CHIHANDE CHACHINENE | VYUMA NAVIMIKAFWA MUHONE KULIZAKAMINA
Mukaye Kosena Vatu Vali Nakulizakamina
Paul wamuZimbabwe ambile ngwenyi: “Likumbi limwe, ngwayile kuvitanda nakulanda vyakulya, oloze kuwana kuli jimbisiketi kaha. Jimbisiketi kana japwile nandando chikuma. Lichako, ngwayile cheka kuvitanda, oloze kuwana najimbisiketi vene jauchi.”
Janet wamuUnited States ambile ngwenyi: “Likumbi limwe, lunga lyami angulwezele ngwenyi mwanguseza nakwalukila pwevo weka. Kangwatachikijile mwakulingilako, kaha ngwalizakaminyine chikuma hali vana vami.”
Alona wamuIsrael ambile ngwenyi: “Nge ngunevu ngezo yakutulweza ponde, ngweji kuchinanga nakuswama. Mweji kuhitanga jiola jajivulu hanga chingulichikimina.”
Tuli nakuyoyela ‘halwola lwalukalu,’ kaha vatu vali nakulizakamina chikuma. (WaChimoteu 2, 3:1) Vatu vavavulu vali nakumona vihuli mwomwo yakukaluhwa chajimbongo, naukalu wamutanga, najijita, namisongo yachihita, naukalu wakulijila nawou wakuneha kuvatu. Vamwe veji kulizakaminanga havyuma vyeka. Vanahase kulihulisa ngwavo: ‘Uno eli liundu nguli nalyo himusongo wakasa tahi?’ ‘Uno vazukulu jami navakola kanawa mukaye kano tahi?’
Oloze lwola lumwe chapwa chakutamo kulizakamina. Chakutalilaho, tuvosena tweji kulizakaminanga hakusoneka vyeseko, chipwe hakwazana muchilika chimwe chipwe hakutwihwojola vyakutwingisa milimo. Kaha nawa lwola lumwe kwivwa woma chinahase kutukinga kuponde. Oloze kulizakamina chikuma lwola lwosena chinahase kutwingisa muukalu waunene. Chakutalilaho, kalinwomu ngana, vaka-kulinangula vahehwojolanga mijimbu yavatu vakuhambakana 68,000 mangana vatachikize ponde yatwama hakulizakamina. Kaha vawananga nge numba vene kulizakamina chindende chinahase kulingisa mutu afwenga uvisu. Ngocho Yesu ahulishile ngwenyi: “Iyaze muli enu hakulizakamina mwahasa kuhakila kuvite yimwe kutando yenyi yakuyoya?” Chikupu vene kulizakamina cheji kukehesanga myaka yakuyoya. Shikaho Yesu atuhuhumuna ngwenyi: “Litwaminenu kulizakaminanga.” (Mateu 6:25, 27) Uno mutu nahase ngachilihi kuyoya chakuzeneka kulizakamina?
Echi chapendamina hakuzachisa mangana amwenemwene, nakufwelela muli Kalunga, nakupwa nalutalililo lwamwenemwene havyuma vyakulutwe. Numba nge oholyapwa katweshi nakuhita muukalu wauneneko, oloze kulutwe pamo naukatuwana. Ngocho, tutalenu jino omwo kukavangiza vyuma tunavuluka chinakafwe Paul, naJanet, naAlona vahone kulizakamina.
Pamo Nauzanga Nawa
VIHANDE VIKWAVO
Omwo Mbimbiliya Yinahase Kukafwa Malunga Nge Vanalizakamina
Vatu vali nakulizakamina chikuma mumakumbi ano amakalu. Uno Mbimbiliya yinahase kukukafwa kachi nge unalizakamina tahi?
TONENU
Uno Mwalizakaminaho Lyehi Tahi?
Kuli vyuma vyavivulu mwatela kulinga mangana mukeheseko kulizakamina.
