ACHIHUMIKIZENU Yosefwe nemana mulitepa lyenyi hakulauka chalikumbi. Pamo ali nakutala mivale namitondo yeka yamihako, navijiva vize vyapwile najitemo, nanganda yaFwalo. Achishinganyekenu Yosefwe ali nakwivwa lizu lyamwanenyi Efwalime muzuvo omu vali nakumusehesa kuli yayenyi Manase. Pamo ali nakushinganyeka nawa ngwenyi puwenyi atela ali nakuliketa miselo muzuvo navana venyi. Chikupu vene, Yosefwe apwile wakuwahilila mwomwo atachikijile ngwenyi Kalunga namukisula.

Yosefwe alukile mwanenyi watwatwa lijina ngwenyi Manase mwomwo lyalumbunwine kuvulyama. (Kuputuka 41:51) Vyuma amulingililile Kalunga hamyaka yahichile kunyima vyamukafwile evwenga kumuchima hwo numba tuhu asezele limbo lyenyi, navandumbwenyi, naise. Kumuhunga kuli vandumbwenyi chalumwine chiyoyelo chenyi. Vandumbwenyi vamufumbukilile, nakusaka kumujiha, kaha vamulanjishile muundungo kuli vaka-kusekasana. Kufuma vene haze, chiyoyelo chenyi chaputukile kwalumuka. Yosefwe apwile ndungo hamyaka yayivulu, kufumaho vamukashile mukamenga. Oloze omu vamufumishile mukamenga, Fwalo amuhanyine wata wakutala lifuchi lyaEjipitu lyosena. *

Hamyaka yayivulu, Yosefwe amwene omu vyuma ahanjikile Yehova vyapwile nakutesamo. MuEjipitu mwapwile vyakulya vyakulisala hamyaka 7 ngana muze vapolofwetele, kaha Yosefwe ikiye apwile nakutala mulimo wakukungulula vyakulya nakuvitulika. Halwola kana asemene vana vavali kuli puwenyi Asenate. Chipwe ngocho, apwile nakushinganyeka vausoko wenyi chikumanyi songo yenyi Mbenjamine, naise Yakova vaze vapwile kwakusuku. Yosefwe atela apwile nakushinganyeka numba nge vausoko wenyi vapwile nakuyoya kanawa. Pamo apwile nakushinganyeka nawa numba nge vandumbwenyi vaseza vilinga vyavo vyavipi, chipwe kushinganyeka nge navakapwa cheka mukuunda navausoko wenyi nakulinunga hamwe.

Nge mutanga yenu kamwatwama kuundako mwomwo yalwiso, chipwe chijindo, kaha nayenu muli nakumona ukalu woumwe nge uze amwene Yosefwe. Vyuma muka natulinangula kulufwelelo asolwele Yosefwe hakuzakama vausoko wenyi?

Yosefwe apwile namilimo yayivulu, ngocho myaka yakuminenga washi. Ngana muze Yehova ahanjikile chimweza muchilota chize alotele Fwalo, omu mwaka wakusokesa 7 wavyakulya vyakulisala wakumine, vyuma vyalumukile. Jimbuto kajemineko. Kutwala muze, zala yakalombolombo yengilile mumafuchi aze alihachile naEjipitu. Oloze Mbimbiliya yahanjika ngwayo, “mulifuchi lyaEjipitu lyosena mwapwile vyakulya.” (Kuputuka 41:54) Chikupu vene, vyuma apolofwetele Yosefwe hakumuhwimina kuli Yehova, nauhashi wenyi wakulongesa kanawa vyuma vyanganyalishile vatu vosena muEjipitu.

VaEjipitu atela vasakwililile Yosefwe nakumwalisa mwomwo yauhashi wenyi wakulongesa kanawa vyuma. Oloze Yosefwe asakile vatu valise Yehova Kalunga keshi ikiyeko. Nge natulinyisa hakuzachisa uhashi wetu mumilimo yaKalunga, kaha Kalunga nahase kutuzachisa mujijila jize katwashinganyekako.

 Kutwala muze, namuEjipitu mwengilile zala yakalombolombo. Omu vatu vaputukile kulembelela Fwalo avahane vyakulya, avalwezele ngwenyi: “Yenu kuli Yosefwe, kaha kalingenu vyeshovyo mwamilweza.” Ngocho, Yosefwe aputukile kusokolola visete vyosena vize vyapwile navyakulya nakulanjisa vatu vyakulya.—Kuputuka 41:55, 56.

Oloze mafuchi valihachile nawo kawapwile navyakulyako. Tanga yaYosefwe yize yapwile muKanane yapwile nakufwa zala. Omu Yakova evwile ngwavo muEjipitu muli vyakulya, atumine vana venyi vayenga kuze vakalande vyakulya.—Kuputuka 42:1, 2.

Yakova atumine vana venyi likumi, oloze mwanenyi wakasulasongo Mbenjamine asalile. Halwola kanelu Yakova anukile omu atumine mwanenyi Yosefwe uze azangile chikuma mangana ayenga nakutala vandumbwenyi muchipapa. Kufuma halwola kana, kamumwene chekako. Vana venyi vakukola vamunehelele chikuto chakulipwila chamwanenyi Yosefwe chize amutongelele mwomwo yakumuzanga chikuma. Vachinehele chakutanyuka kaha nawa chili namanyinga. Echi chalingishile ou kashinakaji afwelele nge mwanenyi vanamuli kuli chisuma.—Kuputuka 37:31-35.

Vaze vana atumine Yakova kuya nakulanda vyakulya vahetele kuEjipitu hanyima yakutambuka tunda yayisuku. Omu vahulishile vavalweze kwakulanda vakulya, vavalwezele vayenga kuli Zafwenate-paneya, chilolo wafulumende. (Kuputuka 41:45) Hakuheta kuli ou chilolo, kutala vatachikijile ngwavo apwile Yosefwe tahi? Nduma. Vamumwene kaha nge himuka-kuyula wamulemu wamuEjipitu uze atelele kuvakafwa. Ngocho, hakusaka vasolwele kavumbi ou mutu wamulemu, “vafukamine chameso hamavu kuli ikiye.”—Kuputuka 42:5, 6.

Kutala Yosefwe atachikijile ava vandumbwenyi tahi? Eyo, avatachikijile hahaze vene. Kaha nawa omu amwene vali nakumufukamina, anukile vyuma vyasolokele kuunyike wenyi. Mbimbiliya yatulweza ngwayo “Yosefwe anukile vilota” vyakuli Yehova vize alotele omu apwile kanyike, vyakusolola omu vandumbwenyi navakamufukamina. Kahomu mukiko chapwile vene. (Kuputuka 37:2, 5-9; 42:7, 9) Vyuma muka atelele kulinga Yosefwe? Uno atelele kuvapakata mukasamba tahi, nyi kulinga sambanjinga?

Yosefwe atachikijile ngwenyi katelele kwijiva kukavangiza kaha vyeshovyo wamulwezele muchima wenyiko. Yehova ikiye apwile nakulingisa vyuma visoloke mujila kaneyi mangana atesemo kujina chenyi. Ashikile kukalingisa vaka-tanga yaYakova kupwa muyachi waunene. (Kuputuka 35:11, 12) Nge vandumbwaYosefwe vapwile lika vatu vaulyanyi, nalifwi, nalizangamina, kachi chaluwanganyishile lushiko lwaYehova lwakulingisa vaka-tanga yaYakova kupwa muyachi waunene. Kaha nawa nge Yosefwe ejivile kulinga kaha vyeshovyo wamulwezele muchima wenyi, kachi anehesele vikokojola kwimbo afumine nakuhakisa ise nasongo yenyi Mbenjamine muponde. Uno atachikijile ngwenyi ise nasongo yenyi kuvapwile tahi? Yosefwe aliswekele kuli vandumbwenyi mangana aveseke amone numba nge valumwine vilinga vyavo nyi chiku. Echi chikiko chatelele kumukafwa atachikize vyuma vize Yehova asakile Yosefwe alinge.

Enu pamo kamweshi kukahita muukalu wosenou  ahichilemo Yosefweko. Chipwe ngocho, vikokojola navihandwa vili nakusoloka mujitanga makumbi ano. Omu natumona ukalu kana, pamo tunahase kufwila kukavangiza vyuma nautulweza muchima wetu wakuhona kukupuka mwosena. Oloze chapwa chachilemu kulondezeza Yosefwe nakumona vyuma vize Kalunga ali nakusaka tulinge muukalu kana. (Vishimo 14:12) Anukenu ngwenu numba tuhu chapwa chachilemu kutwama mukuunda navausoko wetu, oloze chuma chachilemu chikumanyi shina kutwama mukuunda naYehova naMwanenyi.—Mateu 10:37.

Yosefwe aputukile kweseka vandumbwenyi mangana atachikize vyuma vyapwile mumichima yavo. Avangilile kuvahanjikisa nautenu, nakuvamba ngwenyi vapwile vandoji. Yosefwe apwile nakuhanjika kuli vakiko kuzachisa muka-kwalumuna mazu. Hakusaka valihakwile, ava vandumbwenyi vamulwezele mujimbu watanga yavo. Vamulwezele nawa mujimbu waulemu ngwavo vatwama nandumbwavo wakanyike uze asalile kwimbo. Chipwe ngocho, Yosefwe kasolwele hatoma nge nawahilila hakwivwa mujimbu kanako. Uno chikupu vene songo yenyi apwile wamutonyi tahi? Yosefwe atachikijile jino vyuma atelele kulinga. Avambile ngwenyi: “Shikaho nangumyeseka ngumone numba nge muli nakuhanjika muchano.” Kaha avalwezele vayenga nakusaka songo yavo mangana amumone. Avetavishile vosena vayenga, oloze kusale umwe mukamenga.—Kuputuka 42:9-20.

Omu ava vandumbwenyi vapwile nakushimutwila, vaputukile kulihana mulonga hashili valingile myaka 20 kunyima. Vakiko kavatachikijile ngwavo Yosefwe apwile nakuvevwako. Vambile ngwavo: “Chikupu vene vali nakutuzangamisa mwomwo yavyuma twalingile kuli ndumbwetu. Twamwene omu ayanjile nakutulembelela tumwivwile keke, oloze katwamwivwililileko. Shikaho tuli nakumona vihuli vyosenevi.” Yosefwe apwile nakwivwa vyuma vapwile nakuhanjika, ngocho anyingulukile nakuya kwauka wenyi nakulililako kuchina navamumona. (Kuputuka 42:21-24) Oloze atachikijile ngwenyi kupihilila nakwalumuka kachalumbununa kaha kuliveya hakumona vyuma vyavipi vyeji kwizanga mwomwo yakulinga vyuma vyavipiko. Shikaho avalwezele valinge kweseka namuze avalwezele.

Jino avalwezele vosena vayenga, kaha ahakile Shimeyone mukamenga. Ahakile nawa jimbongo mujinjeke javo javyakulya jize vambachile. Omu vandumbwenyi vahetele kwimbo, valembelele sevo Yakova asuule mwanenyi Mbenjamine uze azangile vayenga nenyi kuEjipitu. Omu vakindulukile kuEjipitu, valwezele kaselwa kaYosefwe hatoma vyajimbongo vawanyine mujinjeke javo, kaha vambile ngwavo navashishisamo jimbongo jakuteseka mujindando jivali. Numba tuhu jimbongo kana japwile jajivulu, oloze Yosefwe afwililile kumona kanawa michima yavo. Ngocho avawahishilile vyakulya chakuzeneka vakiko kutachikiza ngwavo awahililile hakumona songo yenyi Mbenjamine. Kufumaho avasuwile vayenga kwimbo lyavo, kaha vambachile vyakulya vyavivulu. Oloze munjeke yaMbenjamine vaswekelemo lupasa lwapalata.—Kuputuka 42:26–44:2.

Yosefwe avesekele cheka. Alwezele muka-kumulamina zuvo yenyi avakavangize nakuvalweza nge vanevi lupasa. Luze lupasa valuwanyine munjeke yaMbenjamine, kaha vosena vavakindulwishile kuli Yosefwe. Elu lwapwile nawa lwola luze Yosefwe atelele kumona kanawa michima yavava vandumbwenyi. Yuta ikiye apwile muka-kuvahanjikilako kuli Yosefwe. Alembelele Yosefwe avevwile keke, nakwamba ngwenyi navalisuula vosena 11 vapwenga vandungo muEjipitu. Jino Yosefwe avalwezele vaseze Mbenjamine mangana apwenga ndungo, oloze vosena vakinduluke kwimbo lyavo.—Kuputuka 44:2-17.

Oloze Yuta ambile ngwenyi: “Ikiye asala uka wenyi, ise nawa amuzanga chikuma.” Mazu kana atela akwachile kumuchima waYosefwe mwomwo ikiye apwile mwanaYakova watwatwa kuli puwenyi azangile chikuma Lakele uze afwile hakusapulaka Mbenjamine. Yosefwe atela anukilenga chikuma naye Lakele nganomu ise anukilenga ou puwenyi. Echi pamo chikiko chalingishile Yosefwe azange chikuma songo yenyi Mbenjamine.—Kuputuka 35:18-20; 44:20.

Yuta atwalileho lika kulembelela Yosefwe ngwenyi kanda mwakwata Mbenjamine undungoko. Alisuuwile asale ikiye kupwa ndungo muchishishisa chaMbenjamine. Kufumaho alinyengele nakulembelela ngwenyi: “Nanguhasa kukinduluka ngachilihi kuli tata chakuzeneka kuya nayou mukweze? Kangweshi nakusaka ngukamone lupi luze nalukawana tatako.” (Kuputuka 44:18-34) Echi chasolwele hatoma nge  Yuta alumukile. Yuta kasolwele muchima wakupihilila nakwalumuka kahako, oloze asolwele nawa muchima wakeke, wakutetela nakuzakama vakwavo.

Echi chalingishile Yosefwe alile mangana chinyengo chapwile mumuchima wenyi chimufume. Alowele vangamba jenyi haweluka, kaha alilile nalizu lyakukanguka lize lyevwakanyine nakunganda yaFwalo. Alijimbwile jino kuli vandumbwenyi ngwenyi: “Ami yami ndumbwenu Yosefwe.” Kufumaho apakachile vandumbwenyi mukasamba oku vanafu chishima, kaha avakonekelele havyuma vyosena vamulingile. (Kuputuka 45:1-15) Yosefwe asolwele muchima uze atwama nawo Yehova wakukonekela vatu. (Samu 86:5) Kutala nayetu tweji kukonekelanga vakwetu nyi?

Omu Fwalo evwile vyuma vyasolokele kuzuvo yaYosefwe, alwezele Yosefwe akambate ise natanga yosena mangana vezanga kuEjipitu. Mwahichile kaha makumbi amandende, Yosefwe alinungile cheka naise. Yakova alilile nakwamba ngwenyi: “Ngunahase kufwa tuhu jino. Mwomwo ngunakumono lyehi, kaha ngunejiva ngwami uchili umutonyi.”—Kuputuka 45:16-28; 46:29, 30.

Yakova ayoyele myaka 17 muEjipitu. Kaha ahanjikile jikisu navakatambula vana venyi vosena 12. Mwanenyi Yosefwe wakusokesa 11, amuhanyine vyazano vivali vize vatela kuhana twatwa. Miyachi yivali yaIsalele yatelele kufuma muli Yosefwe. Nyi ngachilihi mwanenyi wamuchiwana Yuta, uze asolwele muchima wakupihilila nakwalumuka kuhambakana vandumbwenyi? Atambwile kisu yino yayinene: Kutanga yenyi kukiko vavulukile ngwavo nakukafuma Meshiya.—Kuputuka, kapetulu 48, 49.

Yakova afwile omu apwile namyaka yakusemuka 147, kaha vandumbwaYosefwe vevwile woma ngwavo pamo ndumbwavo uze apwile wamulemu chikuma mwalinga sambanjinga. Oloze Yosefwe avafwelelesele ngwenyi keshi kuhasa kulinga ngochoko. Hakuwana nge enjikijile chikupu hamyaka yayivulu ngwenyi Yehova ikiye alingishile tanga yenyi yizenga muEjipitu, ngocho asakile vandumbwenyi valitwamine kushinganyeka vyuma vyavipi vyalingiwile. Avehwile ngwenyi: “Ami yami Kalunga numba?” (Kuputuka 15:13; 45:7, 8; 50:15-21) Yosefwe amwene ngwenyi Yehova ikiye Muka-kuyula wamwenemwene. Ngocho achimwene kupwa chakuhenga kuzangamisa vatu vaze Yehova nakonekela lyehi.—WavaHepeleu 10:30.

Kutala cheji kumikaluhwilanga kukonekela vakwenu tahi? Chinahase kupwa chachikalu kukonekela mutu chikumanyi nge natulingi mwamupi mukuchisakula. Oloze nge natukonekela mutu uze natulingi mwamupi uze napihilila nakwalumuka, kaha natuka jimbandu jajivulu kuhakilako vene nayeyi yayetu vavene. Nge natulinga ngocho, kaha tuli nakulondezeza lufwelelo lwaYosefwe nachakutalilaho chaIse wakeke Yehova.