Uno mwashinganyekaho lyehi ngwenu kwatwama vyuma vikwavo mukuyoya keshi nge kuhema kaha, nakuzata, nakumbata chipwe kusomboka, nakusema vana nakushinakajako tahi? (Yopa 14:1, 2) Mbimbiliya yasolola nge navatu vamangana chikuma veji kushinganyekanga hachihande kana.—Tangenu Muka-kwambulula 2:11.

Uno kuyoya chatwama naulumbunwiso tahi? Chatete, twatela kulihulisa ngwetu, Uno kuyoya chaputukile ngachilihi? Hakumona omu vatenga wongo navihanda vikwavo vyakumujimba wamutu, vatu vavavulu vakukulula ngwavo Tengi wamangana ikiye atutengele. (Tangenu Samu 139:14.) Nge mukiko, kaha kuli vyuma vimwe atutengelele ou Tengi. Kutachikiza vyuma kana nachitukafwa tusuuluke mukuyoya.

Kalunga akiswile valunga napwevo vakulivanga nakuvahana mulimo wamwaza chikuma. Ajinyine ngwenyi vazalise hamavu, nakuwalingisa kupwa palachise nakutwamaho haya myaka yosena.—Tangenu Kuputuka 1:28, 31.

Kujina chaKalunga vachiluwanganyishile omu vatu vakulivanga valikangile kuchiyulo chenyi. Chipwe ngocho Kalunga katumbilileko kaha nawa kalumwine vyuma ajinyineko. Mbimbiliya yatufwelelesa ngwayo, Kalunga alongesa jila yakuyowelamo vatu jenyi vakushishika, kaha vyuma ajina kutalisa kumavu mwakavitesamo. Shikaho Kalunga ali nakusaka mukalivwise kuwaha kuyoya ngana muze ajinyine hakavanga. (Tangenu Samu 37:29.) Ngocho linangulenu Mbimbiliya mangana mumone omu munahase kunganyala kuvyuma ajinyine Kalunga.