Janet ambile ngwenyi: “Omu mwahichile makumbi amandende kufuma hakufwa chatata, lunga lyami angulwezele ngwenyi nawane pwevo weka. Kufumaho, akungwile uvwalo wenyi wosena nakuya chakuzeneka kungusalisa nakunguseza navana.” Numba tuhu Janet awanyine milimo, oloze atambwilenga jimbongo jajindende, kaha kajatelemo kufwetela zuvoko. Amwenenga nawa ukalu weka. Ambile ngwenyi: “Ngwalizakaminyine chikuma hakulela vana uka wami. Ngwevwilenga kupihya hakumona vakwetu vali nakuzakama kanawa vana vavo, oloze ami chiku. Noholili kangwatachikiza vyuma veji kushinganyeka vakwetu hali ami navana vamiko. Pamo veji kushinganyeka ngwavo kangwazachile nangolo ngulame ulo wamiko.”

Kulomba cheji kukafwanga Janet azamise usepa wenyi naKalunga nakuhona kulizakamina chikuma. Ambile ngwenyi: “Ufuku ukiko ngweji kupindasananga chikuma navishinganyeka. Oloze kulomba nakutanga Mbimbiliya vyeji kungukafwanga nguyenga mutulo. Ngwazanga chikuma kutanga mukanda Wavaka-Fwilipi 4:6, 7 uze wamba ngwavo: ‘Kanda namulizakamina hachuma numba chimweko, oloze muvyuma vyosena, hakulomba, nahakulembelela, nahakusakwilila, mulwezenunga Kalunga vyuma munakusaka, kaha kuunda chaKalunga chize chahambakana kunangakana chosena nachikinga michima yenu navishinganyeka vyenu.’ Ngweji kulombanga chikuma naufuku, kaha kuunda chaYehova cheji kungulingisanga ngwivwenga kumuchima hwo.”

Mazu aYesu ahanjikile muChihande ChahaPili kupandama kukulomba atalisa kuvyuma vyosena veji kulizakaminanga vatu. Ambile ngwenyi: “Senu atachikiza vyuma muli nakusaka shimbu kanda mumulombevyo.” (Mateu 6:8) Numba tuhu Kalunga atachikiza vyuma tuli nakusaka, oloze twatela kulomba kuli ikiye. Kulomba yapwa hijila yayilemu ‘yakupandaminamo kuli Kalunga.’ Vyuma muka navifumamo? Naikiye “mwapandama kuli enu.”—WaYakova 4:8.

Eyo, kulomba cheji kutukafwanga tutufule vili kumuchima wetu nakwivwa hwo. Cheji kulingisanga  nawa Yehova uze eji ‘kwivwililanga kukulomba’ akafwe vosena vaze navamufwelela. (Samu 65:2) Echi chikiko chalingishile Yesu alweze vaka-kumukavangiza ‘valombenga lwola lwosena chakuzeneka kuzeya.’ (Luka 18:1) Shikaho tulombenunga lika kuli Kalunga nakufwelela ngwetu mwatutwaminyina nakutukafwa. Twatela nawa kwinjikiza ngwetu atwama nangolo kaha nawa afwila kutukafwa. ‘Kulombanga shimbu yosena’ nachisolola nge tukwechi lufwelelo lwamwenemwene.—Wavaka-Tesolonyika 1, 5:17.

Uno kupwa nalufwelelo chalumbunukila mulihi? Chalumbununa ‘kutachikiza’ Kalunga kupwa himutu. (Yowano 17:3) Hakusaka tumutachikize kanawa, twatela kutanga Mbimbiliya. Kaha natwijiva ngwetu Kalunga eji kutumonanga mutu himutu, kaha asaka kutukafwa. Oloze kupwa nalufwelelo lwamwenemwene kachalumbununa kaha kutachikiza Kalungako. Chalumbununa nawa kupwa nausepa wakukola naikiye. Nganomu chapwa hakulikata usepa namutu, kutunga usepa naKalunga katwachilinga mulikumbi lyangongoko. Lufwelelo lwetu lweji ‘kuyanga nakutohwa’ mukuhita chalwola omu natulinangula vyavivulu hali Kalunga, ‘nakulinganga vyuma vyakumwivwisa kuwaha,’ nakumona nawa omu ali nakutukafwa. (Wavaka-Kolinde 2, 10:15; Yowano 8:29) Lufwelelo lwangana lukiko lweji kukafwanga Janet ahone kulizakamina.

Janet ambile ngwenyi: “Kumona omu Yehova nangukafwenga chinazamisa lufwelelo lwami. Kakavulu twahichilenga muukalu uze wasolokelenga nge katweshi kuhasa kuukumisako. Oloze kulomba chikuma kuli Yehova chinangukafwenga lwola lwosena ngukumise ukalu uze kangweshi kuhasa kukumisa uka wamiko. Ngweji kumusakwililanga havyuma eji kungulingilanga. Shimbu yosena Yehova natukafwenga halwola lwakutamo. Kaha anguhana masepa vamwenemwene, malunga napwevo vaze vapwa vaka-Kulishitu vamuchano. Veji kungukafwanga lwola lwosena, kaha vali nakuhana chakutalilaho chamwaza kuli vana vami.” *

Janet ambile ngwenyi: “Ngwatachikiza jino ovyo Yehova ahanjikila hali Malaki 2:16 ngwenyi: ‘Ngwahunga kulilukulula.’ Kukuseza kuli muka-mahyove chakuzeneka mulonga cheji kukolanga chikuma kumuchima. Munahichi jino myaka yayivulu kufuma halwola apitukile lunga lyami, oloze noholili ngweji kwivwanga uli nakulimona nge nguwamokomoko. Nge ngunevu ngocho, ngweji kuyanga nakukafwako vakwetu milimo, kahechi cheji kungukafwanga chikuma.” Kukavangiza jindongi jamuMbimbiliya jize jakanyisa kulihandula kuli vakwetu chinakafwe Janet ahone kulizakamina. *—Vishimo 18:1.

Janet ambile ngwenyi: “Kutachikiza ngwami Kalunga ‘ikiye sevo yavana vakuzeneka masevo, ikiye muka-kukinga vatuliwe’ cheji kunguvendejekanga chikuma. Keshi kukanguseza nge muze alingile lunga lyamiko.” (Samu 68:5) Janet atachikiza ngwenyi Kalunga keshi kutweseka “navyuma vyavipiko.” Oloze eji kuhananga mangana vatu “vosena” ‘nangolo jakuhambakana jize javatu’ mangana vivakafwe vahone kulizakamina.—WaYakova 1:5, 13; Wavaka-Kolinde 2, 4:7.

Nyi ngachilihi nge tunalizakamina mwomwo yaponde?