Hamalolwa kana hakiko vachekelelenga manona mangana vochenga mbolo. Vawazachishilenga hakumbi hakumbi kuli mapwevo chipwe kuli vangamba vamujizuvo. Kushikulu, vatu vachekelenga manona hakumbi hakumbi.—Kulovoka 11:5; Yelemiya 25:10.

Vifwanyisa vyamuEjipitu vyasolola omu vachekelenga manona. Vahakilenga manona halilwola lyakuya muupalapala lyakukepama. Kaha muka-kucheka afukaminenga kulilolwa kana oku nakwate lilolwa lyalindende lyakuchekesa namavoko avali, nakuputuka kucheka manona. Mukanda umwe wahanjika nge lilolwa kana lyalemenenga jikilo 2 chipwe 4. Nge navalyasa mutu, nahase kufwa.—Vaka-kuyula 9:50-54.

Jitanga jazachishilenga chikuma unga wakucheka, ngocho lushimbi lwamuMbimbiliya lwakanyishile mutu kutambula lilolwa lyamukwavo lyakuchekela chipwe lyakuchekesa unga kupwa chijikilo. Mukanda waLushimbi lwamuchivali 24:6 wamba ngwawo: “Mutu kanda akatambula lilolwa lyamukwavo lyakuchekela unga, chipwe lize lyakuchekesa unga kupwa chijikilo havyuma vyenyi mwakamulevanyisako, mwomwo kuyoya chamukwavo chapendamina havyuma kana.”

Mbimbiliya yamba ngwayo Yesu “ali kutulo yaIse.” (Yowano 1:18, kwinyikila chamwishi) Awa mazu atalisa kuusoko wakulipwila atwama nawo Yesu naKalunga. Atalisa nawa kuchisemwa vakavangijilenga vaYuleya hakulya.

Mumakumbi aYesu, vaYuleya vasendavalilenga kumesa oku vanatwame havitwamo nakulya vyakulya. Mutu himutu asendavalilenga hachitwamo oku chamutwe chinatale hamesa, kaha nasachila munguza walivoko lyenyi lyachimoswe hachitwamo. Echi chalingishile livoko lyenyi lyachilyo lipwenga lyakulihehwa. Hakuwana nge mutu himutu asendavalilenga kuchimoswe, mwakamwihi namukwavo, ngocho mukanda umwe wamba ngwawo, “mutwe wamutu himutu wapwilenga kwakwamwihi natulo yamukwavo uze asendavalile kunyima yenyi. Echi chikiko chalingishile vavuluke ngwavo ‘nasendavala kutulo’ yamukwavo.”

Vatu vamwenenga kusendavala kutulo yamwenya-zuvo chipwe yamutu uze namisanyika kukulya kupwa chachilemu chikuma. Ngocho, omu Yesu alingile Paseka yamakumishilo, kaposetolo Yowano, “kambaji uze vazangilenga kuli Yesu,” ikiye asendavalile kutulo yaYesu. Echi chashiwilile Yowano ‘kuzeukila hatulo yaYesu’ nakumwihula chihula.?—Yowano 13:23-25; 21:20.?