Paul uze apwile napwevo navana vavali ambile ngwenyi: “Mulifuchi lyetu mwapwile ukalu wakunyina chajindando. Vyakulya vyapwile nandando chikuma, kaha nawa vyakehele. Kakavulu twemanyinenga mumikana jiola jajivulu hakulanda vyakulya, oloze twahilukilenga mavokovoko mwomwo vyakulya vyakuminenga. Vatu vahokaminenga nyi kuwangama mwomwo yazala, kaha veka vavawanyinenga mumikwakwa vanandumuka. Jindando javyakulya vyosena janyinyine chikuma. Kutwala muze, jimbongo jamulifuchi lyetu kajapwile nangoloko. Ngwatokesele jimbongo jami jakunyambaulu, najaishuwalesi najalitayamende josena.”

Paul atachikijile ngwenyi atelelele kuzachisa “mangana amwenemwene” numba awanyine vaka-tanga yenyi vyakulya. (Vishimo 3:21) Alumbunwine ngwenyi: “Numba tuhu ngwalinangwile milimo yakakahya kakezi, oloze ngwazachilenga kala milimo, kaha vangufwetelenga jimbongo jajindende. Lwola lumwe ngwazachililenga vyakulya chipwe vyuma vyeka vyakuzachisa hazuvo. Nge vanangufwete jinjapau jiwana, twazachishilengaho jivali nakulanjisa jize jasalileho. Kutwala muze, ngwalanjile vana vatusumbi 40 vakupita. Omu vakolele, ngwavalanjishile nakulanda veka 300. Kaha ngwatambasanyine tusumbi 50 najinjeke jivali jaunga jakulema jikilo 50. Unga kana twaulile hamakumbi amavulu, kaha twahanyineko najitanga jeka.”

Paul atachikijile nawa ngwenyi kufwelela Kalunga chapwa chachilemu chikuma. Nge natukavangiza vyuma eji kutulwezanga Kalunga, kaha mwatukafwa. Yesu ahanjikile kutalisa kuvyuma vyakulikafwa navyo mukuyoya ngwenyi: “Litwaminenu kulizakaminanga, mwomwo . . . Senu atachikiza ngwenyi nayenu mwasakiwa vyuma kanevi.”—Luka 12:29-31.

Chaluvinda, Satana uze apwa muka-kole waKalunga wamunene ali nakulingisa vatu vafwile chikuma vyuma vyakumujimba. Ngocho vatu vali nakulizakamina chikuma havyuma vyamukuyoya nakuzata nangolo mangana vapwenga navyuma kana numba tuhu kavyeshi nakusakiwako. Vavavulu vali nakwingila mumikuli,  kaha mazu akwamba ngwavo “ou mwalevana napu ndungo kuli ou mwamulevanyisa” ali nakutesamo kuli vakiko.—Vishimo 22:7.

Vatu vamwe veji kulinganga vyuma vize vyeji kuvengisanga muukalu. Paul ambile ngwenyi: “Vakwetu vavavulu vasezele jitanga javo namasepa javo nakuya nakutonda milimo kumafuchi eka. Vamwe kavambachile mapapilo akuvetavisa kwingila mumafuchi ekako, kahechi chavalingishile vahone kwingila milimo. Kakavulu vachinyinenga tupokola nakuhona kwakusavala. Vatu kana kavafwelelele Kalunga avakafweko. Oloze etu twapendaminyine hali Kalunga atukafwe muukalu wetu wakuhona jimbongo.”

Paul ambile ngwenyi: “Yesu ahanjikile ngwenyi: ‘Kanda namulizakamina vyalikumbi lyahameneko, mwomwo likumbi lyahamene nalikapwa navyalyo vyakulizakamina. Likumbi hilikumbi lili naukalu walyo.’ Ngocho ngwalombelenga kuli Kalunga hakumbi hakumbi nakufwelela ngwami mwatuhana “kulya chetu chalikumbi.” Yehova atukafwilenga chikupu ngana muze atufwelelesele Yesu. Lwola lumwe twalilenga vyakulya vize katwasakako. Likumbi limwe, ngwemanyine mumukana ngulande vyakulya chakuzeneka kutachikiza vyakulya vapwile nakulanjisa. Oloze omu lwahetele lwola lwami lwakulanda, kuwana kuli yogurt. Yogurt kangwayisakako, oloze likumbi kana twayilile. Ngweji kusakwililanga Kalunga hakuwana nge halwola lwosenelu lwaukalu, tanga yami kayasavalilenga nazalako.” *

Paul ambile ngwenyi: “Oholyapwa tuli jino najimbongo jakulikafwa najo. Oloze kuhita muukalu kana chinatunangula nge twatela kufwelelanga Kalunga numba tuhone kulizakamina. Yehova * mwatukafwanga lwola lwosena chikalu kaha nge natutwalaho lika kulinga mwaya muchima wenyi. Mazu ahali Samu 34:8 anatesamo kuli etu, akwamba ngwavo: ‘Makilenu mangana mumone ngwenu Yehova apwa wamwaza. Awahilila mutu uze eji kuchinyinanga muli ikiye.’ Echi chinatukafwe tuhone kwivwa woma nge natukalitalasana cheka naukalu wakuhona jimbongo.

“Oholyapwa twatachikiza jino ngwetu chuma chasakiwa chikuma kuli mutu numba ayoye shina vyakulya keshi milimo azata chipwe jimbongoko. Tuli nakutalilila omu Kalunga mwakatesamo lushiko lwenyi lwakwamba ngwavo: ‘Hamavu nahakapwanga mbuto jamanona jakulisala.’ Oloze muholyapwa, ‘omu tuli navyakulya nauvwalo, natusuulukanga navyuma kanevi.’ Mazu ano amuMbimbiliya eji kutukolezezanga, akwamba ngwavo: ‘Kutwama chenu chipwenga chakuzeneka kuzanga jimbongo, oku munasuuluka navyuma muli navyo. Mwomwo ikiye nambe ngwenyi: “Kangweshi kukakusezako, kangweshi kukakumbilako.” Ngocho natuhasa kumika chikuma nakwamba ngwetu: “Yehova ikiye muka-kungukafwa, kangweshi kwivwa womako.”’” *

Twatela kupwa nalufwelelo numbanyi ‘tutambuke naKalunga’ ngana muze ali nakulinga Paul natanga yenyi. (Kuputuka 6:9) Numba tupwa muukalu wakuhona jimbongo oholyapwa chipwe nge naukatuwana kulutwe, oloze lufwelelo lwaPaul namangana enyi amwenemwene vinatunangula vishina vyavilemu.

Nyi ngachilihi nge tuli nakulizakamina mwomwo yaukalu wamutanga?