CHIHANDE CHACHINENE | VINJIHO JAYEHOVA VAPWA VEYA?
Vinjiho jaYehova Vapwa Vatu Vakufwana Ngachilihi?
Twatwama muliuka lize lyatanda mukaye kosena. Liuka lyetu lyapwa lyakulimanyina, kaha kalyapandama kumauka eka akwitavako. Numba tuhu chikota chetu chatwama muUnited States, oloze Vinjiho jaYehova vavavulu vatwama namumafuchi eka. Vinjiho jaYehova vakuheta kafwe jimiliyoni 8 veji kunangulanga vatu Mbimbiliya mumafuchi akuhambakana 230. Veji kukavangizanga mazu aYesu akwamba ngwavo: “Kahou mujimbu wamwaza waWangana navakawambulula hamavu hosena, nakupwa unjiho kuli vaka-mafuchi osena.”—Mateu 24:14.
Tweji kwononokanga jishimbi jafulumende kweshokwo twatwama, oloze katweshi kwazana muvihande vyalifuchi nachiyuloko. Twakavangiza mazu aYesu alweza vaka-Kulishitu ngwenyi “kaveshi vakukayeko.” Echi chikiko chatulingisa tuhone kwazana muvihande vyalifuchi nachiyulo nakukundwiza jijita. (Yowano 15:19; 17:16) Omu kwapwile Jita yaKaye Yamuchivali, Vinjiho jaYehova vavakashile mutumenga, nakuvayanjisa chikuma mwomwo vakanyine kwazana mujita. Mbishopu umwe wamuGerman asonekele ngwenyi: “Vinjiho jaYehova vakiko kaha vakanyine kwazana mujita muChiyulo chaHitler.”
Lipapilo lyamijimbu lyaNová Svoboda, lyamuCzech Republic lyambile ngwalyo: “[Vinjiho jaYehova] vatwama navilinga vyamwaza. Vatu kanava vakashishi vakiko twatela kuhaka havihela vyavinene vyamapolitiki, oloze kaveshi kwitavilako. . . . Numba tuhu vamona jifulumende javatu kupwa jajilemu, oloze vafwelela ngwavo Wangana waKalunga kaha ukiko naukakumisa ukalu wosena vali nakumona vatu.”
Chipwe ngocho, katwalihandula kuvakwetuko. Yesu alombeleleko vaka-kumukavangiza ngwenyi: “Ami kangweshi nakulomba ngwami uvafumise mukayeko.” (Yowano 17:15) Ngocho munahase kutumona mungalila tuli nakuzata, nakuya kuvitanda, nakushikola.
Pamo Nauzanga Nawa
KUKUMBULULA VIHULA VYAKUPANDAMA KUMBIMBILIYA
Wangana waKalunga Chuma Muka?
Shinganyekenu havyuma vize vyalingisa Wangana waKalunga upwenga wakulipwila kuhambakana jifulumende josena.
