SIDNEI wamyaka yakusemuka 24 wakuBrazil alihulishilenga ngwenyi: “Mwomwo ika nguli nakumwena ukalu? Mwomwo ika Kalunga nechelela ukalu kana usoloke kuli ami?” Ou mukweze apwile muponde mukuhema chahameya, kaha atengukile nakutambukilanga jino muchitwamo chakushindumuna.

Jiponde, namisongo, nakufwisa, naukalu wakulijila tuhu, najijita vinahase kulingisa mutu apihilile naKalunga. Omu mukiko chapwile nakuli kakuluka yetu Yopa uze amwene ukalu waunene. Ahanyine Kalunga mulonga ngwenyi: “Ngweji kutwanga kawelele kuli ove, oloze kaweshi kungwitavako. Ngweji kukatukanga, oloze weji kungutalanga kaha. Unangukenyukila. Uli nakungulemeka nalivoko lyove lyangolo.”—Yopa 30:20, 21.

Yopa katachikijile okwo kwafumine ukalu amwene chipwe ovyo vyalingishile ukalu kana umusolokeleko. Oloze etu Mbimbiliya yatulweza vyuma vyeji kulingisanga ukalu usoloke navyuma twatela kulinga nge ukalu unatuwane.

Mbimbiliya yahanjika hali Kalunga ngwayo: “Milimo yenyi yapwa yakukupuka mwosena, jijila jenyi josena jakwoloka. Apwa Kalunga wakushishika uze keshi kuhengesa chiyuloko. Apwa wakwoloka, wakusungama.” (Lushimbi lwamuchivali 32:4) Awa mazu asolola hatoma nge Kalunga uze apwa “wakwoloka wakusungama” kajina vatu vayande chipwe kuvanehela ukalu mangana avazangamise chipwe kuvalingisa vapwenga navilinga vyamwazako.

Mbimbiliya yatulweza ngwayo: “Nge mutu ali mucheseko, kanda amba ngwenyi: ‘Vali nakungweseka kuli Kalungako.’ Mwomwo Kalunga kaveshi kumweseka navyuma vyavipiko, kaha ikiye nawa keshi kweseka mutu naumweko.” (WaYakova 1:13) Mbimbiliya yatulweza ngwayo kumaputukilo Kalunga ahanyine vatu vyuma vyamwaza. Ahanyine Alama naEve limbo lyamwaza, navyuma vyosena vyasakiwile mukuyoya, namilimo yamwaza. Kalunga avalwezele ngwenyi: “Semenunga muvule chikuma, muzalise hamavu.” Chikupu vene Alama naEve kavapwile naha hakuhanyina Kalunga mulongako.—Kuputuka 1:28.

Oloze makumbi ano, vatu vali nakuhita muukalu wauvulu, kaha chiyoyelo chili nakukaluhwilako lika. Mbimbiliya yahanjika mwakwoloka hakwamba ngwayo: “Vyuma vyakutenga vyosena vili nakulikemenena hamwe mikemo nakwivwila hamwe kukola palanga nakulelo lino.” (Wavaka-Loma 8:22) Uno ukalu kana waputukile ngachilihi?

Hakusaka tutachikize ovyo tweji kuyanjilanga, twatela chatete kwijiva omu chaputukile kuyanda. Kangelo wakulikanga uze vavuluka ngwavo Satana Liyavolo azondwele Alama naEve valikange kujishimbi avahanyine Kalunga jakutachikijilaho kuwaha nakupihya. Kalunga avakanyishile kulya “kumutondo wakutachikijila kuwaha nakupihya.” Liyavolo avangijikilile Kalunga ngwenyi apwa muka-kwonga, hakulweza Eve ngwenyi kaveshi kufwako nge navalikanga kuli Kalunga. Satana avangijikilile nawa Kalunga ngwenyi kasakile kuhana vaAlama naEve lisesa lyakulisakwila vavene vyuma vyamwaza navyevi vyavipiko. (Kuputuka 2:17; 3:1-6) Satana alumbunwine nge vatu vanahase kuyoya kanawa chakuzeneka kuvayula kuli Kalunga. Echi chakatwile chihula chachinene chakwamba ngwavo: Uno Kalunga atamo chikupu kuyula vatu tahi?

Liyavolo akatwile nawa chihande chikwavo. Avangijikilile vatu ngwenyi veji kuzachilanga Kalunga mwomwo yakuvahana vyuma vyamwaza. Kutalisa kuli lunga wakushishika Yopa, Liyavolo alwezele Kalunga ngwenyi: “Uno kawamukingile nakukinga nawa zuvo yenyi navyuma vyosena ali navyoko numba? . . . Oloze acholole livoko lyove, umutambule vyuma vyosena ali navyo, tumone numba nge keshi kukwangula hatomako.” (Yopa 1:10, 11) Numba tuhu Satana ahanjikile hali Yopa, oloze alumbunwine nge vatu vosena veji kuzachilanga Kalunga mwomwo yakuvahana vyuma vyamwaza.

Uno jila muka Kalunga atelelele kukumishilamo vihande kana? Hakupwa wamangana, awanyine jila yamwaza yakukumishilamo vihande kana yize yalingisa vatu vahone kumuhana mulonga. (Wavaka-Loma  11:33) Ahanyine vatu lisesa valiyule hatando yimwe mangana valimwene vavene owo atamo kuyula vatu.

Vihuli vali nakumona vatu makumbi ano vyasolola hatoma nge vatu vanahono kuliyula vavene. Jifulumende jinenyeka mavu nakuhona kuneha kuunda, namukingo, nakuwahilila kuvatu. Echi chasolola mazu ano amuMbimbiliya kupwa amuchano akwamba ngwavo: “Mutu katwama nangolo jakulitwaminyina iveneko.” (Yelemiya 10:23) Chiyulo chaKalunga chikiko kaha nachilingisa vatu vatwame mukuunda, nakuwahilila, nakufukila mwomwo mukiko ajinyine Kalunga hakavanga.—Isaya 45:18.

Kalunga mwakatesamo ngachilihi vyuma vyamwaza ajina kukalingila vatu? Yesu alwezele tumbaji twenyi valombenga ngwavo: “Wangana wove wizenga. Mwaya muchima wove mulingiwe mwilu, nahamavu nawa.” (Mateu 6:10) Kalunga mwakazachisa Wangana wenyi mangana akafumiseko kuyanda chosena halwola atongola. (Ndanyele 2:44) Uhutu, namisongo, nakufwa kavyeshi kukapwako chekako. Mbimbiliya yafwelelesa vaka-kuhutwa ngwayo, Kalunga “mwakapululula vaka-kuhutwa vaze vali nakutwa kawelele.” (Samu 72:12-14) Yahanjika nawa kutalisa kumisongo ngwayo: “Mulifuchi lize kamweshi kukapwa mutu mwakamba ngwenyi: ‘Nguli nakukola.’” (Isaya 33:24) Yesu ahanjikile kutalisa kuvafu vaze vali muvishinganyeka vyaKalunga ngwenyi: “Ola yili nakwiza omu vosena vaze vali muvimbumbe navakevwa lizu lyenyi nakulovokamo.” (Yowano 5:28, 29) Ocho kuwaha kana natukevwa omu najikatesamo jishiko kana!

Omu mwahichile myaka 17 kufuma haze Sidnei uze twavulukanga apwile muponde, ambile ngwenyi: “Kangwahanyine Yehova Kalunga mulonga haponde yize yangusolokeleleko, oloze ngwapihililile vene. Shimbu jimwe ngweji kuhombanga nakulila nge nangushinganyeka hautonji wami. Oloze kulinangula Mbimbiliya chinangukafwe ngutachikize ngwami ponde kana kayapwile kuzangamisa chakufuma kuli Kalungako. Mbimbiliya yamba ngwayo, ‘lwola navyuma vyakwiza mukukasumuna vyeji kutuwananga tuvosena.’ Kulombanga kuli Yehova nakutanga visoneka chinangujikijisa kushipilitu nakumona vyuma mujila yamwaza.”—Muka-kwambulula 9:11; Samu 145:18; Wavaka-Kolinde 2, 4:8, 9, 16.

Kutachikiza kanawa ovyo Kalunga echelela kuyanda nomwo mwakachifumisako chatukafwa tuhone kupihilila naKalunga. Twatachikiza chikupu ngwetu Kalunga “apwa muka-kufweta vaze vali nakumutondatonda chikuma.” Naumwe wauchi mwafwelela Kalunga naMwanenyi mwakapayako.—WavaHepeleu 11:6; Wavaka-Loma 10:11.