambenga ngana ngwetu, unalande chikango chakwochela mbolo. Shimbu kanda uzachise chikango kana, hinachiholoka nakumbokama hamwe. Vyuma muka navisoloka kujimbolo nawochela muchikango kana? Uno kajeshi kupwa jakumbokamako tahi?

Ngambo: Chikupu vene, najipwa jakumbokama.

Mahongo: Chochimwe nawa, omu Alama naEve valikangile kuli Kalunga, vapwile “vakumbokama,” chipwe vatutenga mwomwo yashili nakuzeneka kukupuka mwosena. Hakuwana nge valingile shili shimbu kanda vaseme vana, ngocho vana vavo vosena vaze vasemene vapwile “vakumbokama.” Mwomwo vosena vasemukilile mushili. MuMbimbiliya, lizu “shili” kalyatalisa kaha kukulinga vyuma vyavipiko, oloze lyatalisa nawa nakushili yize twaswana. Echi jino chikiko chalingisa yami nayove numba tuhu katwavulumwine mulonga naumweko, kaha nawa halwola Alama naEve valingile shili, etu kanda tuchisemuke. Oloze shili valingile yalingisa yetu, navana vetu navatu vosena tupwenga vakuhona kukupuka mwosena, nakupwa nashili yize yeji kututwalanga kukufwa. Mazu atwama mumukanda Wavaka-Loma 6:23 avuluka ngwavo fweto yashili kufwa.

Ngambo: Chuma kana kachawahako. Mwomwo ika shili yaAlama naEve nayilingisa vatu vosena vayandenga myaka yosena?

Mahongo: Mukiko vene, chuma kana chakuhenga. Echi chikiko chalingisa Kalunga ashinge Alama naEve ngwenyi vatela kufwa kweseka nashili valingile, oloze yetu vana vavo twatwama nalutalililo. Kalunga atuwahishilile jila mangana tufume muukalu kanou. Echi chikiko chalingisa jino kupwenga ndando yakusokola yaYesu. Achitale cheka hamukanda Wavaka-Loma 6:23. Omu akumishile kuhanjika ngwenyi “fweto yashili kufwa,” vesi  yatwalililaho ngwayo: “Oloze wana uze Kalunga eji kuhananga ukiko vene kuyoya chahaya myaka yosena kuhichila muli Kulishitu Yesu Mwata wetu.” Shikaho kufwa chaYesu chikiko chatuyovola kushili nakukufwa. *

Mahongo: Kuli chishina chikwavo nguli nakusaka ngukulumbunwine.

Ngambo: Chishina muka vene ocho?

Mahongo: Vesi yinahanjika nawa ngwayo: “Oloze wana uze Kalunga eji kuhananga ukiko vene kuyoya chahaya myaka yosena kuhichila muli Kulishitu Yesu Mwata wetu.” Nge Yesu atuyanjililile nakutufwila, nakuhana kuyoya chenyi hali yetu, kaha mwomwo ika vesi yahanjikila hawana wandando yakusokola ngwayo wapwa, “wana uze Kalunga eji kuhananga”? Mwomwo ika kayahanjikila ngwayo “wana uze Yesu eji kutuhananga”? *

Ngambo: Kwiji. Kangwatachikijileko.

Mahongo: Chamwaza, Kalunga atengele Alama naEve, kahomu valikangile mumilemba yaEtene valingile shili kuli ikiye. Evwile chikuma kupihya omu vana venyi vavali vakulivanga valikangile kuli ikiye. Haze vene Yehova awanyine jila yakukumishilamo ukalu kana. * Ajinyine nge mwanenyi umwe wakushipilitu mweza hamavu, nakutwama kupwa mutu wakukupuka mwosena, nakuhana kuyoya chenyi kupwa wana wandando yakusokola. Shikaho wana wandando yakusokola wafuma kuli Kalunga. Kuli jila yikwavo nawa yize yasolola nge ndando yakusokola yapwa wana wakufuma kuli Kalunga. Kutala washinganyekaho lyehi omu Kalunga evwile hakumona mwanenyi Yesu navamujiha tahi?

Ngambo: Nduma, kanda lyehi.

Mahongo: Ngunamono vyuma vyamalengeso haweluka wazuvo. Ngunafwelela watwama navana.

Ngambo: Eyo, nguli navana vavali. Ou walunga, ou wapwevo.

Mahongo: Hakupwa uchisemi, achishinganyeke omu Ise yaYesu wamwilu Yehova Kalunga evwile halikumbi lize Yesu afwile. Hakumona Mwanenyi azanga navamukwata, nakumutoleka nakumuveta jikonyi hano hamavu? Uno Ise evwile ngachilihi hakumona mwanenyi navamupapalila hachitondo nakumuseza haze hachitondo mangana alyonyinge palanga nakukufwa chenyi?

Ngambo: Kanda ngushinganyekengaho lyehi ngochoko. Atela evwile kukola chikuma kumuchima.

Mahongo: Numba tuhu chapwa chachikalu kutachikiza omu evwile Yehova halikumbi lize, oloze twatachikiza ngwetu eji kwivwanga kumuchima kukola kaha nawa twatachikiza ovyo etavishilile vyuma kana visoloke. Vatulumbunwinavyo kanawa mumukanda uze waya fuma chikuma waYowano 3:16. Kutala musaka kutanga mukanda kana tahi?

Ngambo: Eyo. Mukanda kana wamba ngwawo: “Kalunga azangile chikuma kaye ngocho ahanyine mwanenyi umwe kaha wakulipwila, mangana ngwenyi wose mwasolola lufwelelo muli ikiye vakahone kumunongesa, oloze akapwe nakuyoya chahaya myaka yosena.”

Mahongo: Ngwasakwililako. Tala mazu ali kumaputukilo avesi kaneyi. Anambe ngwawo: “Kalunga azangile chikuma kaye.” Chuma chachinene shina zangi. Zangi yikiko yalingishile Kalunga atume Mwanenyi kwiza hano hamavu nakutufwila. Chikupu vene, ndando yawana wakusokola yasolola zangi yaKalunga yayinene. Evi vikiko vyalingisa Vinjiho jaYehova valikungululenga hamwe mwaka himwaka nakwanuka kufwa chaYesu. Kutala vyuma tunashimutwila vinakukafwe kumona vyuma tweji kwanukilanga kufwa chaYesu tahi?

Ngambo: Eyo, ngunevwishisa jino. Ngwasakwililako hakushimutwila vyuma kanevi nayami.