CHIHANDE CHACHINENE | UNO KULOMBA CHINAHASE KUMIKAFWA?
Uno Kwatwama Mutu Eji Kwivwililanga Kukulomba Chetu Tahi?
Vatu vamwe vashinganyeka ngwavo kulomba chapwa kwenyeka kaha lwola mwomwo nou eji kuchivwililanga wauchi. Veka veji kulombanga, oloze veji kushinganyekanga ngwavo kulomba chavo kaveshi nakuchikumbululako. Mutu umwe uze afwelela nge Kalunga katwamako, apwile nakuhuhwasana Kalunga nakulomba ngwenyi: “Achinguyeveteleko.” Oloze ambile ngwenyi Kalunga “aholele kaha kulu.”
Mbimbiliya yatufwelelesa ngwayo kwatwama Kalunga uze eji kwivwanga kulomba chetu. Yahanjikile kutalisa kuvatu vakushikulu ngwayo: “[Kalunga] mwakamivwila uselewa omu mwakevwa kawelele kenu. Mwakamikumbulula washiwashi hakwivwa mazu enu.” (Isaya 30:19) Yahanjika nawa ngwayo: “Kulomba chamuka-kusungama eji kuchivwilanga kuwaha.”—Vishimo 15:8.
Yesu alombele kuli Ise, “kaha vamwivwile.”—WavaHepeleu 5:7
Mbimbiliya yavuluka nawa vyakutalilaho vyavatu vaze Kalunga evwililile omu valombele kuli ikiye. Vesi yimwe yamba ngwavo Yesu ‘avulukile vyuma asakilenga kuli Ou ukwechi ngolo jakuhasa kumulwila, kaha vamwivwile.’ (WavaHepeleu 5:7) Vyakutalilaho vikwavo vyatwama hali Ndanyele 9:21 naMijimbu 2, 7:1.
Mwomwo ika vatu vamwe vashinganyeka ngwavo kulomba chavo kaveshi kuchikumbululako? Hakusaka kulomba chetu vachivwe, twatela kulomba kuli Yehova * Kalunga uze vavuluka muMbimbiliya, keshi kutulunga veka chipwe kuli vakakulukako. Kalunga asaka nawa ngwenyi ‘tumulombe vyuma kweseka namwaya muchima wenyi.’ Atufwelelesa ngwenyi nge natumulomba mujila yakwoloka, kaha “mwatwivwa.” (WaYowano 1, 5:14) Ngocho hakusaka kulomba chetu vachivwe, twatela kutachikiza Kalunga uze vavuluka muMbimbiliya nakulinangula vyuma asaka.
Vatu vavavulu vafwelela ngwavo kulomba kachapwa hichilika kaha vatela kulinga vaka-kwitavako, oloze ngwavo Kalunga eji kwivwililanga kukulomba nakuchikumbulula. Chakutalilaho, Isaac wamuKenya ambile ngwenyi: “Ngwalombele kuli Kalunga angukafwe ngwivwishise Mbimbiliya. Nakushimbula chiku, mutu umwe ejile nakungukafwa.” Hilda wamuPhilippines nawa asakile kwecha kunwa makanya. Hakuwana nge chamukaluhwilile kwecha tato kana, ngocho lunga lyenyi amulwezele ngwenyi, “Lomba kuli Kalunga akukafwe.” Alingile ngocho, kaha ambile ngwenyi: “Ngwalikomokelele mujila angukafwilililemo Kalunga. Chipepa chakunwa makanya chaputukile kukuma, kutwala muze ngwalitwaminyinewo.”
Uno Kalunga nahase kumikafwa nge namumulomba vyuma kweseka namwaya muchima wenyi?
^ par. 6 Yehova likiko lijina lyaKalunga kweseka nomu yahanjika Mbimbiliya.
