Mbimbiliya yatulweza ngwayo vatu vamwe navakanonga omu nachikeza kukuma chakaye. Yamba ngwayo: “Nakukapwa luyando lwalunene, luze kanda lusolokengaho lyehi kufuma kukuputuka chakaye palanga nakulelo lino . . . Chikupu vene kuvanga makumbi aze vakawakehese, mokomoko kakweshi ukwechi mujimba navakalwilako.” (Mateu 24:21, 22) Oloze Kalunga atufwelelesa ngwenyi vatu vavavulu navakayovoka. Mbimbiliya yamba ngwayo: “Kaye kali nakuhita . . . , oloze ou eji kulinganga mwaya muchima waKalunga mwatwamanga haya myaka yosena.”—WaYowano 1, 2:17.

Vyuma muka mwatela kulinga hakusaka mukayovoke omu nakakahita kano kaye, ‘nakukatwama haya myaka yosena’? Kutala mwatela kutulika vyakulya navyuma vyeka vyakumujimba mangana mukavizachise halwola kana tahi? Nduma. Mbimbiliya yatukafwa tulinge vyuma vyeka. Yamba ngwayo: “Hakuwana nge vyuma vyosenevi navikayengunuka mujila yangachize, shinganyekenu omu mwatela enu kupwa mutwamiso yenu yajila namuvilinga vyenu vyakuzachila Kalunga, omu muli nakuvandamina nakwanuka kupwako chalikumbi lyaYehova.” (WaPetulu 2, 3:10-12) “Vyuma vyosenevi” vanavuluka havesi yino vize navikayengunuka vyapwa viyulo vyakuhenga vyahano hamavu navatu vaze veji kukundwizanga viyulo kana muchishishisa chakukundwiza chiyulo chaKalunga. Shikaho nge natutulika vyuma vyakumujimba, kavyeshi kukatuyovolako.

Twatela kulihana kuli Yehova Kalunga nakutachikiza vilinga vize vyeji kumwivwisanga kuwaha numbanyi tukayovoke. (Zefwanyiya 2:3) Kanda natulondezeza vatu vavavulu vaze vahumbula vinjikizo vyakusolola nge tuli mumakumbi akukuminyinako. Oloze twatela ‘kuvandamina nakwanuka kupwako chalikumbi lyaYehova.’ Vinjiho jaYehova vanahase kumilweza kuzachisa Mbimbiliya vyuma mwatela kulinga mangana mukayovoke halikumbi kana.