Alona ambile ngwenyi: “Nge ngunevu ngezo, muchima weji kulutanga, kaha ngweji kuchinanga nakuya nakuswama. Ngweji kwivwanga lika chiwomawoma numba nge ngunaswame. Wamba kupinyi nge nguli haweluka kaha nawa kwakuswama kwauchi. Likumbi limwe, ngwapwile nakupasala mumukwakwa, kaha ngwevwile ngezo nayivuma. Ngwaputukile kutetumuka miteto, kaha ngwevwile nakutulo ngo. Mwahichile tando numba jino nguunde muchima. Kutwala muze, ngezo yavumine cheka.”

Jijita navyuma vyeka vili nakuneha jiponde kuvatu. Chakutalilaho, nge yenu chipwe kausoko kenu vanamiwane namusongo waupi, munahase kwivwa namuvifuhwa vene keke. Veka veji kulizakaminanga havyuma navikasoloka kulutwe. Veji kulihulisanga ngwavo, ‘Uno vana vetu navayoya ngachilihi mukaye kano kajijita, nauhwanga, namajilo namisongo?’ Uno vyuma muka navitukafwa tuhone kulizakamina havyuma kana?

Hakuwana nge vyuma vyavipi vyeji kusolokanga lwola lwosena, ngocho “muka-kuzangama eji kumonanga ponde, kaha himwaswama.” (Vishimo 27:12) Twatela kukinga vishinganyeka vyetu ngana muze tweji kukinganga mijimba yetu. Kutalanga kuhema chaulyanyi chipwe mivwimbimbi yili nakusolola jiponde, chinahase kutulingisa tutwame muchiwomawoma navana vetu. Kuhona kutala mivwimbimbi kana kachalumbununa nge twatwama nakaliuko, nduma. Kalunga katutengele tushinganyekenga havyuma vyavipiko. Shikaho, twatela kushinganyekanga ‘havyeshovyo vyuma  vinapu vyamuchano, vyakwoloka, navize vitoma, navize navilingisa vatu vavizange.” Nge natulinga ngocho, kaha “Kalunga wakuunda” mwatukafwa twivwenga kumuchima undutu.—Wavaka-Fwilipi 4:8, 9.

Lufwelelo lwamwenemwene lweji kutukafwanga tuhone kulizakamina. Mbimbiliya yatukolezeza ‘tupwenga vakuvanguluka mangana tulombenga.’ (WaPetulu 1, 4:7) Twatela kulomba Kalunga atuhane mangana nakutukafwa tumike muukalu wetu, nakufwelela ngwetu “eji kutwivwanga havyuma vyosena tuli nakumulomba.”—WaYowano 1, 5:15.

Mbimbiliya yalumbununa ngwayo Satana ikiye “muka-kuyula kano kaye,” keshi Kalungako, kaha nawa ngwayo “kaye kosena katwama mumavoko ayauze wakuhuka.” (Yowano 12:31; WaYowano 1, 5:19) Echi chikiko chalingishile Yesu atulweze tulombenga ngwetu: “Tuyovole kuli uze wakuhuka.” (Mateu 6:13) Alona ambile ngwenyi: “Nge ngunevu ngezo, ngweji kulombanga kuli Yehova angukafwe nguunde muchima. Kaha lunga lyami nawa eji kungutuminanga shinga nakulombela hamwe nayami. Chikupu vene, kulomba kuli Kalunga cheji kungukafwanga.” Mbimbiliya yamba ngwayo: “Yehova atwama hakamwihi navosena vaze veji kumusanyikanga, navosena vaze veji kumusanyikanga namuchima wosena.”—Samu 145:18, kwinyikila chamwishi.

Yesu alwezele vaka-kumukavangiza muChihande ChahaPili valombenga ngwavo: “Wangana wove wizenga.” (Mateu 6:10) Wangana waKalunga naukafumisako vyuma vyosena vize vyeji kutulingisanga tulizakamine. Naukafumisako vyuma kana haya myaka yosena. Kalunga mwakazachisa Yesu uze apwa “Mwata waKuunda” mangana ‘akakumise jijita hamavu hosena.’ (Isaya 9:6; Samu 46:9) Mbimbiliya yamba ngwayo: “[Kalunga] mwakayulanga vihande muli vatu veka naveka . . . Lifuchi limwe kalyeshi kukakajila lifuchi likwavo jipoko jamikwaleko, kaha kaveshi kukalinangula cheka jitako. . . . Naumwe wauchi mwakavevwisa woma.” (Mika 4:3, 4) Vatu “navakatunga jizuvo javo, kaha navakatwamangamo, navakalimanga mande amivinyo, kaha navakalyanga mihako yayo.” (Isaya 65:21) “Mulifuchi lize kamweshi kukapwa mutu mwakamba ngwenyi: ‘Nguli nakukola.’”—Isaya 33:24.

Makumbi ano, numba tuhu natweseka kulikinga ngachilihi, katweshi kuhasa kuhonesa vyuma “vyakwiza mukukasumuna” chipwe kulihenda kujiponde jize jinahase kwiza mwomwo yakupwa kuchihela chimwe halwola lwalupiko. (Muka-kwambulula 9:11) Ngana muze chinapunga kunyima, jijita, naulyanyi, namisongo vili nakutwalaho kujiha vatu vavilinga vyamwaza. Lutalililo muka vatwama nalwo vatu kana?

Vavavulu Kalunga mwakavasangula. Oloze oholyapwa Kalunga avalama muvishinganyeka vyenyi palanga nakulikumbi lize ‘omu vosena vaze vali muvimbumbe navakalovokamo.’ (Yowano 5:28, 29) Mbimbiliya yahanjika kutalisa kukusanguka nakutufwelelesa ngwayo: “Elu lutalililo tuli nalwo lunapu nge chikungo chawato chakwimikisa myono yetu, lunapu lwamwenemwene, lwakuzama mbe.” (WavaHepeleu 6:19) Kaha Kalunga “nafwelelesa nawa vatu vosena hakumusangula [Yesu] kuvafu.”—Vilinga 17:31.

Muholyapwa natulizakaminanga vene havyuma vimwe numba tuhu tuli nakuzachila Kalunga. Oloze kupandama kuli Kalunga kuhichila mukulomba, nakufwelela chikuma muvyuma vyakulutwe vize yatushika Mbimbiliya, vinakafwe Paul, naJanet, naAlona vahone kulizakamina. Ngocho, “Kalunga uze eji kuhananga lutalililo amilingise muwahilile chikuma nakumihana kuunda hakumufwelela,” nganomu ali nakulinga kuli Paul, naJanet, naAlona.—Wavaka-Loma 15:13.