CHIHANDE CHACHINENE | MUTU EJI KUYOYANGA LIKA NGE NAFU TAHI?
Vyuma Muka Navimikafwa Mufwelele Ngwenu Vafu Navakasanguka?
Uno chapwa chamangana kushinganyeka ngwetu vafu navakayoya cheka tahi? Eyo, mwomwo nakaposetolo Paulu ashinganyekele hachihande kana. Asonekele ngwenyi: “Kachi nge kutalilila tunatalilila muli Kulishitu chinapu kaha chamukuyoya chino, kaha etu yetu vatela kwivwila ushona kuhambakana vatu vosena. Oloze jino Kulishitu vamusangula kuvafu, ikiye mihako yatete yavaze vanasavala lyehi tulo twakufwa.” (Wavaka-Kolinde 1, 15:19, 20) Paulu afwelelele chikupu ngwenyi nakukapwa kusanguka, mwomwo vatufwelelesacho kuhichila mukusanguka chaYesu. * (Vilinga 17:31) Echi chikiko chalingishile Paulu avuluke Yesu ngwenyi ikiye “mihako yatete,” kulumbununa nge ikiye apwile watete kusangukila kukuyoya chahaya myaka yosena. Nge Yesu apwile watete kusanguka, kahanyi kwatela kupwa veka vaze navakasanguka.
Yopa ambile kuli Kalunga ngwenyi: “Naukafwila milimo yamavoko ove.”—Yopa 14:14, 15
Kuli chuma chikwavo chize nachimikafwa mufwelele ngwenu vafu navakasanguka. Yehova apwa Kalunga wamuchano. Mbimbiliya yahanjika ngwayo, ‘Kalunga keshi kwongako.’ (WaChituse 1:2) Yehova kanda ongengaho lyehi. Kutala nahase kushika ngwenyi mwakasangula vafu, oloze mwahona kutesamo lushiko kana tahi? Nduma.
Mwomwo ika Yehova mwakasangwila vafu? Mwomwo atwama nazangi. Yopa ahulishile ngwenyi: “Kachi nge mutu nafu, kutala mwakayoya cheka tahi?” Akumbulwile ngwenyi: “Naukasanyika, kaha nangukakwitava. Naukafwila milimo yamavoko ove.” (Yopa 14:14, 15) Yopa afwelelele chikupu ngwenyi Ise wamwilu afwila kukamusangula. Kutala Kalunga nalumuka tahi? Ivene amba ngwenyi: “Ami yami Yehova, kaha kangwalumukako.” (Malaki 3:6) Kalunga afwila kukamona vafu vanasanguka, vali nakutwama mukuwahilila kaha nawa vakulikangula. Kala chisemi wazangi afwila kumona cheka mwanenyi uze nafu. Chipwe ngocho, Kalunga keshi kufwila kumona kaha vatu vaze vafwako, oloze atwama nawa nangolo jakuvasangula.—Samu 135:6.
Kufwa chaneha ukalu waunene, oloze Kalunga mwakachifumisako
Yehova mwakazachisa Mwanenyi akasangule vatu twazanga vaze vafwa. Uno Yesu eji kwivwanga ngachilihi kutalisa kukusanguka chavafu? Shimbu kanda Yesu asangule Lazalu, amwene vandumbwaLazalu namasepa jaLazalu vali nakulishona. Ngocho naikiye “asotwele masoji.” (Yowano 11:35) Halwola lukwavo, Yesu alihumanganyine natuliwe wakuNane uze afwishile mwanenyi umwe kaha lyamunwe. Kaha “amwivwilile keke nakwamba kuli ikiye ngwenyi: ‘Hola, kanda naulilako.’” Hahaze vene asangwile uze mwana. (Luka 7:13) Ngocho Yesu eji kwivwanga kukola chikuma kumuchima hakumona vatu vali nakufwa nakulishona. Kaha mwakevwa kuwaha chikuma hakumona vatu vali nakuwahilila hakuvasangwila vausoko wavo.
Kutala mwalishonaho lyehi tahi? Munahase kushinganyeka ngwenu kufwa nachipwangako lika. Oloze Kalunga mwakachifumisako hakusangula vafu kuhichila muli Mwanenyi. Nyingililenu ngwenu Kalunga asaka mukamone omu mwakatesamo chuma kana. Asaka mukapweko omu navakasanguka vausoko wenu nakulipakata navo mukasamba. Achishinganyekenu kuwaha namukevwa hakutwama navo hamwe haya myaka yosena chakuzeneka kuliseza cheka!
Lionel uze twavulukanga muchihande chakulivanga ambile ngwenyi: “Ngwalinangwile jino vyakusanguka. Hakavanga changukaluhwilile kufwelela ngwami vafu navakasanguka, kaha namutu uze angulwezele chihande kana kangwamufweleleleko. Oloze omu ngwatangile Mbimbiliya, ngwamwene chikupu ngwami vafu navakasanguka. Ngocho ngwafwila kukamona cheka kaka yami walunga uze afwa.”
Kutala muli nakusaka kutachikiza vyuma vyavivulu tahi? Nge mukiko, kaha Vinjiho jaYehova navawahilila chikuma kumilweza muMbimbiliya yenu ovyo vyavalingisa vafwelele chikupu ngwavo vafu navakasanguka. *
