Mwaka himwaka vatu vavavulu vali nakufwa kumusongo wazala namisongo yeka mwomwo yakuhutwa chikuma. Numba tuhu mafuchi amwe atwama naluheto, oloze vatu vavavulu mukaye vapwa vihutu. Mbimbiliya yavuluka ngwayo uhutu unayanjisanga vatu hamyaka yayivulu.—Tangenu Yowano 12:8.

Kuli nakusakiwa fulumende yize nayikayula kaye kosena numbanyi uhutu ukakume. Fulumende kana yatela kupwa nangolo jakupangila kanawa vyakulya navyuma vyeka mukaye kosena nakukumisa jijita jize jeji kunehanga uhutu kakavulu. Kalunga atufwelelesa ngwenyi mwakaneha fulumende kana.—Tangenu Ndanyele 2:44.

Kalunga atongola Mwanenyi Yesu mangana akayule vatu vosena hano hamavu. (Samu 2:4-8) Yesu mwakapululula vaka-kuhutwa nakukumisa luyanjisa naulyanyi.—Tangenu Samu 72:8, 12-14.

Ngana muze vapolofwetele, “Mwata waKuunda” Yesu mwakaneha kuunda namukingo mukaye kosena. Vatu vosena hamavu navakatwama jino mujizuvo javo mukuunda, nakulivwisa kuwaha kuzata milimo, nakupwa navyakulya vyakulisala.—Tangenu Isaya 9:6, 7; 65:21-23.