CHIHANDE CHACHINENE | MUTU EJI KUYOYANGA LIKA NGE NAFU TAHI?
Vyuma Muka Vyeji Kusolokanga kuMutu Nge Nafu?
Lionel ambile ngwenyi: “Ngwashinganyekele ngwami kwatwama vihela vitatu kuze kweji kuyanga vatu nge vanafu. Vihela kana shina mwilu, namuhelo chipwe mupakatole. Ngwatachikijile ngwami ami kangwatamo kuya mwilu chipwe kuya muhelo. Kaha nawa kangwatachikijile vyuma vyatwama mupakatoleko. Kunangula kana chapwile kaha chavatu keshi chamuMbimbiliyako.”
Fernando ambile ngwenyi: “Vangunangwilenga ngwavo vatu veji kuyanga mwilu nge vanafu, oloze kangwafwelelele kunangula kanako. Ngwashinganyekele ngwami nge mutu nafu, keshi kuyoya chekako.”
Kutala mwalihulisaho lyehi ngwenu: ‘Vyuma muka vyeji kusolokanga kumutu nge nafu? Uno vatu twazanga vaze vafwa vali nakuyanda kuchihela chimwe tahi? Uno natukavamona cheka nyi? Vyuma muka vyatulingisa tufwelele ngwetu natukavamona cheka?’ Tutalenu omwo yanangula Mbimbiliya. Chatete, tutalenu vyuma yahanjika Mbimbiliya kutalisa kukufwa. Kufumaho natushimutwila halutalililo lwavafu luze vavuluka muMbimbiliya.
Vyuma muka vyeji kusolokanga kumutu nge nafu?
VYUMA YAKUMBULULA MBIMBILIYA: “Vavatonyi vatachikiza ngwavo navakafwa, oloze vafu kavatachikiza chuma numba chimweko, kaha nawa kaveshi nafwetoko, mwomwo vyuma vyakuvanukilaho vyosena vanavivulyama lyehi. Cheshocho naliwana livoko lyove, chilinge nangolo jove josena, mwomwo muFuka nauya kamweshi milimo, chipwe kujina, chipwe chinyingi, chipwe manganako.” *—Muka-kwambulula 9:5, 10.
Fuka tuli nakuvuluka hano keshi hichihela chakumona namesoko, oloze hichihela chachifwanyisa kuze kweji kuyanga vatu vosena nge vanafu, kaha kaveshi kuzata chipwe kutachikiza chuma numba chimweko. Kutala Yopa amwene omwo yalumbunukila Fuka tahi? Yopa ajimbalishile luheto lwenyi lwosena, nakufwisa vana venyi mulikumbi lyangongo, kaha nawa apwile namahute mujimba wosena. Ngocho alembelelele Kalunga ngwenyi: “Nachiwaha nge mungusweka muFuka [“muhelo,” Catholic Douay Version] nge naungusweka.” (Yopa 1:13-19; 2:7; 14:13) Chikupu vene, Yopa atachikijile ngwenyi Fuka yapwile chihela chakunokela, keshi mukakahya kahelo muze mwaya nakuyandako.
Kuli unjiho ukwavo wakutukafwa tutachikize vyuma vyeji kusolokanga kumutu nge nafu. Unjiho kana shina mijimbu yamuMbimbiliya yavatu 8 vaze vasangwile.—Talenu lipwata lyakwamba ngwavo “ Mijimbu YamuMbimbiliya yaVatu 8 Vaze Vasangwile.”
Ava vatu kavahanjikile ngwavo vapwile kuchihela chakuwahilila chipwe chakuyekeleselako. Kachi nge vapwile kuvihela kana omu vafwile, kutala kachi kavalwezele vakwavoko nyi? Kaha nawa kachi kavavisonekele muMbimbiliya mangana vatu vavitachikizeko nyi? Oloze nahamwe vavisoneka hauchi. Vaze vatu 8 vasangwile kavahanjikile vyuma vimwe hachihande kanako. Mwomwo ika? Mwomwo omu vafwile kavatachikijile chuma numba chimweko, vapwile kwijiva nge vali mutulo. Shimbu jimwe Mbimbiliya yazachisa mazu kusavala tulo hakulumbununa kufwa. Chakutalilaho, Ndavichi naSetefwano ‘vasavalile tulo twakufwa.’—Vilinga 7:60; 13:36.
Lutalililo muka vatwama nalwo vafu? Kutala navakayoya cheka tahi?
^ par. 7 MuMbimbiliya yaVisoneka vyaKaye Kakahya, vazachisa lizu “Fuka” hakwalumuna lizu lyachiHepeleu “Sheyole” nalizu lyachiHelase “Hetese.” JiMbimbiliya jimwe jazachisa lizu “helo,” oloze kunangula chakuyekelesa vafu mukakahya kachapwa chamuVisonekako.
