Kutala Tunahase Chikupu Kwivwisa Kalunga Kuwaha Nyi?
Pamo mwatangaho lyehi vyavatu vamwe vaze valisa chikuma muMbimbiliya nakwamba ngwenu, ‘Kangweshi kuhasa kupwa nganomu vapwile vatu kanako.’ Munahase kuhanjika ngwenu, ‘Ami kangwapwa nguwakulonga chipwe wakwolokako, kaha nawa kangweshi kulinga vyuma vyakwoloka lwola lwosenako.’
Yopa “apwile mutu wakusungama, wakulonga.” —Yopa 1:1
Yopa vamuvuluka ngwavo apwile mutu “wakusungama, wakulonga.” (Yopa 1:1) Lote nawa vamuvuluka ngwavo apwile “lunga wakwoloka.” (WaPetulu 2, 2:8) Kaha Ndavichi vamuvuluka ngwavo ‘alingilenga vyuma vyamwaza’ kumeso aKalunga. (Vamyangana 1, 14:8) Oloze tuchihunananenu hachiyoyelo chavatu kana ava vavuluka muMbimbiliya. Natulinangula vishina vino vitatu: (1) vatu kana valimbenjelenga, (2) tunahase kulinangula vyuma vimwe kuli vakiko, kaha (3) vatu vakuhona kukupuka mwosena vanahase chikupu kwivwisa Kalunga kuwaha.
VATU KANA VALIMBENJELENGA
“[Kalunga] ayowele Lote mutu wakwoloka uze ayanjiwile chikuma navilinga vyakuzunguma vyavatu vaupapwoki.”—WaPetulu 2, 2:7
Yopa ahichile muukalu wauvulu. Ngocho ashinganyekele mwakuhenga ngwenyi Kalunga kazakamako numba amufwelela chipwe chiku. (Yopa 9:20-22) Yopa alimwene kupwa wakwoloka chikuma, kahechi chalingishile vakwavo vamumone nge ali nakulyalisa ngwenyi apwa wakwoloka chikuma kuhambakana Kalunga.—Yopa 32:1, 2; 35:1, 2.
Lote kanguhwishile kulinga vyuma vize vamulwezele kulingako. Evwile kupihya chikuma hakumona vyuma vyavipi valingilenga vatu muSotome naNgomola, kaha “ayanjishilenga mwono wenyi wakwoloka” mwomwo yaupi kana. (WaPetulu 2, 2:8) Kaha Kalunga ajinyine kunongesa vatu vavapi vamujinganda kana nakuyovola Lote natanga yenyi. Hakuwana nge Lote ayanjilenga mwomwo yavyuma vyavipi, ngocho atelele kupwa ndundu-mutete kulovoka munganda kana. Oloze aputukile kulangisa. Ngocho vangelo vakwachile Lote, napuwenyi, navana venyi kumavoko nakuvalovola munganda.—Kuputuka 19:15, 16.
Ndavichi ‘azachilile Kalunga namuchima wenyi wosena, nakulinga kaha vyuma vyamwaza kumeso aKalunga.’—Vamyangana 1, 14:8
Likumbi limwe Ndavichi kapwile namuchima wakulikanyisa iveneko, kaha alingile ujila napwevo lyambala. Hakusaka kufwika mulonga wenyi, alwezele vatu jenyi vajihe lunga lyauze pwevo. (Samwele 2, kapetulu 11) Mbimbiliya yamba ngwayo “Yehova evwile kupihya chikuma” havyuma alingile Ndavichi.—Samwele 2, 11:27.
Yopa, naLote, naNdavichi valimbenjele mukuyoya chavo, kaha vyuma vimwe valingile vyapwile vyavipi chikuma. Oloze nganomu natumona, malunga kana vafwililile kuzachila Kalunga nakumwononoka namichima yavo yosena. Valiveyele havyuma valingile nakwalumuna vilinga vyavo. Ngocho Kalunga avevwilile kuwaha, kaha Mbimbiliya yavavuluka ngwayo vapwile malunga vakushishika.
VYUMA MUKA NATULINANGULAHO?
Hakuwana nge katwakupuka mwosenako, ngocho chapwa chachashi kulimbenja. (Wavaka-Loma 3:23) Oloze nge tunalimbenje, twatela kulikonekela nakwolola vilinga vyetu.
Uno Yopa, naLote, naNdavichi volwele ngachilihi vilinga vyavo? Yopa apwile chikupu mutu wakulonga. Omu Kalunga amwolwele, alumwine vishinganyeka vyenyi vyakuhenga nakulikonekela havyuma ahanjikile. (Yopa 42:6) Jila amwenenenemo Lote vilinga vyavipi vize vyapwile muSotome naNgomola yalitombwele najishimbi jaKalunga. Oloze alimbenjele kaha hakuhona kupwa namuchima wakwanguhwa. Kutwala muze, alovokele mujinganda kaneji jajipi nakuyovoka kuutenu waKalunga. Ononokele nakuhona kutala kuvyuma asele kunyima. Ndavichi nawa alimbenjele chikuma hakuhokola jishimbi jaKalunga, oloze asolwele muchima wamwaza hakupihilila nakwalumuka nakulomba Kalunga amukonekele.—Samu 51.
Jila amwenenenemo Kalunga vatu kana yasolola muchima wauvwovu eji kusolwelanga vatu jenyi vakuhona kukupuka mwosena. Kalunga “atachikiza kanawa omu atutenga, atachikiza ngwenyi twapwa tulukungu kaha.” (Samu 103:14) Jino kachi nge Kalunga atachikiza ngwenyi tweji kulimbenjanga, kaha vyuma muka asaka kuli etu?
Kalunga “atachikiza kanawa omu atutenga, atachikiza ngwenyi twapwa tulukungu kaha.”—Samu 103:14
VATU VAKUHONA KUKUPUKA MWOSENA VANAHASE NGACHILIHI KWIVWISA KALUNGA KUWAHA?
Mazu ahanjikile Ndavichi hakuhuhumuna mwanenyi Solomone atukafwa tutachikize omu tunahase kwivwisa Kalunga kuwaha. Ambile ngwenyi: “Ove mwanami Solomone, tachikiza Kalunga kaiso, muzachilenga namuchima wove wosena.” (Mijimbu 1, 28:9) Uno kuzachila Kalunga namuchima wosena chalumbununa ika? Chalumbununa kuzanga Kalunga nakufwila kutachikiza mwaya muchima wenyi nakulingamo. Echi kachasaka kupwa namuchima wakukupuka mwosenako, nduma. Oloze chasaka kupwa namuchima wakufwila kuzachila Kalunga nakumwononoka nakwitavila vatwolole. Kuzanga Kalunga nakufwila kumwononoka chikiko chakafwile Yopa apwenga “wakulonga,” nakukafwa Lote apwenga “wakwoloka.” Chakafwile nawa Ndavichi ‘alingile vyuma vyamwaza’ kumeso aKalunga. Malunga kana vevwishile Kalunga kuwaha numba tuhu lwola lumwe valimbenjele.
Kuzachila Kalunga namuchima wosena chasaka kutachikiza mwaya muchima wenyi nakulingamo, nakufwila kumwononoka
Shikaho kachi nge tuli nakushinganyeka vyuma vimwe vyavipi chipwe tunalimbenje mukuhanjika chipwe tunalingi vyuma vyavipi, kaha twatela kukavangiza chakutalilaho chavatu tunashimutwila. Kalunga atachikiza ngwenyi oholyapwa tuchili lika tuvatu vakuhona kukupuka mwosena. Chipwe ngocho, asaka tumuzange nakufwila kumwononoka. Kachi nge natumuzachila namuchima wetu wosena mujila kaneyi, kaha tufwelelenu ngwetu nayetu natumwivwisa kuwaha.
