Nge visemi navasololanga zangi nakulivumbika mutanga, kaha navana navapwa navilinga vyamwaza. (Wavaka-Kolose 3:14, 19) Visemi vamwaza vazanga vana vavo nakuvasangejeka ngana muze Yehova Kalunga asangejekele Mwanenyi.—Tangenu Mateu 3:17.

Setu wamwilu eji kwivwililanga vyuma veji kulombanga vangamba jenyi nakuvazakama. Visemi vatela kulondezeza Yehova hakwivwililanga kuvyuma navahanjika vana vavo. (WaYakova 1:19) Vatela kwivwishisanga vyuma vali nakushinganyeka vana vavo kuhakilako vene navyuma vyakuhingama navahanjika.—Tangenu Kulava 11:11, 15.

Hakupwa muvisemi, mwatwama nangolo jakutunga jishimbi mutanga. (Wavaka-Efwesu 6:1) Ngocho londezezenunga chakutalilaho chaKalunga. Yehova azanga vana venyi hakuvahana jishimbi nakuvalweza ponde yeji kwizanga hakuhona kujikavangiza. (Kuputuka 3:3) Muchishishisa chakushinyinyika vatu vakavangize jishimbi jenyi, eji kuvanangulanga omwo vanahase kunganyala hakulinga vyuma vyamwaza.—Tangenu Isaya 48:18, 19.

Fwilenunga kukafwa vana venu vazange Kalunga. Echi nachivakafwa valingenga vyuma vyamwaza numba nge vali uka wavo. Ngana muze Kalunga eji kunangulanga vatu hakuvasolwela chakutalilaho chamwaza, nayenu visemi nawa mwatela kunangulanga vana venu hakuvahana chakutalilaho chamwaza.—Tangenu Lushimbi lwamuchivali 6:5-7; Wavaka-Efwesu 4:32; 5:1.