HAKUWANA nge lizu “muka-kole waKulishitu” vanalizachisanga kuli vamyangana namujivindiyo namuvyuma vyeka, ngocho chapwa chakutamo kuhulisa ngwetu: Iya apwa muka-kole waKulishitu? Uno lizu kana lyalumbununa vyuma vimwe makumbi ano tahi? Nge tuli nakusaka kutachikiza ou muka-kole waKulishitu, nachipwa chakutamo kuvangila kuhehwojola muMbimbiliya muze lizu kana lyasoloka mapapa 5.

Kaposetolo Yowano uze asonekele Mbimbiliya ikiye kaha azachishile lizu “muka-kole waKulishitu.” Uno ou muka-kole waKulishitu amulumbunwine ngachilihi? Talenu mazu asonekele mumukanda wenyi wakulivanga uze valuka lijina lyenyi. Ambile ngwenyi: “Enu vana vavandende, luno hilwola lwakukuminyina, nganomu munevu ngwavo muka-kole waKulishitu ali nakwiza, numba oholyapwa vaka-kole jaKulishitu vavavulu vanasoloka lyehi, kaha hakiko vene tunatachikijila ngwetu elu hilwola lwakukuminyina. Vafumine muli etu, mwomwo kavapwile vetuko . . . Iyaze napu muka-kwonga? Kumana keshi ou mwakana ngwenyi Yesu keshi ikiye Kulishituko nyi? Ou mwakana Setu naMwana, ikiye vene muka-kole waKulishitu.”—WaYowano 1, 2:18, 19, 22.

Vyuma muka natulinangula kumazu kana? Yowano avulukile ngwenyi “vaka-kole jaKulishitu vavavulu,” kulumbununa nge muka-kole waKulishitu kapwa mutu umweko, oloze apwa lizavu lyavatu. Vatu chipwe mauka aze apwa muka-kole waKulishitu eji kutanjisanga makuli, nakukana ngwavo Yesu kapwa Kulishitu chipwe Meshiyako. Kaha vafwila kaluwanganyisa vatu vahone kutachikiza usoko atwama nawo Kalunga naMwanenyi Yesu Kulishitu. Vatu vaze vatwama mulizavu lyamuka-kole waKulishitu veji kulyonga nge vatachikiza Kulishitu chipwe nge vapwa vaka-kumwimanyinako. Oloze hakuwana nge “vafumine muli etu,” ngocho vapyapumukile kukunangula chamuchano chamuMbimbiliya. Kaha nawa eli lizavu kulyapwile halwola luze Yowano asonekele mukanda wenyi, ‘halwola lwakukuminyina’ pamo halwola vakumine vaposetolo.

Vyuma vikwavo muka asonekele Yowano kutalisa kuli muka-kole waKulishitu? Ahuhumwine vakwavo vaka-kwitava valihende kuli vapolofweto vamakuli. Ambile ngwenyi: “Mazu vahwima osena aze etavila ngwavo Yesu Kulishitu ejile mumujimba, apwa akuli Kalunga. Oloze mazu vahwima osena aze kawetavila chuma echi hali Yesuko, kawapwa akuli Kalungako. Kaha awa akiko mazu vahwima akuli muka-kole waKulishitu aze mwevwa lyehi ngwavo ali nakwiza, kaha aneza lyehi mukaye.” (WaYowano 1, 4:2, 3) Kufumaho, Yowano asonekele chishina chino mumukanda wenyi wamuchivali ngwenyi: “Vaka-kwonga vavavulu vanasoloka lyehi mukaye, vaze kaveshi kwitavila ngwavo Yesu Kulishitu ejile mumujimba. Mutu kana napu muka-kuhungumwisa, muka-kole waKulishitu.” (WaYowano 2, 7) Chikupu vene, Yowano atachikijile ngwenyi muka-kole waKulishitu apwa vatu vaze  veji kutanjisanga vyuma vyamakuli hali Yesu Kulishitu nakunangula chenyi.

Shimbu kanda Yowano asoneke vyavaka-kwonga vamukwitava, Yesu Kulishitu ahuhumwine vaka-kumukavangiza ngwenyi: “Zangamenunga navapolofweto vamakuli vaze veji kwizanga kuli enu oku vanalifwiki malambu amikoko, oloze mukachi vapwa tungunge vazala.” (Mateu 7:15) Kaposetolo Paulu naikiye ahuhumwine vaka-Kulishitu vamuTesolonyika ngwenyi: “Kanda vamihungumwisa numba hahandendeko, mwomwo likumbi [lyaYehova] kalyeshi kwiza kuvanga chatete kulikanga kuli Kalunga chineza, namutu waupapwoki nawa vanamusolola, uze apwa mwanakunonga.”—Wavaka-Tesolonyika 2, 2:3.

Vapolofweto vamakuli navaka-kulikanga kuli Kalunga kuvapwile mulikulukaji lyamyaka lyakulivanga, kaha vafwililile kuhungumwisa vaka-Kulishitu. Vosena vaze vapwile nakutanjisa vyuma vyamakuli hali Yesu Kulishitu nakunangula chenyi vavavulukile ngwavo “muka-kole waKulishitu.” Yehova mwakavanongesa mwomwo Paulu avavulukile ngwenyi “mwanakunonga.”

Vyuma muka ali nakulinga muka-kole waKulishitu makumbi ano? Vatu namauka aze apwa muka-kole waKulishitu vachili lika nakwimanyina Kulishitu nakunangula chenyi nakole. Veji kutanjisa vyuma vyamakuli mangana valuwanganyise vatu vahone kutachikiza kanawa Setu Yehova Kalunga naMwanenyi Yesu Kulishitu. Ngocho twatela kuzangama kuchina natuhungumuka nakunangula kanechi chamakuli. Tutalenu havyakutalilaho vivali.

Hamyaka yayivulu, jichachi jinatanjisa kunangula chaTulunga vatatu, nakwamba ngwavo Ise naMwana vapwa kalunga umwe. Muka-kole waKulishitu naluwanganyisa vatu vahone kutachikiza Yehova Kalunga naYesu Kulishitu. Echi chili nakulingisa vatu vamichima yamwaza vahone kukavangiza Mbimbiliya yize yavalweza kulondezeza Yesu Kulishitu nakupandama kuli Kalunga.—Wavaka-Kolinde 1, 11:1; WaYakova 4:8.

Jichachi jili nakuluwanganyisa nawa vatu hakuzachisa jiMbimbiliya jize kajatwama nalijina lyaKalunga, Yehovako. Vali nakukundwiza jiMbimbiliya kana okunyi lijina lyaYehova lyasoloka mapapa kafwe 7,000 muvisoneka vasonekele mumalimi akulivanga. Vyuma muka vinafumumo? Vatu vanahono kutachikiza Kalunga wamuchano.

Oloze kutachikiza lijina lyaKalunga, Yehova, chinakafwe vaka-kulemesa Kalunga vamichima yamwaza vapandame kuli ikiye. Omu mukiko chapwile kuli Richard uze anukile vyuma vashimutwilile naVinjiho jaYehova vavali. Ambile ngwenyi: “Vangulwezele lijina lyaKalunga wamuchano, Yehova kuzachisa Mbimbiliya. Ngwevwile kuwaha hakutachikiza ngwami Kalunga atwama nalijina lize kanda ngwivwengangaho lyehi.” Kufuma vene haze, alumwine chiyoyelo chenyi nakukavangiza jishimbi jamuMbimbiliya nakwivwisa Yehova kuwaha. Richard ambile ngwenyi: “Kutachikiza lijina lyaKalunga chinangukafwe ngupwenga nausoko wakukola naikiye.”

Hamyaka yayivulu, muka-kole waKulishitu nalingisa vatu vavavulu vahone kutachikiza muchano wamuMbimbiliya. Oloze kulinangula Mazu aKalunga nachitukafwa tutachikize muka-kole waKulishitu nakuseza kunangula chamakuli chayou muka-kole waKulishitu.—Yowano 17:17.