Tembele yamuYelusalema yize atungile Solomone yapwilile hapili. Kaha atungile kembwe yimwe kumututuko, yikwavo kumulauko wapili kana. Jikembwe kana jakwachililile mavu kuchina nawashikunuka. Echi chalingishile haze vatungililile chihela chajila hapwenga hakusalama. Helote asakile kutunga tembele yamwaza chikuma kuhambakana yize atungile Solomone. Ngocho aputukile kutungulula tembele atungile Solomone nakuyitohwesa.

Vamanjimela jaHelote vatohwesele chihela chakusalama chakunote yatembele. Vatohwesele nawa utenda wakusulo jimita 32. Hakusaka valinge ngocho, vatungile tupete twamalolwa nakembwe yize yakwachililile mavu kuchina nawashikunuka. Eyi kembwe yasuwile jimita 50.

Hakuzata mulimo kana, Helote kasakile kwivwisa vaYuleya kupihya chipwe kutangula milimo yakuhana mawana namilimo yeka yahatembeleko. Josephus, kaYuleya uze alinangula vyakushikulu ambile ngwenyi Helote anangwile navapilishitu vavaYuleya mulimo wakwola malolwa nakusonga maliva mangana vazachilenga muvihela vyajila kuchina vatu veka navengilamo nakuzachilamo.

Chaluvinda, Helote kakumishile mulimo wakutungulula tembeleko. Mulimo kana wambachile myaka 46 kufuma halwola auputukile nakuheta mu 30 C.E. (Yowano 2:20) Kaha vaukumishile kuli kakwatambuli kenyi Angalipa wamuchivali mulikulukaji lyamyaka lyakulivanga C.E.

Vatu vamwe vahalitungu lyaMelita vahungumukile nakunangula chamukwitava chavaHelase. Achitalenu havyuma vyasolokele omu wato apwilemo Paulu wavombele halitungu lyaMelita. Vyuma vyasolokele vavisoneka mumukanda waVilinga. Omu kaposetolo Paulu ambachile mukuta wajitete nakuuhaka hajiko mangana vakwavo vaze vavombele votenga, chiyenge asolomokele nakukakachila kulivoko lyenyi. Ngocho vatu vahaze halitungu vambile ngwavo: “Chikupu vene ou lunga apwa muka-kujiha vatu, kaha numba nayovoka tuhu hakalungalwiji, oloze Chiyulo kachamwitavilile ayoye likako.”—Vilinga 28:4.

Lizu “Chiyulo” vazachisa hano, muchiHelase valivuluka ngwavo “di’ke.” Lizu kana linahase kulumbununa chiyulo mujila yeka. Muvishimo vyavaHelase, lizu Dike lyapwile lijina lyakalunga wapwevo wachiyulo. Vatu vashinganyekele ngwavo kalunga kana ikiye atalilenga havyuma valingilenga vatu nakwambulula milonga yakuzeneka kutachikiza kuli Zeuse mangana vaze vanavulumuna milonga kana vavazangamise. Mujimbu umwe wasolola nge vatu vahalitungu lyaMelita pamo vashinganyekele ngwavo: “Numba tuhu Paulu nayovoka hakalungalwiji, oloze kalunga wapwevo Dike ali nakusaka kumuzangamisa . . . kuzachisa chiyenge.” Vatu kana valumwine jino vishinganyeka vyavo hakumona Paulu wape, kalemanyineko.