Kushikulu, Kalunga azachishilenga vaka-kuyula mangana valwile vatu jenyi kuvilinga vyakuhenga. (Vaka-kuyula 2:18) Mbimbiliya yavuluka Likumbi lyaKusopesa lyakulutwe kupwa hilwola lwamwaza luze Yehova, muka-kusopesa vaze vatwama hamavu vosena, mwakalwila vangamba jenyi kuvilinga vyakuhenga.—Tangenu Samu 96:12, 13; Isaya 26:9.

Kalunga atongola Yesu mangana akasopese vavatonyi navafu mukwoloka. (Vilinga 10:42; 17:31) Vatu vavavulu vanafu chakuzeneka kutachikiza Kalunga. HaLikumbi lyaKusopesa, Yesu mwakasangula vatu kana nakukavahana lwola vakatachikize Kalunga wamuchano nakumuzanga.—Tangenu Vilinga 24:15.

Vafu navakavasangula mumyaka likombakaji. (Kusoloka 20:4, 12) Navakavahana lwola lwakulinangula jishimbi jaKalunga nakumwononoka. Mbimbiliya yahanjika nge navakavasopesela havyuma navakalinga hanyima yakuvasangula keshi havyuma valingile shimbu kanda vafwenga nganomu vafwelela vatu vavavuluko.—Tangenu Wavaka-Loma 6:7.

Mbimbiliya yavuluka nawa likumbi lyakusopesa likwavo lize nalikeza shimbu kanda myaka likombakaji yiputuke. Likumbi kana valivuluka nawa ngwavo kukuma chakaye, chize tunashimutwila mumitwe yavihande yize yinazame hachihande chachinene chamangazini yino. Halikumbi kana, Kalunga mwakanongesa vaka-kumuzamukila vosena. (WaPetulu 2, 3:7) Ngocho, twatela kutwalaho lika kulilama nakusolola nge twazanga kulinga mwaya muchima waKalunga.—Tangenu WaPetulu 2, 3:9, 13.