Ngwakolelele munganda yaMontreal, kaha chapwile chachikalu kuwana milimo munganda kana. Omu ngwapwile natukweji 6 kufuma hakusemuka, tata afwile, ngocho mama apwile jino namulimo wakuzakama tanga. Twasemuka 8, kaha ami yami kasulasongo.

Omu ngwapwile nakukola, ngwanwinenga maundu akupendesa, nakuhema njuka, nakwazana muvilinga vyaulyanyi, nakulikata navihwanga. Kahomu ngwapwile namyaka yakusemuka 10, ngwazachilenga mulimo wakulanjilanga vyuma vaka-ujila vaze vangutuminenga mangana vanguhane jimbongo. Ngwakongweselenga nawa vatu jimbongo hakalyapoko. Kakavulu ngwongelenga vatu nakuvatambula vyuma mulizangamina. Eyi yapwile jino tato yami.

Omu ngwapwile namyaka yakusemuka 14, ngwatachikijile kanawa jijila jakwongelamo vatu. Chakutalilaho, ngwalanjilenga jiloloji jajivulu jaulu, natuzeya twaulu, nausanga waulu, nakusonekaho pezo yaulu yakuheta kujikalate 14, nakuvilanjisa mumikwakwa, nakuvatu vaze vejilenga kuvitanda. Ngwevwilenga kuwaha chikuma kuwana jimbongo mujila yayashi. Likumbi limwe ngwawanyine jimbongo jakuheta kujindola 10,000.

Omu ngwapwile namyaka yakusemuka 15, vanguhangile hashikola ngwapwile nakutangila yakuzangamisa vanyike, ngocho ngwahonene kwakutwama. Ngwasavalilenga mumikwakwa, nakuvihela vyakuhemena nakujizuvo jamasepa jami.

Kakavulu tupokola vangwihwojwelenga mwomwo yakulyapula vatu. Hakuwana nge kangwalanjishilenga vyuma vyakwivako, ngocho kavangukashilenga mukamengako. Oloze vanguzangamishilenga hakungufwetesa jimbongo jajivulu mwomwo yakulyapula vatu, nakulyonga, nakulanjisa vyuma chakuzeneka lisesa. Hakuwana nge kangwevwilenga vatu womako, ngocho ngwambachilenga jimbongo jajivulu jakalyapoko. Chuma kana chapwile chaponde, kaha shimbu jimwe ngwambachilenga uta. Lwola lumwe ngwazachilenga nalizavu lyavihwanga.

Omu ngwapwile namyaka yakusemuka 17, hakiko ngwevwile mujimbu wamuMbimbiliya. Halwola kana ngwapwile nakutwama nakajila kami uze aputukile kulinangula Mbimbiliya naVinjiho jaYehova. Oloze ngwakanyine jishimbi jamuMbimbiliya jize jahanjika  hachiyoyelo chitoma. Ngocho ngwamusezele nakuya nakutwama napwevo weka uze twalishikile kukalimbata.

Chiyoyelo chami chaputukile kwalumuka omu kajila kami wamuchivali aputukile kulinangula Mbimbiliya naVinjiho jaYehova. Ou pwevo asezele vilinga vyavipi, nakuputuka kusolola muchima wauvwovu, wakutalilila chikoki, kahechi changukunywile. Ngocho likumbi limwe, ngwetavilile kuya nakukunguluka kuZuvo yaWangana yaVinjiho jaYehova omu vangulanyine. Vatu ngwawanyine kuze vapwile vaunyoji kaha nawa vachisambo. Vatu kana valihandunwine navatu vavavulu mukaye. Kufuma vene kuunyike wami, vaka-tanga yami kanda lyehi vanguzangengaho nganomu vanguzangile Vinjiho jaYehovako. Omu Vinjiho jaYehova vangulwezele ngwavo vangunangule Mbimbiliya, ngwetavilile hahaze vene.

Vyuma ngwalinangwile muMbimbiliya vyayowele mwono wami. Ngwapwile nakushinganyeka kupupa vyuma namasepa jami vavali mangana ngufwete mikuli yanjuka yakuheta kujindola 50,000. Oloze ngwalingile kanawa kulitwamina. Vaze masepa jami vayile nakupupa vyuma. Chaluvinda, umwe vamukwachile nakumuhaka mukamenga, kaha mukwavo vamujihile.

Omu ngwatwalileho kulinangula Mbimbiliya, ngwatachikijile jino vyuma vyavivulu ngwatelele kwalumuna mukuyoya chami. Chakutalilaho, ngwalinangwile vyuma yahanjika Mbimbiliya hamukanda Wavaka-Kolinde 1, 6:10 ngwayo: ‘Veji, navaka-chipululu, navaka-kupenda, navaka-kusaula, navaka-kulyapula, kaveshi kukaswana Wangana waKalungako.’ Omu ngwatangile chisoneka kana, changulingishile ngwanuke vyuma ngwalingilenga kunyima nakusotola masoji. Ngwamwene jino nge ngwatelele kwalumuna chiyoyelo chami chosena. (Wavaka-Loma 12:2) Ngwapwile ngumutu waulyanyi, wamatoto, kaha nawa chiyoyelo chami chapwilenga chakwonga kaha vatu.

Omu ngwalinangwilenga Mbimbiliya, ngwatachikijile nge Yehova apwa wakeke, muka-kukonekela. (Isaya 1:18) Ngwalembelelenga chikuma Yehova angukafwe ngwechenga vilinga vyavipi. Kaha angukafwile nguseze vilinga kana chikoki chikoki. Kutwala muze, ami nakajila kami twasonekesele ulo wetu.

Halwola kana, ngwapwile namyaka yakusemuka 24. Twapwile navana vatatu. Ngwatelele jino kutonda milimo yamwenemwene. Oloze kangwatangile chikumako kaha nawa kangwapwile namapapilo akungukafwa ngwingile milimoko. Ngocho, ngwalombele cheka kuli Yehova mangana angukafwe. Kaha ngwayile nakutonda milimo. Ngwalwezelenga vatu vaze ngwalombelenga vangwingise milimo ngwami ngwasakile kwalumuna vilinga vyami nakuzata milimo mukashishi. Shimbu jimwe ngwavalwezelenga ngwami ngwapwile nakulinangula Mbimbiliya, kaha ngwafwilile kupwa ngumutu wamwaza muchitungilo. Oloze vavavulu vakanyinenga kungwingisa milimo. Likumbi limwe omu ngwayile nakutonda milimo, ngwambulile hatoma vyachiyoyelo chami chakunyima kumutu uze apwile nakungwihwojola vyamilimo. Ngocho ambile ngwenyi: “Muchima wami uli nakungulweza nge ngukwingise milimo, oloze kangwatachikijile ovyo nguli nakushinganyekela ngochoko.” Echi changulingishile ngutachikize ngwami Kalunga nakumbulula kulomba chami. Kutwala muze, ami napuwami vatumbapachishile nakupwa tuVinjiho jaYehova.

Nguchili nakuyoya mwomwo yakukavangiza jindongi jamuMbimbiliya nahakupwa navilinga vitoma vyavaka-Kulishitu. Nguli natanga yakuwahilila. Ngwenjikiza chikupu ngwami Yehova angukonekela, ngocho ngukwechi chivezu chitoma.

Ngunazatenga mulimo washimbu yosena hamyaka 14 nakukafwa vatu vatachikize vyuma yanangula Mbimbiliya. Kaha puwami naikiye naputuka jino kuzata mulimo washimbu yosena. Hamyaka yakuhambakana 30, ngunakafwe vakwetu ngwazata navo kumilimo vakuheta 22 vaputuke kuzachila Yehova. Oholyapwa kangweshi kuya kuvitanda nakulyapula vatu nge muze ngwalingilenga kunyimako, oloze ngweji kuyanga nakuvalweza vyuma ngwafwelela. Ngweji kuvambulilanga mangana vapwenga nalutalililo lwakukayoyela mukaye kakahya muze kamweshi kukapwa vaka-kulyapula vatuko.—Samu 37:10, 11.