OMU William Bedell, twamina wamukwitava ayile kulifuchi lyaIreland mu 1627, awanyine vyuma vize vyamwivwishile kupihya chikuma. Mulifuchi lyaIreland mwavulile vaka-Katolika, oloze lifuchi kana valiyulilenga kuli vaka-Polotesitati vamuBritain. Vaka-Polotesitati valumwine Mbimbiliya mumalimi amavulu amulitungu lyaEurope, oloze kavasakile kwalumuna Mbimbiliya mulilimi lyaIrishko.

Bedell evwile kupihya hakuwana nge vatu vahanjika lilimi lyaIrish “vavasuvililile mwomwo yakuhona kuhanjika Chingeleshi.” Ngocho aputukile kwalumuna Mbimbiliya mulilimi lyaIrish. Oloze vamufumbukilile kuli vaka-Polotesitati. Mwomwo ika?

Bedell aputukile kulinangula lilimi lyaIrish. Kahomu apwile mukulwane hashikola yaTrinity College muDublin nomu apwile Mbishopu muKilmore, akolezezele vaka-shikola vazachisenga lilimi kana. Kaha nawa Mwangana waPwevo wakulivanga Elizabeth wamuEngland asokolwele shikola yaTrinity College mangana valongese vatwamina vamukwitava vanangule vatu Mbimbiliya mumalimi avo. Ngocho Bedell naikiye afwililile kulinga mwomumwe.

Vatu vavavulu muKilmore vahanjikilenga lilimi lyaIrish. Kaha Bedell asakile vatwamina vamukwitava vahanjike lilimi lyaIrish. Akavangijile mazu ahanjikile kaposetolo Paulu ahali Wavaka-Kolinde 1, 14:19 ngwenyi: “Nachiwaha ami kuhanjika mazu atanu aze navevwa muchikungulwilo, mangana ngunangule vakwetu kuhambakana kuhanjika mazu 10,000 mulilimi lyeka,” kulumbununa lilimi lize navahona kwivwa vatu vavavulu.

Oloze vaka-fulumende vamwe vafwililile kumuhonesa. Vaka-kulinangula vyakushikulu vamwe vambile ngwavo kuzachisa lilimi lyaIrish “nachineha vikokojola mulifuchi,” kaha veka nawa ngwavo “nachipwa kufumbukila Fulumende.” Vakwavo nawa vasakile lilimi lyaIrish lipwenga lyakusalila mulifuchi lyaEngland. Fulumende yatungile jishimbi jize jakanyishile vatu kuzachisa lilimi lyaIrish, nachisemwa chavo. Yalwezele vatu valinangule Chingeleshi nakukavangiza chisemwa chalilimi kana.

Vishinganyeka kanevi vyavipi kavyahonesele Bedell kulinga vyuma asakileko. Kuheta muji 1630, aputukile kwalumuna Mbimbiliya mulilimi lyaIrish kufuma muMbimbiliya yaChingeleshi (yaKing James Version yamu 1611). Asakile kwalumuna Mbimbiliya yize navevwishisa kanawa vatu vavavulu. Ashinganyekele ngwenyi kachi nge kaveshi kwalumuna Mbimbiliyako, kaha vatu vakukalikiza kaveshi kuhasa kutanga Visoneka mangana vakayoye haya myaka yosenako.—Yowano 17:3.

Omu mukiko vashinganyekele navatu veka. Myaka kafwe 30 kunyima, mbishopu William Daniel naikiye  amwene ngwenyi chapwile chachikalu vatu kwivwishisa vyuma yanangula Mbimbiliya “mulilimi lyeka.” Echi chamulingishile alumune Visoneka VyachiHelase vyaVaka-Kulishitu mulilimi lyaIrish. Kaha Bedell alumwine jino Visoneka VyachiHepeleu. Eyi Mbimbiliya vavuluka ngwavo Mbimbiliya yaBedell vayalumwine kuli William Daniel nayou lunga Bedell. Mbimbiliya kana yikiko yapwile yatete kulovoka mulilimi lyaIrish, kaha vayizachishile hamyaka 300.

Bedell uze alinangwile chikuma chiHepeleu atondele vatu vavali vaze vahanjikilenga lilimi lyaIrish mangana vamukafweko kwalumuna Mbimbiliya kufuma muChingeleshi nakutwala muIrish. Omu vaputukile mulimo kana, Bedell azachile kafwe navatu vavali vaze afwelele chikuma hakukekesa kanawa vesi hivesi nakwolola haze hahengele. Kaha nawa vahehwojwelenga Mbimbiliya valumwine kuli Swiss Giovanni Diodati muItaly, naVisoneka vyachiHelase vavuluka ngwavo Septuagint, namanyusikilipiti yayilemu yaMbimbiliya yachiHepeleu yamwaka.

Bedell navakwavo vakavangijile jila yize vaka-kwalumuna Mbimbiliya yaKing James Version valumwinyinemo (vaze Bedell atachikijile chikuma), kaha vahakile lijina lyaKalunga muvihela mwosena muze lyatelele kupwa muMbimbiliya. Chakutalilaho, hali Kulovoka 6:3 vasonekaho lijina lyaKalunga ngwavo, “Iehovah.” Manyusikilipiti azachishile Bedell vayilamina muChisete chaMikanda chaMarsh, muDublin, mulifuchi lyaIreland.—Talenu lipwata lyakwamba ngwavo “Bedell Veji Kumwanukanga haMulimo Azachile.”

Bedell akumishile mulimo wenyi wakwalumuna Mbimbiliya kafwe mu 1640. Oloze kayipulitileko. Mwomwo ika? Mwomwo vatu vatwalileho lika kumufumbukila.  Vaka-kufwefulula vasonekelenga vyuma vyavipi hali kuluwa umwe muka-kwalumuna uze akafwilenga Bedell mangana vatu vapopolole Mbimbiliya valumwine. Kutwala muze vamukashile mukamenga. Kuheta mu 1641, mulifuchi kana mwepukile vikokojola vyakufumbukila vatu vaze vahanjikilenga lilimi lyaChingeleshi, ngocho naBedell engilile muukalu kana. Numba tuhu Bedell ahanjikilenga Chingeleshi, oloze vatu vahanjika lilimi lyaIrish vamukingile hakumona vyuma vyamwaza avalingililile. Kutwala muze, maswalale vamuhakile mukamenga muze amwene lamba chikuma. Echi chamulingishile afwenga mu 1642. Ngocho kapulitile Mbimbiliya yenyiko.

Kutwala muze Mbimbiliya yaBedell yambile kutoka omu vaka-kole jenyi vapupile vyuma muzuvo yenyi nakuyipuzula. Oloze sepa lyenyi umwe ambachile mapapilo osena aze alumwine nakuwasweka. Kaha Narcissus Marsh, uze apwile mbishopu wamukulwane wakuArmagh kaha nawa kapilishitu waChachi yaIreland awatambwile. Mutu alinangula vyasayasi, Robert Boyle ahanyine Marsh jimbongo mangana apulite Mbimbiliya yaBedell. Kuheta mu 1685 apulitile Mbimbiliya kana.

Mbimbiliya yaBedell kavayisakile kuvatu vavavulu mukayeko. Chipwe ngocho, Mbimbiliya kana yakafwile vatu vahanjika lilimi lyaIrish vevwishise kanawa Mazu aKalunga mulilimi lyavo. Yakafwile nawa vatu vatwama muScotland nakuvihela vyeka. Vatu kana vevwishishilenga jino Mazu aKalunga hakuwatanga mulilimi lyavo.—Mateu 5:3, 6.

Mbimbiliya yaBedell yinakafwenga vatu vaze vazanga muchano palanga nakumakumbi ano. Lunga umwe ahanjika lilimi lyaIrish, uze nalinangula vyuma yahanjika Mbimbiliya kalinwaha ambile ngwenyi: “Omu twatangilenga Mbimbiliya yaBedell, twevwilenga mazu amuMbimbiliya mulilimi lyetu. Echi chikiko changukafwile chikuma ami natanga yami tulinangule muchano wamuMbimbiliya.”