CHIHANDE CHACHINENE | UNO KULOMBA CHINAHASE KUMIKAFWA?
Mwomwo Ika Vatu Veji Kulombelanga?
Samuel * wamuKenya ambile ngwenyi: “Ngwahemenenga njuka lwola lwosena. Kaha ngwalombelenga kuli Kalunga angukafwe ngutape vakwetu mukuhema kana, oloze vyuma kana kavyalingiwilengako.”
Teresa wamuPhilippines ambile ngwenyi: “Kushikola vatulwezelenga tuhanjike kulomba chakulamina mumutwe chize vatunangwile.”
Magdalene wamuGhana ambile ngwenyi: “Ngweji kulombanga kuli Kalunga nge nguli muukalu. Kaha nawa ngweji kumulombanga angukonekele jishili jami, nakungukafwa ngupwenga ngumuka-Kulishitu wamwenemwene.”
Mazu ahanjikile Samuel, naTeresa, naMagdalene asolola nge kwatwama vyuma vyavivulu vyeji kulingisanga vatu valombe. Vimwe vyavilemu, vyeka chiku. Vamwe veji kulombanga namuchima wavo wosena, oloze veka nduma. Eyo, vatu vavavulu vasaka kulomba kuli Kalunga numba tuhu vyuma veji kulombanga vyalihandununa. Vamwe veji kulombanga vavakafwe vahone kufwela kushikola, chipwe vatape vakwavo mukuhema, chipwe vatwame kanawa mutanga, chipwe vavakafwe muvyuma vyeka. Kuhehwojola chimwe chasolola nge navatu vamwe vaze kavetavako veji kulombanga.
Uno yenu mweji kulombanga tahi? Nge mukiko, kaha mweji kulombelanga ika? Numba mweji kulombanga lwola lwosena chipwe chiku, lihulisenu ngwenu: ‘Uno kulomba chinahase kungukafwa tahi? Uno katwama mutu eji kwivwililanga kukulomba chami tahi?’ Muka-kusoneka umwe ahanjikile ngwenyi kulomba chapwa “nge hivitumbo kaha.” Navatu vamwe vaze vatala hakulikangula chamijimba vamona kulomba mujila yoyimwe ngwavo chapwa “hivitumbo vikwavo vyakuka misongo.” Uno vatu veji kulombanga mwomwo yachilika kaha tahi, nyi veji kunganyalanga vyuma vimwe?
Mbimbiliya yahanjika ngwayo kulomba kachapwa hivitumbo vyakuka misongoko. Yatulweza ngwayo kwatwama mutu uze eji kwivwililanga kukulomba chavaze navalomba mujila yamwenemwene navyuma vyakwoloka. Uno mukiko tahi? Tutalenu haunjiho umwe.
^ par. 3 Majina amwe vanawalumuna.
