CHIHANDE CHACHINENE | MUTU EJI KUYOYANGA LIKA NGE NAFU TAHI?
Lutalililo Muka Vatwama Nalwo Vafu?
Uno vafu navakayoya cheka tahi?
VYUMA YAKUMBULULA MBIMBILIYA: “Ola yili nakwiza omu vosena vaze vali muvimbumbe navakevwa lizu [lyaYesu] nakulovokamo.”—Yowano 5:28, 29.
Yesu ahanjikile chimweza ngwenyi muChiyulo chenyi mwakasangula vatu vaze vali muFuka. Fernando uze twavulukanga muchihande chakulivanga ambile ngwenyi: “Ngwawahililile chikuma omu ngwatangile chisoneka chaYowano 5:28, 29 halwola lwatete. Chisoneka kana changukafwile ngupwenga nalutalililo lwamwenemwene, nakuputuka kushinganyeka havyuma vyamwaza navikasoloka kulutwe.”
Kushikulu, lunga wakushishika Yopa afwelelele chikupu ngwenyi nge nafu Kalunga mwakamusangula. Yopa ahulishile ngwenyi: “Kachi nge mutu nafu, kutala mwakayoya cheka tahi?” Akumbulwile ngwenyi: “Nanguvandaminanga makumbi osena akuyandangila chami [makumbi osena mwapwa muFuka], palanga nomu nalwiza lwola lwami lwakusokoka. Naukasanyika, kaha nangukakwitava.”—Yopa 14:14, 15.
Kusanguka chaLazalu chatulingisa tutalilile vyuma vyamwaza navikasoloka kulutwe
Malita ndumbwaLazalu atachikijile ngwenyi nakukapwa kusanguka. Kahomu Lazalu afwile, Yesu alwezele Malita ngwenyi: “Ndumbwove mwasanguka.” Ngocho Malita ambile ngwenyi: “Ngunatachikiza ngwami mwakasanguka omu nakukapwa kusanguka halikumbi lyakukuminyina.” Kaha Yesu amulwezele ngwenyi: “Ami yami kusanguka, yami kuyoya. Ou mwangufwelela, numba nge mwafwa, mwakayoya cheka.” (Yowano 11:23-25) Kufumaho Yesu asangwile Lazalu. Mujimbu kanou wasolola vyuma vyavinene mwakalinga Yesu kulutwe. Achishinganyekenu ocho kuwaha natukevwa omu vafu navakavasangula mukaye kosena!
Kutala vatu vamwe navakasanguka nakuya mwilu tahi?
VYUMA YAKUMBULULA MBIMBILIYA: Mazu aKalunga asolola nge kusanguka chaYesu chalihandununa nakusanguka chavatu 8 vaze vavuluka muMbimbiliya. Vatu kana vasangukile nakutwama hano hamavu. Oloze Mbimbiliya yatulweza vyakusanguka chaYesu ngwayo: “Yesu Kulishitu . . . ali kulivoko lyachilyo lyaKalunga mwomwo ayile mwilu.” (WaPetulu 1, 3:21, 22) Uno Yesu ikiye kaha asanguka nakuya mwilu tahi? Yesu alwezele vaposetolo jenyi ngwenyi: “Nge ngunayi nakumiwahishila chihela chenu, nangwiza cheka nakumitambula mukatwame kuze ngwatwama ami, mangana kuze nguli ami nayenu nawa mukatwamengako.”—Yowano 14:3.
Kulishitu ayile mwilu, kaha awahishilile tumbaji twenyi vamwe chihela chakutwama. Vaze navakasanguka nakuya mwilu vapwa 144,000. (Kusoloka 14:1, 3) Uno vyuma muka navakalinga mwilu?
Navakazata milimo. Visoneka vyatulweza ngwavyo: “Weshowo mwasanguka mukusanguka chatete awahilila kaha ajila. Ava vangana kufwa chamuchivali kacheshi nangolo hali vakikoko, oloze navakapwanga vapilishitu jaKalunga naKulishitu, kaha navakapwanga vamyangana nakuyula naikiye hamwe hamyaka 1,000.” (Kusoloka 20:6) Shikaho vaze navakasanguka nakuya mwilu navakapwa vapilishitu navamyangana hamwe naKulishitu nakuyula vatu hamavu.
Kusanguka muka chikwavo nachikapwako?
VYUMA YAKUMBULULA MBIMBILIYA: Kaposetolo Paulu asonekele ngwenyi: “Nguli nalutalililo muli Kalunga, lutalililo luze vali nalwo navava vatu, ngwami nakukapwa kusanguka chavaka-kwoloka navaka-kuhenga.”—Vilinga 24:15.
Mazu aKalunga atufwelelesa ngwawo mayevuyevu avatu vaze vafwa navakasanguka
Veya navakapwa halizavu ‘lyavaka-kwoloka’ lize avulukile Paulu? Chakutalilaho, lunga wakushishika Ndanyele vamulwezele omu apwile kwakamwihi nakufwa ngwavo: “Naunoka, oloze naukahinduka nakutambula chazano chove kusongo yamakumbi kana.” (Ndanyele 12:13) Uno Ndanyele mwakasanguka nakutwama kulihi? Mbimbiliya yamba ngwayo: “Vaka-kwoloka navakaheta mavu, kaha navakatwamangaho haya myaka yosena.” (Samu 37:29) Kaha nawa Yesu ahanjikile ngwenyi: “Vawahilila vaze vavavwovu michima, mwomwo navakaswana mavu.” (Mateu 5:5) Ngocho Ndanyele navangamba jaKalunga vakwavo vakushishika navakasanguka nakutwama hano hamavu haya myaka yosena.
Veya navakapwa halizavu ‘lyavaka-kuhenga’ lize avulukile Paulu? Vapwa mayevuyevu avatu vaze vafwile chakuzeneka kutachikiza muchano wamuMbimbiliya nakuwitavila. Ngocho omu navakasanguka, navakavanangula vakatachikize Yehova * naYesu. (Yowano 17:3) Vosena vaze navakasakula kuzachila Kalunga navakayoya haya myaka yosena.
Vosena vaze navakasakula kuzachila Kalunga navakayoya haya myaka yosena nakuwahilila nakupwa vakulikangula
Vyuma navikapwa ngachilihi hano hamavu?
VYUMA YAKUMBULULA MBIMBILIYA: Kalunga “mwakahunda masoji osena kumeso avo, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako.” (Kusoloka 21:4) “Navakatunga jizuvo javo, kaha navakatwamangamo, navakalimanga mande amivinyo, kaha navakalyanga mihako yayo.”—Isaya 65:21.
Ocho kuwaha kana namukevwa hakutwama hamwe navatu mwazanga omu navakasanguka! Vyuma muka navimilingisa mufwelele chikupu ngwenu vafu navakasanguka?
^ par. 15 Kweseka naMbimbiliya, lijina lyaKalunga ikiye Yehova.
