Uno mwalihulisaho lyehi vihula vyakufwana nganevi nyi? Nge mukiko, kaha kamweshi ukawenuko. Vatu mukaye vali nakushinganyeka mwakukumbulwila vihula vyavilemu vyamukuyoya. Kutala munahase kuwana muvakumbulwila vihula kana tahi?

Vatu vavavulu vanakumbululanga ngwavo, “Eyo.” Mwomwo ika? Mwomwo vanawane muvakumbulwila vihula kana muMbimbiliya. Uno muli nakusaka kutachikiza vyuma yahanjika Mbimbiliya tahi? Munahase kutachikiza vyuma yahanjika hakulinangula Mbimbiliya naVinjiho jaYehova hawana wakanyombo. *

Vatu vamwe kaveshi kutanga Mbimbiliyako mwomwo ngwavo: “Vatwama namilimo chikuma, chipwe ngwavo yayikalu kwivwishisa. Chipwe ngwavo nayivalila lwola lwavo.” Oloze veka vashinganyeka mujila yeka. Veji kwitavila kulinangula Mbimbiliya mangana vatachikize ovyo yanangula. Achitalenu havyakutalilaho vimwe vino:

• Gill, wakuEngland ambile ngwenyi: “Ngwapwilenga muchachi yaKatolika namuchachi yaPolotesitati, namukwitava vavuluka ngwavo Sikhism, namuBuddha, nakwazana mukulinangula vyaukalunga hashikola yayunivesiti. Oloze vihula vyami vyavivulu kutalisa kuli Kalunga kavavikumbulwileko. Chinjiho chaYehova umwe ejile hembo lyami. Ngwalikomokelele chikuma omu akumbulwile vihula vyami vyosena kuzachisa Mbimbiliya. Ngachize ngwetavilile kulinangula Mbimbiliya.”

• Koffi, wakuBenin ambile ngwenyi: “Ngwapwile navihula vyavivulu kutalisa kukuyoya, oloze vyuma angukumbulwilenga pashita wakuchachi ngwapwilenga, kavyanguhetele hamuchimako. Oloze Chinjiho chaYehova umwe akumbulwile vihula vyami kuzachisa Mbimbiliya. Kaha anguhulishile numba nge ngwapwile nakusaka kulinangula vyavivulu, ngocho ngwetavilile kulinangula.”

• José, wakuBrazil ambile ngwenyi: “Ngwapwile nakufwila chikuma kutachikiza vyuma vyeji kusolokanga kuvafu. Ngwafwelelele ngwami vafu vanahase kuvulumuna vavatonyi, oloze ngwasakile kutachikiza vyuma yahanjika Mbimbiliya. Shikaho ngwaputukile kulinangula Mbimbiliya nasepa lyami uze apwile Chinjiho.”

• Dennize, wakuMexico ambile ngwenyi: “Ngwesekele kutanganga Mbimbiliya oloze kangwayivwishishileko. Kaha Vinjiho jaYehova vejile nakungulumbunwina upolofweto wauvulu wamuMbimbiliya. Ngocho ngwasakile kulinangula navyuma vyeka nawa.”

• Anju, wakuNepal ambile ngwenyi: “Ngwahuhwasanyine numba nge Kalunga eji kunguzakamanga. Ngocho, ngwalombele kuli Kalunga mwenya Mbimbiliya. Lichako Vinjiho vejile nakungongomweza hachikolo chami, kaha ngwetavilile kulinangula Mbimbiliya.”

Vyakutalilaho kanevi vyatwanukisa mazu aYesu akwamba ngwavo: “Vawahilila vaze vejiva ngwavo vasaka vyuma vyakushipilitu.” (Mateu 5:3) Eyo, vatu vafwila kutachikiza vyuma vyakushipilitu. Oloze Kalunga kaha yikiye nahase kuvakafwa vatachikize vyuma kana kuhichila muMazu enyi Mbimbiliya.

Uno vyuma muka vyaliweza mukulinangula Mbimbiliya? Munahase kunganyala ngachilihi? Vihula kanevi navavikumbulula muchihande chinakavangizaho.