Ngwakolelele muAncram mbaka yayindende yamuNew York, U.S.A. Vatu vavavulu vamumbaka kana valaminenga vimuna. Mumbaka kana mwapwile vangombe vavavulu chikuma kuhambakana vatu.

Tanga yetu yayilenga kuchachi yize yapwilenga mumbaka kana. LyaSondo chimene hichimene kaka apukuchilenga sapato yami, kaha ngwaliwahishilenga nakumbata Mbimbiliya yami yize anguhanyine kaka wapwevo nakuya kushikola yahaSondo. Yami nasongo yami wapwevo nou walunga vatunangwile kuzata nangolo, nakuvumbika vatu twalihachile navo nakuvakafwa, nakusakwilila kutokwa twapwile nacho.

Omu ngwakolele ngwafumine hembo nakuya nakuzata milimo yaulongeshi. Ngwalihulishilenga vihula vyavivulu vyakusaka kutachikiza Kalunga nomu chapwa kuyoya. Vaka-shikola vamwe vaze ngwanangwilenga vapwile namangana chikuma. Veka kavapwile namangana chikumako oloze vesekelengako chindende. Vaka-shikola vamwe kavapwile vakulikangula kanawako, oloze vakwavo vapwile vakulikangula. Ngwevwilenga kupihya chikuma hakumona ukalu uze vamwenenga vaka-shikola vamwe. Shimbu jimwe visemi javaze vanyike vapwile naukalu vahanjikilenga ngwavo, “Kalunga ikiye najinyi ngwenyi mwanami apwenga ngana.” Ngwalihulishilenga ngwami, mwomwo ika Kalunga mwetavishila vakemba vamwe vasemuke naukalu ngana? Kemba katela kusemuka naukaluko mwomwo nevi nalingi vene vyauchi.

Ngwalihulishilenga nawa ngwami, ‘Chuma muka chachilemu ngwatela kulinga mukuyoya chami?’ Ngwamwenenga nge makumbi akuyoya chami apwilenga nakukuma washi. Ngwakolelele mutanga yamwaza, ngwayile kushikola yamwaza, kaha nawa ngwazachile milimo yize ngwazangile. Oloze ngwamwene nge nevi ngwanganyalile mukuyoya chami vene vyauchi. Ngwashinganyekele kusomboka, nakupwa nazuvo yamwaza, nakupwa navana, nakutwalaho lika kuzata milimo swi nakulwola nangukatambula litayamende, kufumaho nge ngunashinakajiwa nangukaya kumembo akulamina tushinakaji. Ngachize ngwashinganyekelenga numba nge kuyoya mukiko chapwa vene ngana.

Halwola lumwe yami navakwetu milongeshi twayile nakutala lifuchi lyaEurope. Twayile kuWestminster Abbey, nakuNotre-Dame de Paris, namuVatican nganda yaRome, twakatalile najichachi jajindende jamunganda kana. Kwosena kuze ngwayile ngwahulishilenga vihula vize vyapwile kumuchima wami. Omu ngwakindulukile kwimbo lyami kuSloatsburg, muNew York, ngwayilenga kujichachi jakulisezaseza. Oloze vyuma vangukumbulwile kavyanguhetele hamuchimako.

 Likumbi limwe, muka-shikola umwe wamyaka yakusemuka 12 ejile nakunguhulisa vihula vitatu. Chatete, anguhulishile numba nge ngwamwijivile ngwami apwile Chinjiho chaYehova. Ngwamukumbulwile ngwami eyo. Chamuchivali, anguhulishile amone nge ngwasakile kutachikiza vyuma vyavivulu hali Vinjiho jaYehova. Ngwamukumbulwile nawa ngwami eyo. Chamuchitatu, anguhulishile ngumulweze okwo ngwapwile nakutwama. Omu ngwamulweze chihela ngwapwile nakutwama, twawanyine jino nge ngwatwaminenga kwakamwihi navisemi jenyi. Kangwatachikijile ngwami vize vihula vitatu anguhulishile uze kanyike wapwevo navyalumuna kuyoya chamiko.

Nakushimbula chiku, ambachile kinga yenyi nakwiza hembo lyami kaha aputukile chilongesa chaMbimbiliya nayami. Ngwamuhulishile vihula vize ngwahulishilenga vatwamina vamukwitava vavavulu. Angulwezele kanawa muvakumbulwila vihula kana kuzachisa Mbimbiliya yami, kaha vyuma angukumbulwile kanda nguchivivwengaho lyehi.

Vyuma ngwalinangwile kufuma muMbimbiliya vyangwivwishilenga kuwaha kaha nawa vyangusuulwishile. Ngwawahililile chikuma omu ngwatangile mukanda WaYowano 1, 5:19, uze wahanjika ngwawo: “Kaye kosena katwama mumavoko ayauze wakuhuka.” Ngwasuulukile hakulinangula nge Satana ikiye ali nakuneha lamba lyosena tuli nakumona mukaye keshi Kalungako. Kaha nawa Kalunga mwakafumisako lamba kaneli vali nakumona vatu. (Kusoloka 21:3, 4) Ngwamwene jino ngwami nge Mbimbiliya navayilumbununa kanawa, kaha mutu mwevwishisa kanawa. Numba tuhu uze Chinjiho apwile nakulinangula nayami apwile namyaka yakusemuka 12, oloze ngwashinganyekele ngwami muchano wapwa muchano chamokomoko namutu mwauhanjika.

Ngwasakile nawa kumona numba nge Vinjiho vakavangijilenga vyuma vize vanangwilenga. Chakutalilaho, uze kanyike angunangwilenga, ahanjikilenga ngwenyi vaka-Kulishitu vatwama navilinga vyakufwana nge, kutalilila chikoki nalikoji. (Wavaka-Ngalesha 5:22, 23) Ngwasakile kumweseka mangana ngumone numba nge akavangijile vilinga kana. Likumbi limwe ngwashinganyekele ngwami kangweshi kukinduluka washi hemboko, mwomwo ngwejivile ngwami apwile nakunguvandamina tukalilongese. Ngwalihulishile ngwami: ‘Uno mwatwalaho lika kunguvandamina tahi? Uno mwapihilila hakuwana nge ngunakotokela kukinduluka tahi?’ Oloze omu ngwahetele kwakamwihi nazuvo ngwamumwene nemana kuchikolo chazuvo yami. Kaha ejile kumunyau nakuhanjika ngwenyi: “Hasalanga hahandende kachi ngunakinduluka hembo nakulweza vamama vatumine kuvipatela nakutupokola mangana tutachikize numba nge muli kanawa, mwomwo kanda lyehi ngumimone namwiza oholyapwako. Ngwalizakamina chikuma.”

Likumbi likwavo, ngwamuhulishile chihula chimwe chachikalu chikuma chize ngwashinganyekele ngwami hakupwa kanyike keshi kuhasa kuchikumbululako. Ngwasakile ngumone numba nge mwangulweza kaha vyuma vyamumutwe wenyi. Omu ngwamuhulishile chihula, angutalile swi nakungulweza ngwenyi: “Chihula kana chachikalu. Nanguchisoneka mangana ngukahulise visemi jami.” Omu twaliwanyine cheka nakulinangula, angunehelele Kaposhi Kakutalila uze akumbulwile chihula chami. Echi chikiko changulingishile ngulikate naVinjiho, mwomwo mikanda yavo yakumbulwilenga vihula vyami vyosena kuzachisa Mbimbiliya. Ngwatwalileho lika kulinangula nauze kanyike wapwevo, kaha omu mwahichile mwaka umwe vangumbapachishile nakupwa jino nguChinjiho chaYehova. *

Omu vihula vyami vyosena vavikumbulwile, ngwasakile kulwezako vatu veka vyuma kana. (Mateu 12:35) Hakavanga vausoko wami vangufumbukilile mwomwo yavyuma ngwafwelelele. Oloze mukuhita chalwola valumwine michima yavo. Shimbu kanda mama afwenga, aputukile kulinangula Mbimbiliya. Numba tuhu afwile shimbu kanda vamumbapachise, ngwafwelela ngwami asakwile kuzachila Yehova.

Mu 1978, ngwasombokele kuli Elias Kazan uze apwile Chinjiho chaYehova. Kuheta mu 1981, vatusanyikile kuya nakuzachila haMbetele yamuUnited States. * Oloze mwahichile myaka yiwana kaha Elias afwile. Numba tuhu ngwapwile ngutuliwe, oloze ngwatwalileho lika kuzachila haMbetele, kuzata milimo kana changukafwile chikuma nakunguvendejeka.

Mu 2006, ngwasombokele kuli Richard Eldred, uze nayikiye azachililenga haMbetele. Yami naRichard twalivwishilenga kuwaha kuzachila haMbetele. Kufuma vene haze vanguhulishile vihula vitatu kuli uze kanyike wapwevo, ngunatachikiza jino muchano wakuvuluka Kalunga nakuwana nawa muvakumbulwila vihula vyami vize ngwahulishilenga. Chuma chachinenenyi ngunatachikiza mwalumbunukila kuyoya.