Visoneka VyachiHelase vyaVaka-Kulishitu vyavuluka mapapa kakavulu tupitau vamaswalale vavaLoma. Mukulwane wamaswalale uze atwaminyinyine vaze vasukikile Yesu apwile nayikiye kapitau, mulimo uze azachilenga naKolonelyu Muka-lifuchi lyeka uze apwile watete kwalumuka nakupwa muka-Kulishitu. Mukulwane wamaswalale uze atwaminyine vaze vapwile nakuveta kaposetolo Paulu, naYulyu uze ashinjikijile Paulu kuLoma navakiko vapwile tupitau vamaswalale.—Mako 15:39; Vilinga 10:1; 22:25; 27:1.

Kakavulu kapitau atwaminyinyinenga maswalale vakuheta ku 50 chipwe 100. Azachilenga milimo yayivulu yakufwana nge kulongesa maswalale, nakuvazangamisa, nakukekesa kanawa uvwalo wavo navyuma vyavo vyakuzachisa mujita. Avalwezelenga nawa nalwola lwakutela kulizanga kulwa jita.

Chihela chakupwa kapitau kamaswalale chikiko kaha ahetelenga liswalale hiliswalale uze kalinangula chikumako. Maswalale vaze vapwilenga hachihela kana vapwile kuvanga vasachiteta hundu muuswalale. Mulimo wakuzangamisa vakwavo maswalale nakulingisa milimo yitambuke kanawa vyapendaminyine hali vakiko. Mujimbu umwe wahanjikile ngwawo, tupitau vamaswalale “vapwile vasachiteta hundu, kaha nawa himalunga vakujikiza muuswalale.”

Vitalilo vyakushikulu vavitungishile vikungo vize vafulilenga nakuvivyakumisa, vyakufwana nge unengu, palata, naulu. Lwola lwatete kuvuluka vitalilo muMbimbiliya shina luze vatungile tavanaku, chihela chavaIsalele chatete chakulemesela Kalunga. Mapwevo vahanyine vitalilo mangana vatungise mbashiya yaunengu nachitumbikilo chayo. (Kulovoka 38:8) Vize vitalilo vavangililenga kuvizuzulula numba jino vavizachise kumulimo kanou.

Vaka-kuvumbwojola vyakushikulu vaze valinangula vyasayasi vanawane nge, vitalilo vize vanavumbwojola muIsalele namuvihela vize vyahatako vanaviwanenga navimbilingwa navyuma vyeka vyakulisukijeka vize vazachishilenga mapwevo. Vitalilo kana vavifulilenga vyamujingulule kaha vahakileko chikundo chamutondo chipwe chachikungo chipwe chamazo avanjamba. Kakavulu chize chikundo chafwanyinenga nge munwe wapwevo. Kusali yimwe yachitalilo kuze kavavyakumishileko, kavahakileko vyuma vyaunyojiko.

Vitalilo vyamakumbi ano kavyalifwana navize vyakushikuluko, mwomwo vyakushikulu vyapwile vyakufuvalala hakulitalilaho. Echi pamo chikiko chalingishile kaposetolo Paulu ahanjike ngwenyi: “Mwomwo oholyapwa tuli nakumona vyuma mukufuvalala hakutalila muchitalilo chachikungo.”—Wavaka-Kolinde 1, 13:12.