Shimbu kanda muputuke kulinga chuma chimwe, kakavulu mweji kulihulisanga ngwenu, ‘Vyuma muka nangunganyala hakulinga chuma kana?’ Kutala chakuhenga kuhulisa chihula kana kutalisa kukulomba tahi? Nduma. Chapwa chamwaza kuhulisa ngocho mangana tutachikize numba nge kulomba nachitukafwa. Lwola lumwe nalunga wakushishika Yopa ahulishile ngwenyi: “Kachi nge nangumusanyika, kutala mwangwitava tahi?”—Yopa 9:16.

Muvihande vinafumuho, twashimutwilanga nge kulomba kachapwa kaha hichilika chize vatela kulinga vaka-kwitava chipwe hivitumbo vyakuka misongoko. Kalunga wamuchano eji kwivwililanga chikupu kukulomba chetu. Nge natumulomba mujila yakwoloka navyuma vyamwaza, kaha mwevwilila kukulomba chetu. Atukolezeza tupandame kuli ikiye. (WaYakova 4:8) Vyuma muka natunganyala nge natulombanga kuli Kalunga lwola lwosena? Tutalenu vyuma vimwe vize tunahase kunganyala.

Kutala mweji kulizakaminanga chikuma nge muli nakumona ukalu navyeseko mukuyoya chenu tahi? Halwola kanelu twatela kukavangiza Mbimbiliya yize yatukolezeza ‘tulombenga shimbu yosena’ nakulweza ‘Kalunga vyuma tunakusaka.’ (Wavaka-Tesolonyika 1, 5:17; Wavaka-Fwilipi 4:6) Mbimbiliya yatufwelelesa ngwayo nge natulomba kuli Kalunga, kaha “kuunda chaKalunga chize chahambakana kunangakana chosena nachikinga michima [yetu] navishinganyeka [vyetu].” (Wavaka-Fwilipi 4:7) Natwivwa kumuchima undutu nge natulweza Setu wamwilu ukalu wetu. Yehova atulweza tulingenga ngocho. Mukanda waSamu 55:22 wamba ngwawo: “Mbila chiteli chove hali Yehova, kaha ikiye mwakuzamikisa.”

Vatu vavavulu mukaye veji kwivwanga kumuchima undutu nge vanalombo kuli Kalunga. Hee Ran wamuSouth Korea ambile ngwenyi: “Kulomba kuli Kalunga cheji  kungukafwanga ngwivwenga kumuchima hwo numba vene nge nguli muukalu waunene. Kaha ngweji kupwanga nangolo jakumika.” Cecilia wamuPhilippines ambile ngwenyi: “Hakupwa nguchisemi, ngweji kulizakaminanga hali vana vami namama uze eji kunguvulyamanga mwomwo yakuviza musongo wakuwongo. Oloze kulomba kuli Kalunga cheji kungukafwanga nguhone kulizakamina chikuma. Ngwafwelela ngwami Yehova mwangukafwa nguvalame kanawa.”

Kutala muli nakuhita muukalu waunene chipwe kuviza musongo waunene tahi? Kulomba kuli “Kalunga muka-kuvendejeka chosena” nachimikafwa chikuma. Mbimbiliya yamba ngwayo eji “kutuvendejekanga muvyeseko vyetu vyosena.” (Wavaka-Kolinde 2, 1:3, 4)  Chakutalilaho, lwola lumwe omu Yesu apwile mucheseko, “afukamine nakuputuka kulomba.” Vyuma muka vyasolokele? “Kangelo afumine mwilu, asolokele kuli ikiye, kaha amukolezezele.” (Luka 22:41, 43) Kaha nawa lunga wakushishika Nehemiya vamwivwishilenga woma kuvatu vavilinga vyavipi vaze vasakile kumuhonesa kuzata mulimo waKalunga. Ngocho alombele ngwenyi: “Ove Kalunga kolezeza mavoko ami.” Vyuma vyasolokele kufuma haze vyasolwele nge Kalunga amukafwile ahone kwivwa woma nakutesamo mulimo wenyi. (Nehemiya 6:9-16) Reginald wamuGhana, avulukile omu eji kwivwanga nge nalombo ngwenyi: “Nge ngunalombo, chikumanyi haukalu wami waunene, ngweji kwivwanga kwijiva nge ngunalweze ukalu wami mutu uze ali nangolo jakungukafwa nakungufwelelesa ngwenyi kanda nawivwa womako.” Chikupu vene, Kalunga eji kutuvendejekanga nge natulomba kuli ikiye.

Vyuma tweji kulinganga vinahase kutunehela ukalu mukuyoya chetu chosena hohamwe navatu twazanga. Tunahase kusakula ngachilihi kanawa vyakulinga? Mbimbiliya yamba ngwayo: “Kachi nge mutu umwe hali enu nahono mangana [chikumanyi akumukafwa ahonese vyeseko], alombenga lika Kalunga, mwomwo eji kuhananga vosena namuchima umwe chakuzeneka kutoleka, kaha mwamuhanawo.” (WaYakova 1:5) Nge natulomba kuli Kalunga atuhane mangana, kaha shipilitu yenyi yajila nayitukafwa tusakule kanawa vyakulinga. Tunahase kulomba kuli Kalunga atuhane shipilitu yajila, mwomwo Yesu atufwelelesa ngwenyi, ‘Senu wamwilu mwahana shipilitu yajila kuli vaze navamulombayo.’—Luka 11:13.

Yesu naikiye alombelenga kuli Ise amukafwe hakusakula vyuma vyavilemu vyakulinga. Chakutalilaho, Mbimbiliya yatulweza ngwayo shimbu kanda Yesu asakule vaposetolo jenyi 12, “alombele kuli Kalunga ufuku wosena.”—Luka 6:12.

Ngana mwaYesu, navatu vavavulu makumbi ano vanavakolezezanga hakumona Kalunga mwakumbulula kulomba chavo vamulombele avakafwe vasakule kanawa vyakulinga. Regina wamuPhilippines alumbunwine ukalu ahichilemo, wakufwana nge kuwana mwakuyoyela natanga yenyi hanyima yakufwisa lunga lyenyi, nakumufumisa hamilimo, naukalu wakulela vana. Vyuma muka vili nakumukafwa asakule kanawa vyakulinga? Ambile ngwenyi, “Ngweji kulombanga kuli Yehova angukafwe.” Kwabena wamuGhana ahanjikile vyuma vyamulingishile alombe kuli Kalunga amukafwe ngwenyi, “Vangufumishile hamilimo yayinene yakutungatunga ngwazachilenga.” Kaha ahanjikile havyuma atelele kulinga ngwenyi, “Ngwalombelenga kuli Yehova lwola lwosena angukafwe ngusakule kanawa vyakulinga.” Ambile nawa ngwenyi, “Ngwatachikiza chikupu ngwami Yehova nangukafwe ngusakule milimo yize nayingukafwanga nguzate kanawa vyuma vyakushipilitu nakulizakama kumujimba.” Kalunga mwamikafwa nayenu nge namumulomba amikafwe muhonese vyuma vize vinahase kwenyeka usoko wenu naikiye.

Tunavuluka kaha vyuma vyavindende vize namunganyala hakulomba. (Hakusaka mutachikize vyuma vikwavo namunganyala, talenu lipwata lyakwamba ngwavo “ Vyuma Namunganyala haKulomba.”) Oloze hakusaka munganyale kukulomba, chatete mwatela kutachikiza Kalunga nakulinga vyuma asaka. Ngocho tuli nakumikolezeza muhulise Vinjiho jaYehova vamikafwe kulinangula Mbimbiliya. * Echi hichuma chatete chize nachimikafwa mupandame kuli “Muka-kwivwilila kukulomba.”—Samu 65:2.